မေ – ၁၇ ၊ ၂၀၂၅ ၊ ဆိုင်းမင်း/People’s Spring
ဒီနေ့ (မေလ ၁၇ ) ညနက်ပိုင်း ၁၀ နာရီခွဲခန့်မှာ မန္တလေးတိုင်း ၊ကျောက်ဆည်မြို့ အနီး ဗဟိုပြုပြီး လှုပ်ခတ်ခဲ့တဲ့ ပြင်းအား မဂ္ဂနီကျု့ ၅.၂ ရှိတဲ့ ငလျင်ကြောင့် မန္တလေးမြို့ခံတွေ လမ်းပေါ် ပြေးဆင်းခဲ့ရပါတယ်။
အမေရိကန် ငလျင်တိုင်းတာရေးဌာန (USGS) ရဲ့ ထုတ်ပြန်ချက်အရ ကျောက်ဆည်မြို့ အနောက် – အနောက်တောင်ဘက် ၁၃ မိုင်ခန့်အကွာ မြေအနက် ၆ မိုင်ခွဲခန့်ကို ဗဟိုပြုပြီး ပြင်းအား မဂ္ဂနီကျု့ ၅.၂ ရှိတဲ့ ငလျင်လှုပ်ခတ်ခဲ့တာပါ။
အဲဒီငလျင်ကြောင့် မန္တလေးမြို့ခံတွေ စိုးရိမ်ထိတ်လန့်ပြီးနေအိမ်တွေ ၊ တိုက်ခန်းတွေပေါ်ကနေ လမ်းပေါ် ပြေးထွက်ခဲ့ရတယ်လို့ မြို့ခံအချို့က ပြောပါတယ်။
Public Service Announcement
ငလျင်လှုပ်ခတ်မှုကို သိသိသာသာ ခံစားရချိန်က စက္ကန့် ၂၀ ခန့် ကြာမြင့်တယ်လို့ လည်း မြို့ခံအချို့က ဆိုပါတယ်။
” အရှိန်ကလည်းပြင်း ကြာလည်းကြာတော့ လူတွေအကုန်လမ်းပေါ်ရောက်ကုန်ကြတာ”လို့ မန္တလေးမြို့ ၊ချမ်းမြသာစည်မြို့နယ်မှာနေထိုင်တဲ့မြို့ခံအမျိုးသမီးက ပြောပါတယ်။
အခုငလျင်ဟာ ပြီးခဲ့တဲ့ မတ်လ ၂၈ ရက်က လှုပ်ခတ်ခဲ့တဲ့ စစ်ကိုင်း ငလျင်ကြီးအပြီး လှုပ်ခတ်ခဲ့တဲ့ ငလျင်တွေအနက် အသိသာဆုံးခံစားရတဲ့ ငလျင်လည်းဖြစ်တယ်လို့မြို့ခံအချို့က သူတို့ရဲ့အတွေ့အကြုံကို အသိပေးပါတယ်။
အခုညနက်ပိုင်းလှုပ်ခတ်တဲ့ငလျင်ကြောင့် ပျက်စီးမှု ၊ ထိခိုက်မှု အခြေ အနေကိုတော့မသိရသေးပါဘူး။
စစ်ကိုင်းငလျင်ကြီးရဲ့ နောက်ဆက်တွဲငလျင်ငယ်တွေ ဆက်လက်လှုပ်ခတ်နိုင်တာကြောင့် သတိထားပြီး နေထိုင်ကြဖို့ အမျိုးသားညီညွတ်ရေးအစိုးရ(NUG) ရဲ့ လူသားချင်း စာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနကအသိပေးထားပါတယ်။
