ဆောင်းပြောင်းရွာတိုက်ပွဲ လက်နက်အချို့နှင့် စစ်သုံးပန်းအချို့ဖမ်းမိရဟု KNDF ပြော

မေ ၂၂၊၂၀၂၅။ရဲခေါင်/People’s Spring

ရှမ်းပြည်နယ်တောင်ပိုင်း၊ ပင်လောင်းမြို့နယ်၊ဆောင်းပြောင်းကျေးရွာရှိ စစ်ကောင်စီတပ်နှင့် PNO ပြည်သူ့စစ် ပူးပေါင်းတပ်အား တိုက်ခိုက်ရာ လက်နက်အချို့နှင့် စစ်သုံးပန်းအချို့ ဖမ်းဆီးရရှိကြောင်း ကရင်နီအမျိုးသားများကာကွယ်ရေးတပ်(KNDF)တာဝန်ရှိသူ ကိုသာအယ်စိုးက လူထုနွေဦးသို့ပြောသည်။

မေလလ ၁၇ရက်ကစ၍ ဆောင်းပြောင်းကျေးရွာ၌ တပ်စွဲထားသော စစ်ကောင်စီတပ်နှင့် PNO ပြည်သူ့စစ်ပူးပေါင်းတပ်ကို တော်လှန်ရေးပူးပေါင်းတပ်များက ထိုးစစ်ဆင်ခဲ့ခြင်း ဖြစ်သည်။

” ဆောင်းပြောင်းဘက်မှာ တော်လှန်ရေးတပ်ဖွဲ့တွေက စစ်ကောင်စီနဲ့PNO ပူးတပ်ကို ချေမှုန်းခဲ့တာရှိတယ်။လက်နက်အချို့သိမ်းဆည်းရမိတယ်။စကစဘက်က ထိခိုက်သေဆုံးမှုတွေရှိတယ်”ဟု ကိုသာအယ်စိုးက ပြောသည်။

Public Service Announcement

ထို့အပြင် စစ်ကောင်စီတပ်သားများနှင့် စစ်ကောင်စီ လက်အောက်ခံ PNO ပြည်သူ့စစ်အချို့ကိုလည်း အရှင်ဖမ်းမိကြောင်း ၎င်းက အသိပေးသည်။

ဆောင်းပြောင်းရွာတိုက်ပွဲအတွင်း စစ်ကောင်စီက နေ့စဥ်လေကြောင်းပစ်ကူနှင့် ဖယ်ခုံမြို့ရှိ ခမရ (၃၃၆)တပ်ရင်းမှ ရှော့တိုက်ဒုံးများ ၊ဒရုန်းများ ၊ လက်နက်ကြီးများဖြင့် ပစ်ကူပေးခဲ့သည်ဟု ဆိုသည်။

ဆောင်းပြောင်းကျေးရွာကို တော်လှန်ရေးပူးပေါင်းတပ်ထံ ပေးလိုက်ရသည်ကို PNO ပြည်သူ့စစ် ဗိုလ်မှူး ခွန်ဆန်းအောင်က ဝန်ခံထားသည်။ထို့ကြောင့် ပြန်လည်ထိုးစစ်ဆင်နေသည်ဟုလည်း ၎င်း၏ လူမှုကွန်ရက်မှတဆင့် ယမန်နေ့(မေလ ၂၁ရက်)တွင် ရေးသားထားသည်။

ပင်လောင်းမြို့နယ်၊ဆောင်းပြောင်းရွာရှိ စစ်ကောင်စီတပ်စခန်းကို တော်လှန်ရေးတပ်ဖွဲ့များက ၂၀၂၄ မတ်လ ၁၈ ရက်‌တွင် သိမ်းပိုက်ခဲ့ဖူးသည်။ဆောင်းပြောင်းကျေးရွာသည် ပင်လောင်းမြို့တောင်ဘက်၊ ဖယ်ခုံမြို့အကြားမှာရှိပြီး ဖယ်ခုံမြို့နှင့် ၅မိုင်ခန့်သာ ကွာဝေးသည်။

စစ်ကောင်စီတပ်နှင့် PNO ပြည်သူ့စစ်တပ်က အင်အားအလုံးအရင်းဖြင့် စစ်ကြောင်းထိုးပြီး ဆောင်းပြောင်းရွာကို ယမန်နှစ် ဇွန်လကုန်က ပြန်လည်တပ်စွဲခဲ့ခြင်း ဖြစ်သည်။

စစ်ကောင်စီတပ်နှင့် PNO ပြည်သူ့စစ်တို့သည့် ရှမ်းပြည်နယ်တောင်ပိုင်းနှင့် ကရင်နီပြည်နယ်တို့တွင် စစ်ကြောင်းသုံးကြောင်းအင်အား ၆၀၀ဖြင့် ထိုးစစ်ဆင်နေသည်။အဆိုပါထိုးစစ်အရ မိုးဗြဲမြို့စစ်ကြောင်း၊မိုးဗြဲ-ကုန်းသာစစ်ကြောင်းနှင့် ဖယ်ခုံ- ညောင်ရွေမြို့နယ်တို့ဟု ရှမ်းတောင်စစ်ဒေသခွဲ၊ဗျူဟာ အမှတ်(၁)က ထုတ်ပြန်ထားသည်။

စစ်ကောင်စီ၏ ထိုးစစ်ကို မေလပထမပတ်နှင့် ဒုတိယပတ်အထိ ခုခံရာတွင် စစ်ကောင်စီတပ်သား ၂၀ ကျော်သေဆုံးပြီး အရှင်သုံးဦးဖမ်းမိကာ လက်နက်ခဲယမ်းများနှင့် တိုက်ခိုက်ရေးဒရုန်းနှစ်ခုပါသိမ်းဆည်းရရှိ ထားကြောင်းသိရသည်။