မေ ၂၆၊၂၀၂၅။ရှိန်း/People Spring
စစ်တပ်နယ်မြေ၊ပြင်ဦးလွင်မြို့မှာစီမံချက်ဆိုပြီး လိုင်စင်မဲ့ ကားနဲ့ဆိုင်ကယ်တွေကို စစ်ကောင်စီအဖွဲ့ကဆက်တိုက်ဖမ်းဆီးနေပြီး တရက်ကို မြို့ခံတွေရဲ့ကားအစီးရေ ၅၀လောက်အထိ အဖမ်းခံနေရကာ စစ်ကောင်စီတပ်နဲ့နီးစပ်သူတွေရဲ့ ကားတွေတော့မပါဘူးလို့ သိရပါတယ်။
မေလ၂၃ရက်နေ့ကစတင် ဖမ်းဆီးနေတာဖြစ်ပြီး ပြည်သူပိုင်ဆိုင်ကယ်အများစုဖမ်းဆီးခံနေရတာလို့သိရပါတယ်။
“ဘာမှ ပြောမရဘူး။ဆိုင်ကယ်သိမ်းသွားတာ။ပြီးမှ ထွေအုပ်ရုံးနဲ့ ရုံးပေါင်းစုံဘက်ကိုလိုက် ရွေးရမယ်ကြားတယ်”လို့ ဒေသခံတစ်ဦးက ပြောပါတယ်။
Public Service Announcement
စီမံချက်နဲ့ လိုင်စင်မဲ့ကားဆိုင်ကယ်တွေကို ဖမ်းဆီးနေတဲ့ ယာဉ်ထိန်းရဲတွေဟာ လိုင်စင်မဲ့ကားတွေနဲ့ပဲ လာဖမ်းနေတာလို့ မြို့ခံတွေက ပြောပါတယ်။
“လိုင်စင်မဲ့ကားလာဖမ်းတဲ့သူ တွေရဲ့ကားနဲ့ဆိုင်ကယ် တွေကို ဘယ်သူက စစ်ဆေးလဲ။အကုန်တခုမှ လိုင်စင်မပါဘူး။နောက်ဆုံး DSAနဲ့ စာပေ၂ကအရာရှိ တွေကို ငှား ပေး နေတဲ့ ဆိုင်ကယ်၊ကားအငှားလုပ်တဲ့သူတွေ ဘယ်သူလိုင်စင်ရှိလဲ။စီမံချက်ကလည်း စစ်ကောင်စီလက်ထပ်မှာ ကွက်ကြားမိုးရွာတာ”လို့ မြို့ခံတစ်ဦးက ပြောပါတယ်။
လိုင်စင်မဲ့ကားနဲ့ ဆိုင်ကယ်တွေဖမ်းဆီး နေပေမယ့် စစ်ကောင်စီတပ်နဲ့နီးစပ်သူတွေ၊စစ်ကောင်စီ ဝန်ထမ်းတွေရဲ့ကားနဲ့ ဆိုင်ကယ်တွေတော့ မပါဘူးလို့မြို့ခံတွေက ပြောပါတယ်။
စစ်ခေါင်းဆောင်မင်းအောင်လှိုင်က လိုင်စင်မဲ့ယာဥ်တွေကို စီမံချက်နဲ့ ဖမ်းဆီးမယ်လို့ပြီးခဲ့တဲ့ တပတ်က ပြောခဲ့ပြီးနောက် ပြင်ဦးလွင်မြို့မှာ မြို့လမ်းကြားနဲ့ ကျေးရွာတွေဘက်အထိ ကား၊ဆိုင်ကယ်တွေ ဖမ်းဆီးနေတာလို့ သိရပါတယ်။
