ပခုက္ကူမီးသတ်ရုံး၌တပ်စွဲထားသော စစ်တပ်ကို တော်လှန်ရေးတပ်များ အနီးကပ်ဝင်တိုက်

ဇွန်-၁၊ ၂၀၂၅။ ထင်လင်း/People’s Spring

ပခုက္ကူခရိုင်မီးသတ်ရုံး၌တပ်စွဲထားသောစစ်ကောင်စီတပ်သားများကို မဟာမိတ်တပ်ဖွဲ့များနှင့်အတူ ယနေ့(ဇွန်လ ၁ ရက်)နံနက် အစောပိုင်းက အနီးကပ်ဝင်ရောက်တိုက်ခိုက်ခဲ့ကြောင်းပခုက္ကူမြို့နယ် ပြည်သူ့ကာကွယ်ရေးအဖွဲ့(ပကဖ)၊ တပ်ရင်း(၁)မှ တာဝန်ရှိသူတစ်ဦးက ပြောသည်။

ဇွန်လ (၁)ရက်နေ့၊ နံနက်အ​​စော ၃ နာရီခွဲ ဝန်းကျင်တွင် ပခုက္ကူမြို့ပေါ်ရှိခရိုင်မီးသတ်ရုံး၌ တပ်စွဲထားသောစစ်ကောင်စီတပ်သားများကို ပခုက္ကူ ပ.က.ဖ တပ်ရင်း (၁)၊ Shwe Nyar Myae PDF၊နယ်စည်းမခြားပြည်သူ့ကာကွယ်ရေးတပ်ဖွဲ့၊မြိုင်ပ.က.ဖ တပ်ရင်း(၃)၊ တပ်ခွဲ(၄)တို့နှင့် ပူးပေါင်းတိုက်ခိုက်ခဲ့ခြင်းဟု ၎င်းကပြောသည်။

တိုက်ပွဲကြာချိန် နာရီဝက်ကျော်ကြာမြင့်ခဲ့ပြီးစစ်ကောင်စီဘက်မှ ငါးဦးသေဆုံးကာ ငါးဦးထက်မနည်း ထိခိုက်ဒဏ်ရာရရှိသွားသည် ကနဦးသိရှိရကြောင်း ပခုက္ကူ ပ.က.ဖ တပ်ရင်း (၁)မှ တာ ဝန်ရှိသူက ပြောသည်။

Public Service Announcement

“(စစ်ကောင်စီတပ်အင်အား) ပုံမှန်တော့ မရှိဘူးဗျ။ ခန့်မှန်း ၂၀ ကျော်ဝန်းကျင်လောက် ရှိမယ်ခင်ဗျ။ အဲ့ရုံးက(တပ်မ) ၁၀၁ လက်အောက်ခံ ၂၅၉ တပ်အနီး ပခုက္ကူမြို့ရှောင်လမ်းမကြီးဘေးမှာ ရှိတာပါခင်ဗျ”ဟု မီးသတ်ရုံးတည်နေရာနှင့်ပတ်သက်၍တာဝန်ရှိသူက ဆက်ပြော သည်။

အဆိုပါ မီးသတ်ရုံး၌တပ်စွဲထားသော စစ်ကောင်စီတပ်သားများအား တိုက်ခိုက်နေစဥ်ခလရ(၂၅၉)နှင့် တပ်မ(၁၀၁)တို့ တပ်ကူများရောက်ရှိလာရာ တော်လှန်ရေးရဲဘော်များ ပြန် လည်ဆုတ်ခွာခဲ့ရကြောင်း ပခုက္ကူ ပ.က.ဖ တပ် ရင်း (၁)က အသိပေးသည်။

ဇွန်လ၁ရက်​နေ့တွင်ပခုက္ကူအခြေစိုက်တပ်မ(၁၀၁)မှ ထွက်လာသော စစ်ကောင်စီတပ်ယာဥ်တန်းနှင့် ခြေလျင်စစ်ကြောင်းတစ်ခုသည် မြိုင်မြို့နယ်နှင့် ပေါက်မြို့နယ်များဘက်သို့ ဦးတည်ထွက်ခွာလာခြင်းကြောင့် စစ်ကြောင်းထွက်ခွာရာလမ်းပိုင်းတလျောက်မှ ပြည်သူများအနေဖြင့် သတိပြုသွားလာနေထိုင်ကြရန် တော်လှန် ရေးတပ်ဖွဲ့များက အသိပေးနှိုးဆော်ထားသည်။