ဇွန်-၂၊၂၀၂၅။ကဖေး/People’s Spring
ကချင်ပြည်နယ်၊မြစ်ကြီးနားမြို့တွင်ဧရာဝတီမြစ်ရေစိုးရိမ်ရေမှတ်အထက်သို့မြင့်တက်လာပြီး ယခင်ရက်ကထက် ပိုနောက်ကျိနေသော ရေများ မြို့ပေါ်ရပ်ကွက်များသို့ စီးဝင်နေသည်။
ယနေ့(ဇွန်လ၂ရက်) နံနက် ၆နာရီတိုင်းတာချက်အရ ရေမှတ် ၁၂၀၅ စင်တီမီတာသို့ ရောက်ရှိလာခြင်းဖြစ်သည်။မြစ်ကြီးနားမြို့၏စိုးရိမ်ရေမှတ်သည် ၁၂၀၀ စင်တီမီတာ(၃၉ပေခန့်)ဖြစ်သည်။
“ရေတွေက အနည်တွေပိုများပြီးပိုပျစ်လာတယ်။ အထက်ဘက်မှာ တောင်ကျရေတွေပိုပြီး ပိုဆင်းလာတဲ့အခြေအနေရှိတယ်။ ဒါဆိုရင် ရေဘေးကထင်တာထက်ဆိုးသွားနိုင်တယ်”ဟုမြစ်ကြီးနားမြို့ခံတစ်ဦးကပြောသည်။
Public Service Announcement
လက်ရှိအခြေအနေသည် မြစ်ကြီးနားမြို့ပေါ်ရှိ မနောကွင်းအထိရေတက်နေပြီးကြက်ပေါင်ခြံ စီတာပူ၊ လယ်ကုန်နှင့်ရမ်ပူရပ်ကွက်သည် ကျန်ရပ်ကွက်များထက်ရေများနေသည်ဟု သတင်းရရှိသည်။ မိုးလည်းမတိတ်သေးဘဲ ဆက်ရွာနေသည်။
“မြစ်ရေ ရေ ၁ ပေတိုးတိုင်း ရပ်ကွက်ထဲ ရေ ၂ပေ မြင့်ပါတယ်။ ချောင်းရေတွေကတဆင့်ပါရေတွေက တိုးနေတာမို့လို့။ တော်တော်ကို အကျပ်တွေ့နေပါတယ်။ရှာဖွေကယ်ဆယ်ရေးတွေကိုထင်သာမြင်သာရှိအောင်ပြင်ဆင်ထားဖို့လိုပါတယ်”ဟုမြစ်ကြီးနားမြို့ခံတစ်ဦးကပြောသည်။
ဧရာဝတီမြစ်ဖျားပိုင်းဒေသများဖြစ်သည်မေခ၊မလိခ မြစ်ဆုံရာဒေသများ၊ ပူတာအိုခရိုင်အတွင်းမြို့နယ်များ၊တရုတ်နှင့်ထိစပ်နေသော ပန်ဝါ၊ဆော့လော်မြို့တို့အပါအဝင်ကချင်လွတ်လပ်ရေးတပ်မတော်(KIA)ထိန်းချုပ်ထားသော မြို့နယ်များတွင် မေလ ၂၅ရက်မှ စ၍ မိုးရွာခဲ့ပြီးနောက် ဧရာဝတီမြစ်ရေတိုးလာခြင်းဖြစ်သည်
ကချင်ပြည်နယ်အတွင်း ချီဖွေ၊ဆွမ်ပရာဘွမ်၊ ဆော့လော်၊ ပန်ဝါ၊ ပူတာအိုမြို့တို့တွင် ရေကြီးပြီး စစ်ဘေးရှောင်စခန်းများနှင့် နေအိမ်ပျက်စီးမှုများရှိနေသည်။ပျက်စီးသွားသည့်စစ်ဘေးရှောင်စခန်းများတွင် အရေးပေါ်အကူအညီများလိုအပ်နေသည်ဟု အရပ်ဖက်အဖွဲ့အစည်းများကပြောသည်။
ပူတာအို-ဆွမ်ပရာဘွမ်လမ်း၊ ဝိုင်း မော်-ချီဖွေလမ်းပိုင်း၌လည်းတောင်ကျရေကြောင့်ကားလမ်းများပျက်စီးပြီးခရီးသွားများရေဘေးကြုံနေကြသည်။
