ဇွန် – ၅ ၊၂၀၂၅ ၊ ဆိုင်းမင်း/People’s Spring
ငလျင်သင့်ဒေသတွေမှာ စစ်ကောင်စီက စာသင်ကျောင်းတွေ ပြန်လည်ဖွင့်လှစ်ရာ စာသင်ဆောင်တွေ မလုံလောက်လို့ ကျောင်းသူ၊ ကျောင်းသားတွေ နှစ်သုတ်ခွဲပြီး ကျောင်းတက်နေရပါတယ်။
ငလျင်ကြောင့် ထိခိုက် ၊ပြိုကျ ပျက်စီးသွားတဲ့ကျောင်းဆောင်တွေကိုပြန်လည်ပြုပြု တည်ဆောက်မှု မပြီးစီးသေးခင် ပြီးခဲ့တဲ့ တနင်္လာ (ဇွန်လ ၂ ) ရက်မှာ စစ်ကောင်စီက ၂၀၂၅ -၂၀၂၆ စာသင်နှစ် ကို စတင်စေခဲ့တာပါ။
စစ်ကိုင်း ၊ မန္တလေး နဲ့ နေပြည်တော်တို့မှာ စာသင်ကျောင်းတွေ ငလျင်ကြောင့် ထိခိုက်ပျက်စီးသွားခဲ့ပေမယ့် ပြန်လည်တည်ဆောက်ရေး မစတင်နိုင်ခင်မှာ ပဲ ကျောင်းတွေကို စစ်ကောင်စီက အလျှင်အမြန်ဖွင့်စေတာလည်းဖြစ်ပါတယ်။
Public Service Announcement
ငလျင်ကြောင့် ထိခိုက်ပျက်စီးမှု များပြားတဲ့ စစ်ကိုင်းမြို့မှာဆိုရင် ယာယီကျောင်းဆောင်အချို့ ကို စစ်ကောင်စီပညာရေးဝန်ကြီးက ဆောက်လုပ်တာရှိပေမယ့် စာသင်ဆောင်တွေ မလုံလောက်ဘူးလို့မြို့ခံ ကျောင်းသားမိဘတွေဆီကသိရပါတယ်။
ဒါကြောင့် မူလတန်းကနေ လေးတန်းအထိကို မနက်ပိုင်း ၊ ငါးတန်းကနေ တက္ကသိုလ်ဝင်တန်း တွေကိုတော့ ညနေပိုင်း အချိန်တွေ ခွဲပြီး သင်စေတာပါ။
စစ်ကိုင်းမြို့ပေါ် က အထက်တန်းကျောင်း ၃ ကျောင်းလုံး ငလျင်ကြောင့် ထိခိုက်ပျက်စီးခဲ့ရပါတယ်။
ကျောင်းသူ၊ ကျောင်းသားတွေဟာ ငလျင်ဒဏ်သင့်ခဲ့တဲ့ ကျောင်းဆောင်တွေမှာ ကျောက်တက်နေရတာကို မိဘတွေက စိုးရိမ်ပူပန်နေကြပါတယ်။
“နောက်ဆက်တွဲ ငလျင်တွေလည်း ခဏခဏလှုပ်တော့ ကိုယ့်ကလေး ကျောင်းလွှတ်ရတာ ဘုရား တသတသသ ဖြစ်နေတာပေါ့ ” လို့ စစ်ကိုင်းမြို့ က ကျောင်းသားမိဘတစ်ဦးက ပြောပါတယ်။
စစ်ကိုင်းနဲ့ နေပြည်တော်တို့မှာ စစ်ကောင်စီက အမြန်ဆောက်လုပ်လို့ရတဲ့ သံဖရိန် ၊ အုတ်ကာ ၊သွပ်မိုး တစ်ထပ် ယာယီ ကျောင်းဆောင်တွေကို ပြီးခဲ့တဲ့ ဧပြီလကုန်ပိုင်းက စတင်တည်ဆောက်စေခဲ့ပါတယ်။
ဒါပေမယ့်လည်း စာသင်ခန်းအရေအတွက် လိုအပ်ချက် ကြီးမားနေဆဲဖြစ်တာကြောင့် မနက်တစ်သုတ် ၊ ညနေတစ်သုတ်ခွဲပြီး သင်ကြားနေရတယ််လို့ နေပြည်တော်က ပညာရေးဝန်ထမ်းအချို့က ပြောပါတယ်။
ပြီးခဲ့တဲ့ မတ်လ ၂၈ ရက်က စစ်ကိုင်းမြို့ အနီး ဗဟိုပြု လှုပ်ခတ်ခဲ့တဲ့ ငလျင်ကြီးကြောင့် စစ်ကိုင်း ၊ မန္တလေး ၊ နေပြည်တော်အပါအဝင် နိုင်ငံတဝှမ်းက စာသင်ကျောင်းပေါင်း ၂,၀၀၀ ခန့် ထိခိုက် ပျက်စီးခဲ့ရတယ်လို့ ကုလသမဂ္ဂလူသားချင်းစာနာမှု ညှိနှိုင်းရေးရုံး (UNOCHA) ကထုတ်ပြန်ထားပါတယ်။
ဒါအပြင် စာသင်ကျောင်းတွေကို ငလျင်ဒဏ်သင့် မိသားစုတွေအတွက် ယာယီခိုလှုံရာနေရာတွေအဖြစ်အသုံးပြုခဲ့ရတယ်လို့လည်း UNOCHA က ဆိုပါတယ်။
စစ်ကောင်စီရဲ့ အုပ်ချုပ်ရေး လည်ပတ်နိုင်တဲ့ဒေသတွေကစာသင်ကျောင်း တွေကို ပြန်လည်ဖွင့်လှစ်သင်ကြားစေပေမယ့် တဖက်မှာတော့တော်လှန် ရေးအင်အားစုတွေ စိုးမိုးရာ နယ်မြေတွေ က ကျောင်းတွေကိုတော့ စစ်ကောင်စီလေတပ်က ဗုံးကြဲတိုက်ခိုက်တာတွေရှိခဲ့ပါတယ်။
ပြီးခဲ့တဲ့ မေလ ၁၂ ရက်က ဒီပဲယင်းမြို့နယ် ၊ အိုးတိန်တွင်းကျေးရွာ စာသင်ကျောင်း ဗုံးကြဲခံရမှုမှာ ဆိုရင် ဆရာမ ၂ ဦး ၊ ကျောင်းသူ ၊ကျောင်းသား ၂၂ ဦး စုစုပေါင်း ၂၄ ဦးသေဆုံးပြီး ဒဏ်ရာရသူ လည်း ၁၀၀ ကျော်ရှိခဲ့ပါတယ်။
စစ်ကောင်စီလေတပ်ရဲ့ ပစ်မှတ်ထား တိုက်ခိုက်မှုတွေကြောင့် မြေပြင်မှာ လက်ရှိ ဖွင့်လှစ်ထားတဲ့ ကြားကာလ ပညာရေး ကျောင်းအားလုံး ယာယီ ပိတ်ထားကြဖို့ အမျိုးသားညီညွတ်ရေးအစိုးရ (NUG) ရဲ့ ပညာရေးဝန်ကြီးဌာနက မေလ ၂၅ ရက်မှာ ညွှန်ကြားချက်ထုတ်ပြန်ခဲ့ရပါတယ်။
