ဇွန် – ၂၇ ၊၂၀၂၅ ၊ဆိုင်းမင်း/People’s Spring
အာဏာသိမ်း စစ်ကောင်စီက ဖမ်းဆီးထောင်ချထားတဲ့ မန္တလေးတိုင်း လွှတ်တော် ဥက္ကဋ္ဌ ဦးအောင်ကျော်ဦးဟာ ဒီနေ့ (ဇွန်လ ၂၇ ရက်) မနက် ၉ နာရီဝန်းကျင်မှာ အိုးဘိုထောင် ထောင်ဆေးရုံမှာ ဆုံးပါးသွားတယ်လို့ အမျိုးသားဒီမိုကရေစီအဖွဲ့ချုပ်(NLD) ပါတီနဲ့ နီးစပ်သူတွေထံကသိရပါတယ်။
ရုတ်တရက် အမောဖောက်လာပြီး မနက် ၇ နာရီခန့်မှာ ထောင်ဆေးရုံကို ပို့ရာမှာ နာရီပိုင်းအကြာမှာပဲ ဆုံးပါးသွားတာပါ။
“ဆရာက ရောဂါထွေထူးမရှိဘူး ၊ကျန်းမာရေးကောင်းတယ်လို့ပြောရမယ်၊ အခုက ရုတ်တရက်ကြီးဆုံးသွားတာ၊ ဆရာက လွတ်ရက်ကလည်းနီးနေပြီ “လို့ မိသားစုနဲ့ နီးစပ်သူတစ်ဦးကပြောပါတယ်။
Public Service Announcement
လက်ရှိမှာ မန္တလေးဆေးရုံကြီးရင်ခွဲရုံကို ပို့ဆောင်ထားပြီး မိသားစုက ရုပ်အလောင်းသယ်ခွင့်ရမရကို မသိရသေးဘူးလို့ ဆိုပါတယ်။
အာဏာသိမ်းတဲ့ ရက်မှာပဲ မန္တလေးတိုင်းလွှတ်တော်ဥက္ကဋ္ဌ ဦးအောင်ကျော်ဦးကို စစ်ကောင်စီက ဖမ်းဆီးခဲ့တာပါ။
အဲဒီနောက် နိုင်ငံဆူပူအောင်လှုံ့ဆော်မှု ရာဇသတ်ကြီးပုဒ်မ ၅၀၅(က) နဲ့ထောင်ဒဏ် ၃ နှစ် ၊ ကိုဗစ်စည်းကမ်း ချိုးဖောက်တယ်ဆိုပြီး သဘာဝဘေးပုဒ်မ ၂၅ နဲ့ ထောင်ဒဏ် ၂ နှစ် စုစုပေါင်း ၅ နှစ်ချခဲ့တာပါ။
ဦးအောင်ကျော်ဦးဟာ၂၀၁၅ အထွေထွေရွေးကောက်ပွဲမှာ NLD ပါတီကို ကိုယ်စားပြုပြီး မန္တလေးတိုင်း၊ ပုသိမ်ကြီးမြို့နယ် တိုင်းလွှတ်တော်ကိုယ်စားလှယ်အဖြစ် အနိုင်ရခဲ့ပြီး မန္တလေးတိုင်းလွှတ်တော်ဥက္ကဋ္ဌ အဖြစ် တင်မြှောက်ခံရပါတယ်။
၂၀၂၀ အထွေထွေ ရွေးကောက်ပွဲမှာလည်း ထပ်မံအနိုင်ရသူပါ ။
သူဟာ တရားလွှတ်တော်ရှေ့နေတစ်ဦးလည်းဖြစ်သလို ဆုံးပါးချိန်မှာ အသက် ၆၉နှစ်ရှိပါပြီ။
ပြီးခဲ့တဲ့နှစ် အောက်တိုဘာလ ၇ ရက်ကလည်း NLD ပါတီ ဒုတိယဥက္ကဋ္ဌလည်းဖြစ် ၊ မန္တလေးတိုင်းဝန်ကြီးချုပ်လည်းဖြစ်သူ ထောင်ဒဏ်နှစ်ရှည်ချခံရတဲ့ ကင်ဆာဝေဒနာသည် ဒေါက်တာဇော်မြင့်မောင်လည်းထောင်တွင်းမှာ ကျန်းမာရေးဆိုးရွားပြီး ကွယ်လွန်ခဲ့ရပါတယ်။
အာဏာသိမ်းစစ်ကောင်စီလက်အောက်ခံ အကျဉ်းထောင်တွေမှာ ကျန်းမာရေးစောင့်ရှောက်မှု လုံလုံလောက်လောက်မပေးတဲ့အတွက် မလိုအပ်ဘဲ အသက်ဆုံးရှုံးရမှုတွေ ရှိနေပါတယ်။
