“မင်းတို့စစ်ဖိနပ်အောက်မှာငါဘယ်တော့မှဒူးထောက်မှာမဟုတ်ဘူးကွ”စာသားနဲ့စစ်ကိုင်းမှာ ဆန္ဒပြ

ဇွန်-၂၈၊၂၀၂၅။ သုည/People’s Spring

စစ်ကိုင်းတိုင်းအတွင်းသပိတ်အဖွဲ့တွေ၊ဒေသခံပြည်သူတွေက ဒီကနေ့ (ဇွန်လ ၂၈)မှာ “မင်းတို့စစ်ဖိနပ်အောက်မှာငါဘယ်တော့မှဒူးထောက်မှာမဟုတ်ဘူးကွ”စာသားနဲ့ စစ်အာဏာရှင်ဆန့်ကျင်ရေးဆန္ဒပြတဲ့သပိတ်လှုပ်ရှားမှုတွေပြုလုပ်ခဲ့ကြပါတယ်။

ယင်းမာပင်မြို့နယ်မှာ နောက်ပြန်မလှည့်ကြေးဒီတော်လှန်ရေးသပိတ်က ဒီမိုကရေစီအရေးတိုက်ပွဲဝင်ရင်း စစ်အာဏာရှင်တွေရဲ့ ကြိုးပေးကွပ်မျက်ခြင်းခံခဲ့ရတဲ့ ချင်းအမျိုးသားကျောင်းသားခေါင်းဆောင် ဆလိုင်းတင်မောင်ဦးရဲ့ နောက်ဆုံးအချိန် ကြိုးစင်ပေါ်ကရဲရဲတောက်ပြောကြားခဲ့တဲ့ “မင်းတို့စစ်ဖိနပ်အောက်မှာ ငါ ဘယ်တော့မှ ဒူးထောက်မှာမဟုတ်ဘူးကွ” အဆိုအမိန့်ကို ကိုင်စွဲပြီး ဆန္ဒပြခဲ့ပါတယ်။

ယင်းမာပင်မြို့နယ် ကျေးရွာတစ်ရွာမှာလည်း ရွာပေါင်းစုံသပိတ်စစ်ကြောင်းဟာအကြမ်းဖက် စစ်တပ်ရဲ့ ပစ်ခတ်ဖြိုခွင်းရာမှာ ကျဆုံးခဲ့သော ရဲဘော်ဖိုးချမ်းကျဆုံးခြင်း၄နှစ်၃လပြည့်အဖြစ်အလေးပြုခြင်း အခမ်းအနားကို ပြုလုပ်ခဲ့ကြပါတယ်။

Public Service Announcement

ဆားလင်းကြီးမြို့နယ်မှာလည်း လက်ပံတောင်းတောင်ဒေသ သပိတ်အင်အားစုက ဦးဆောင်ပြီး “မင်းတို့စစ်ဖိနပ်အောက်မှာ ငါ ဘယ်တော့မှ ဒူးထောက်မှာမဟုတ်ဘူးကွ” ဆိုတဲ့ ကျောင်းသားခေါင်းဆောင် ဆလိုင်းတင်မောင်ဦးရဲ့ အဆိုအမိန့်ကို ကိုင်ဆောင်ကာ ချီတက်ဆန္ဒပြခဲ့ပါတယ်။

ဒါ့အပြင်ဖက်ဒရယ်ဒီမိုကရေစီ ပြည်ထောင်စုပေါ်ထွန်းရေး၊ တရားမဝင်အတုအယောင်ရွေးကောက်ပွဲ အလိုမရှိ၊ စစ်အာဏာရှင်စနစ် ကျရှုံးရေး ကြွေးကြော်သံတွေနဲ့ သပိတ်လှုပ်ရှားမှုကို ပြုလုပ်ခဲ့ကြပါတယ်။

စစ်ကိုင်းတိုင်းမှာတော်လှန်ပြည်သူတွေကနယ်မြေမငြိမ်သက်မှုကြားထဲကနေ အကြမ်းဖက်စစ်အာဏာရှင်ဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေပါတယ်။

ဓာတ်ပုံ – စစ်ကိုင်းဒေသသပိတ်အင်အားစု၊ ရွာပေါင်းစုံသပိတ်၊ လက်ပံတောင်းသပိတ်