ဇူလိုင် – ၂ ၊၂၀၂၅ ၊ဆိုင်းမင်း/People’s Spring
မန္တလေးမြို့ ၊ အမရပူရမြို့နယ် ၊ ရန်ကုန် – မန္တလေးအမြန်လမ်းဘေးမှာ သေဆုံးနေတဲ့ အမျိုးသားရုပ်အလောင်းကို မနေ့ ( ဇူလိုင် ၁ ရက်) မနက်ပိုင်းကတွေ့ခဲ့ရတယ်လို့လူမှုကူညီရေးအသင်းထံကသိရပါတယ်။
မနေ့ မနက်ပိုင်း ၁၁ နာရီ ၁၅ မိနစ်ခန့်က ရန်ကုန် – မန္တလေး အမြန်လမ်းမိုင်တိုင် ၃၆၃ မိုင် ၊ ၆ ဖာလုံ အနီး ၊ ချောင်းဘေးမှာ ပက်လက်အနေအထားနဲ့သေဆုံးနေတဲ့ အသက် ၃၇ နှစ်အရွယ် အမျိုးသားရုပ်အလောင်းကိုတွေ့ခဲ့တာပါ။
အလောင်းမှာ ပြင်ပဒဏ်ရာမတွေ့ရဘူးလို့ ကနဦးသိထားရပြီးသေဆုံးရတဲ့အကြောင်းရင်းကိုတော့မသိရသေးပါဘူး။
Public Service Announcement
ဇူလိုင်လ ၃၀ ရက် နေ့ခင်းပိုင်း ၂ နာရီခွဲခန့်ကလည်း အမရမြို့နယ် ၊ စွယ်တော်ဘုရားအနီးမှာ အသက် ၂၈ နှစ်အရွယ် အမျိုးသား တစ်ဦး လမ်းဘေးမှာ လဲကျနေလို့ လူမှုကူညီရေးအသင်းက ဆေးရုံပို့ပေးပေမယ့် ဆုံးပါးသွားတယ်လို့သိရပါတယ်။
” အဟာရပြတ်ပြီးသေဆုံးသွားတာ၊သူ့ကို ဆေးရုံမှာလိုအပ်တာ ကူညီလုပ်ဆောင်ပေးခဲ့ပါတယ် ၊အခုထိတော့ လူနာရှင်မပေါ်သေးဘူးဗျ”လို့ ကူညီကယ်ဆယ်ရေးမှာပါဝင်သူတစ်ဦးကပြောပါတယ်။
အဲဒီအမျိုးသားဟာ ဆေးရုံရောက်ပြီး နောက်ရက် ဇူလိုင် ၁ ရက် ည ၉ နာရီ ၄၀ မိနစ်သေဆုံးသွားတာလို့သိရပါတယ်။ ဒေသခံအချို့ ရဲ့ပြောပြချက်အရတော့ သူဟာ အိမ်ခြေရာမဲ့တစ်ဦးလို့သိရပါတယ်။
စစ်တပ်အာဏာသိမ်းပြီးနောက် မန္တလေးမြို့မှာ လမ်းဘေးမှာ အာဟာရပြတ်လပ်သေဆုံးတဲ့ရုပ်အလောင်းတွေ ၊ ဓားဒဏ်ရာ ၊ ရိုက်နှက်ညှင်းပန်းထားတဲ့ ဒဏ်ရာဒဏ်ချက်တွေ နဲ့စွန့်ပစ်ထားတဲ့ ရုပ်အလောင်းတွေကိုဒေသခံတွေ မကြာခဏ တွေ့လာရပါတယ်။
