ဇူလိုင်-၄၊ ၂၀၂၅။ အိမ်သွင်/People’s Spring
ရှမ်းပြည်နယ်မြောက်ပိုင်း သီပေါမြို့ကို စစ်ကောင်စီက ယနေ့ည ၁၀နာရီကျော်တွင် လေကြောင်းမှ ဗုံးကြဲသွားသည်။
ည ၁၀နာရီ ၅မိနစ်နှင့် ၁၀နာရီ ၉မိနစ်တို့တွင် ဂျက်ဖိုက်တာဖြင့် ဗုံးကြဲခြင်းဖြစ်ပြီး မြို့ပေါ်မှနေအိမ်များ တုန်ခါသွားသည်ဟု ဒေသခံတစ်ဦးက ပြောသည်။
ထိခိုက်ပျက်စီးမှုအခြေအနေကို မသိနိုင်သေးဟုဆိုသည်။
Public Service Announcement
စစ်ကောင်စီတပ်က သီပေါမြို့ကို ဂျက်ဖိုက်တာဖြင့် ဗုံးများလာရောက်ကြဲချတိုက်ခိုက်ကြောင်း တအာင်းတပ်မတော် TNLA ကလည်း ယနေ့ ညပိုင်း ထုတ်ပြန်သည်။
တအာင်းပြည်၊ တပ်မဟာ (၂)နယ်မြေ၊ သီပေါမြို့တွင် စစ်ကောင်စီတပ်မှ ဂျက်ဖိုက်တာဖြင့် ယနေ့ ည ၁၀ နာရီကျော်အချိန်တွင် ဗုံးများလာရောက်ကြဲချပစ်ခတ်တိုက်ခိုက်ခဲ့ကြောင်း ဖော်ပြသည်။
ဗုံးကြဲတိုက်ခိုက်မှုနှင့်ပတ်သက်၍ ဖြစ်စဉ်အသေးစိတ်အချက်အလက်များကို ဆက်လက်ရေးသားဖော်ပြသွားမည်ဟု PSLF/TNLAသတင်းနှင့်ပြန်ကြားရေးဌာနက အသိပေးသည်။
စစ်ကောင်စီတပ်သည် TNLA ထိန်းချုပ်ထားသည့် သီပေါမြို့၊ ကျောက်မဲမြို့တို့ကို ယခုရက်ပိုင်း ဗုံးကြဲတိုက်ခိုက်နေသည်။
နောင်ချိုမြို့နယ်တွင်လည်း စစ်ကောင်စီနှင့် TNLA ပူးပေါင်းတပ်များ တိုက်ပွဲပြင်းထန်နေသည်။
