ဇူလိုင်-၉၊၂၀၂၅။သတိုး/People’s Spring
ပဲခူးတိုင်း တောင်ငူမြို့ရှိ စစ်ကောင်စီ၏ လေတပ်စခန်းကို ရှော့တိုက်ဒုန်းများဖြင့် ပစ်ခတ်ခဲ့ရာ စစ်ကောင်စီဘက်မှပြန်လည်ပစ်ခတ်မှုများကြောင့် စစ်ဆင်ရေးကို နှစ်ကြိမ်ခွဲ၍ ပြုလုပ်ခဲ့ကြောင်း Brave Warriors For Myanmar(BWM) တာဝန်ရှိသူကပြောသည်။
“၁၂လုံးကိုပထမအကြိမ်မှာပြီးအောင်မပစ်နိုင်ခဲ့ပါဘူး။စစ်ကောင်စီဘက်ကငါးကြင်းမီးစက်သေနတ်နဲ့တောက်လျှောက်ပစ်နေလို့။ဒုတိယအကြိမ်သွားပစ်ခဲ့ရတာပါ”ဟု၎င်းကပြောသည်။
ဇူလိုင်၈ရက်နံနက်၄နာရီခွဲတွင်BWM၏ဦးဆောင်မှုဖြင့် Mountain Knight Civilian Defense Forces(MKCDF)၊ Anti-Coup People’s Liberation Force(ACPLF)၊သံတောင်မြောက်ပိုင်း အထူးဒေသအဖွဲ့တို့သည် KNLA တပ်မဟာ ၂ ၊တပ်ရင်း ၅ နှင့် ပူးပေါင်း၍ တောင်ငူလေတပ်စခန်းကို ရှော့တိုက်ဒုန်းများဖြင့်ပစ်ခတ်ခဲ့ရာရှော့တိုက်ဒုန်းလေးလုံးပစ်ခတ်ပြီးချိန်၌ စစ်ကောင်စီဘက်မှ ပြန်လည်ပစ်ခတ်မှုများကြောင့် ပြန်လည်ဆုတ်ခွာခဲ့ရပြီးယင်းနေ့ည ၁၂ နာရီခန့်တွင် ရှော့တိုက်ဒုန်း ရှစ်လုံးထပ်မံပစ်ခတ်ခဲ့ရာ၇လုံးအောင်မြင်ခဲ့ကြောင်းယင်းအဖွဲ့ကထုတ်ပြန်ထားသည်။
Public Service Announcement
“သွားပြန်ပစ်တော့လည်းသူတို့ကလက်နက်ကြီးနဲ့တောက်လျှောက် လှမ်းထုနေတာ။အဲ့ကြားထဲက ချိန်လိုက် ဝပ်လိုက်နဲ့ ရအောင်ပြန်ပစ်ခဲ့ရတာပါ။အလုံးတွေအားလုံးလေတပ်ဝန်းထဲကျတယ်လို့သိရတယ်။ပစ်မှတ်တစ်ခုတည်းကိုတနေ့တည်း ၂ ကြိမ်ပစ်ရတာမို့ အန္တရာယ်ကော အခက်အခဲကောအတော်များပါတယ်” ဟုအထက်ပါတာဝန်ရှိသူကပြောသည်။
တောင်ငူလေတပ်စခန်းဌာနချုပ်သည်ကရင်ပြည်နယ်၊ ကရင်နီ ၊ ရှမ်းပြည်နယ်တောင် ပိုင်းရှိ တော်လှန်ရေးအဖွဲ့များ ၊စစ်ရှောင်ပြည်သူများကို ဗုံးကြဲတိုက်ခိုက်နေသည့် လေယာဉ်များထားရှိခြင်းဖြစ်သောကြောင်းBWM ၏ Mission 42အနေဖြင့်တိုက်ခိုက်ခဲ့ခြင်းဖြစ်သည်ဟုဆိုသည်။
ပစ်ခတ်လိုက်သည့် ရှော့တိုက်ဒုန်းများတောင်ငူလေတပ်စခန်းအတွင်းသို့ကျရောက်ကာ ပေါက်ကွဲသံများကြားရကြောင်း ဒေသခံများကဆိုသည်။
BWM အနေဖြင့် မဟာမိတ်အဖွဲ့များဖြင့် ပူးပေါင်း၍ တောင်ငူလေတပ်စခန်းကိုဇန်နဝါရီ ၄ရက်၊ ဧပြီ ၃၀ ရက်နှင့် မေလ ၁၈ ရက်တွင်လည်း တိုက်ခိုက်ခဲ့သည်။
