ဇူလိုင်-၁၀၊၂၀၂၅။ရှိန်း/People’s Spring
ချင်းပြည်နယ်မှာမူးယစ်ဆေးဝါးတွေသယ်လာတဲ့ကား ၂ စီးနဲ့ ရဲဘော်တွေဖမ်းဆီးရမိတဲ့ဖြစ်စဥ်မှာ မူးယစ်ဆေးဝါးတွေသယ်တာဟာ ရဲဘော်တွေရဲ့လုပ်ရပ်သာဖြစ်ပြီး တပ်ရင်းနဲ့ မဆိုင်ဘူးလို့ ယင်းမာပင်ခရိုင်တပ်ရင်း ၁၅က ထုတ်ပြန်ငြင်းဆိုပါတယ်။
မူးယစ်ဆေးတွေသယ်လာတဲ့ ကားနှစ်စီးကို ယင်းမာပင်ခရိုင်တပ်ရင်း ၁၄ က ကိုဇော်နောင်၊ရွှေကြက်သွန်ရွာက ကျေးရွာပကဖ အဖွဲ့ဝင်၊CBE29(YSO)ရဲ့ ကျောင်းအုပ် ကိုအာကာဖြိုး ၊ယာဥ်မောင်းကိုကျော်ဟိန်း၊ယာဥ်နောက်လိုက်ကိုဝေမိုးအောင်တို့ ကိုဟားခါးမြို့နယ်အတွင်းဇူလိုင် ၉ ရက်မှာ ဖမ်းဆီးမိခဲ့တယ်လို့ Chinland Defense Force-Hakha(CDF-ဟားခါး)ကဇူလိုင် ၁၀ ရက်မှာထုတ်ပြန်ထားပါတယ်။
ဒီကိစ္စနဲ့ ပတ်သက်ပြီး ယင်းမာပင်ခရိုင်တပ်ရင်း ၁၅က တပ်ရင်းမှူး လက်မှတ်နဲ့ ရဲဘော်၄ ယောက်၊သေနတ် ၂ လက်၊ကား၂စီးနဲ့ ဖောက်ခွဲရေး ယမ်းပစ္စည်းများသယ်ယူရန် ထောက်ခံစာ ပေးအပ်ခဲ့သည်မှာ မှန်ကန်ပြီး မူးယစ် ဆေး သယ်ဆောင်ခဲ့တာဟာ ရဲဘော်များရဲ့ ပုဂ္ဂလိက လုပ်ရပ်သာဖြစ်ပြီး တပ်ရင်းနဲ့ မပတ်သက် ကြောင်း ဒီနေ့(ဇူလိုင် ၁၀ ) ညနေပိုင်းမှာ တပ်ရင်း ၁၅ က ထုတ်ပြန်လာတာဖြစ်ပါတယ်။ဒါအပြင်တပ်ရင်း (၁၅)ကရဲဘော်မောင်ဇော်လတ်ကိုဖောက်ခွဲရေးပစ္စည်းတွေသွားသယ်ဖို့အတွက် ရေးပေးထားတယ်ဆိုတဲ့ထောက်ခံစာဆိုတဲ့ စာရွက် ၁ ရွက်ကိုလည်း ဖော်ပြထားပါသေးတယ် ။
Public Service Announcement
ယခုဖြစ်စဉ်ကိုလည်းတပ်ရင်းကစုံစမ်းနေပြီး လွတ်မြောက်နေသော ရဲဘော်ကို ဇော်လတ်၊ကိုပုတီး တို့ကိုလည်းဖမ်းဆီးအရေးယူသွားမယ်လို့ဆိုပါတယ်။အခုကိစ္စနဲ့ပတ်သက်ပြီးတော့ အမျိုးသားညီညွတ်ရေးအစိုးရ ၊ကာကွယ်ရေးဝန်ကြီးဌာနရဲ့ စစ် ဆေးမှုကိုလည်းခံယူသွားမယ်လို့ဆိုပါတယ်။
အမျိုးသားညီညွတ်ရေးအစိုးရ(NUG)၊ကာကွယ်ရေးဝန်ကြီးဌာန(MOD) ပြောရေးဆိုခွင့်ရှိသူ ဒုအတွင်းဝန်ဦးမောင်မောင်ဆွေက “ယင်းမာပင်တပ်ရင်း(၁၄/၁၅)များကိစ္စကို စစ်ဆေးဆောင်ရွက်နေပါတယ်။ ပြီးရင် ထုတ်ပြန်ပေးပါ့မယ်”လို့ ဇူလိုင် ၁၀ ရက် နေ့ခင်းပိုင်းကပြောပါတယ်။
NUG ကမထုတ်ပြန်သေးခင် ယင်းမာပင်ခရိုင်တပ်ရင်း (၁၅)က အခုလိုထုတ်ပြန်ငြင်းဆိုခဲ့တာဖြစ်ပါတယ်။
ကား တွေနဲ့အတူဖမ်းမိခဲ့တဲ့ ကားသမားကို ကျော်ဟိန်းကတော့ ဒီမူးယစ်ဆေးတွေကိုဆားလင်းကြီး မြို့နယ်၊ငွေသာကျေးရွာအနီး တပ်ရင်း ၁၅ ရဲ့ နေရာကနေ တင်လာခဲ့တာလို့ CDF ဟားခါးကရဲဘော်တွေရဲ့မေးမြန်းမှုကိုဖြေကြားထားပါတယ်။
ဒါအပြင် ယင်းမာပင်ခရိုင်တပ်ရင်း(၁၄)မှ ကိုဇော်နောင်ဆိုတဲ့ ရဲဘော်ကတော့ တပ်ခွဲမှူး ကိုပုတီးနေထိုင်တဲ့နေရာကနေသယ်လာတာဖြစ် ပြီးလေးခေါက်မြောက် လို့ပြောဆိုခဲ့ပါတယ်။
