ဇူလိုင်-၁၁၊၂၀၂၅။ရဲခေါင်/People’s Spring
မွန်ပြည်နယ်၊ ရေးမြို့နယ်ရှိ စစ်ကောင်စီတပ်၏ ကင်းပုန်းစခန်းအားဝင်ရောက်တိုက်ခိုက်ရာ စစ်သားများသေဆုံးမှုရှိကြောင်း မွန်ပြည်တော်လှန်ရေးတပ်(MSRF)က ယနေ့(ဇူလိုင်၁၁ရက်) ထုတ်ပြန်သည်။
ရေးမြို့မြောက်ပိုင်းတွင်ရှိသော မော့ကနင်ကျေးရွာမှ စစ်ကောင်စီ၏ ကွမ်ကျိုက်တပ်စခန်းအနီးရှိ ကင်းပုန်းစခန်းကို ယနေ့ နံနက် ၉ နာရီခွဲခန့်က တိုက်ခိုက်ခဲ့ခြင်းဟု ဆိုသည်။
“ကွမ်ကျိုက်စခန်းမှာက စကစ အင်အား ၃၀ရှိတယ်။ကင်းပုန်းစခန်းမှာက ၁၅ ယောက်ရှိတယ်။ပြောက်ကျားစစ်ဆင်ရေးလုပ်ခဲ့တာ”ဟု MSRF တာဝန်ရှိသူက တိုက်ခိုက်ခဲ့မှုကို ရှင်းပြသည်။
Public Service Announcement
တိုက်ခိုက်မှုကြောင့် စစ်ကောင်စီတပ်မှ သုံးဦးသေဆုံးပြီး နှစ်ဦးထိခိုက်ဒဏ်ရာရရှိကာ တော်လှန်ရေးပူးပေါင်းတပ်ဖွဲ့ဝင်များမှ ထိခိုက်မှုမရှိခဲ့ကြောင်း အသိပေးသည်။
မွန်ပြည်တော်လှန်ရေးတပ်(MSRF)၊ ရေးပြည်သူ့ကာကွယ်ရေးတပ်ဖွဲ့ (YPDF)နှင့် KNLAတပ်ရင်း(၂၇) တပ်ခွဲ(၁) တို့ပူး ပေါင်းခဲ့ကြောင်း ဖော်ပြသည်။
ယခု ဇူလိုင် ၇ ရက်ကလည်း ရေး – ထားဝယ်လမ်းမပေါ်ရှိ စစ်ကောင်စီ၏ ရေးမြို့အခြေစိုက် အမှတ် (၃၁၆) အမြောက်တပ်ရင်း (အမတ-၃၁၆)ကို MSRFနှင့် ပူးပေါင်းအဖွဲ့က ဒရုန်းဖြင့် တိုက်ခိုက်ခဲ့သေးသည်။
အဆိုပါ တိုက်ခိုက်မှုအတွင်း စစ်ကောင်စီတပ်မှ ၁၅ ဦးထိခိုက်သေဆုံးကြောင်း MSRF တာဝန်ရှိသူက ပြောသည်။ယနေ့ တိုက်ခိုက်မှုအပါအဝင် စစ်ကောင်စီ၏ ထိခိုက်သေဆုံးမှုအပေါ် လူထုနွေဦး အနေဖြင့် သီးခြား အတည်ပြုနိုင်ခြင်းမရှိသေးပေ။
