ဇူလိုင်-၁၅၊၂၀၂၅/People’s Spring
ပုဂံ၊ညောင်ဦးမြို့ကို စစ်ခေါင်းဆောင်မင်းအောင်လှိုင် လာရောက်မှာဖြစ်လို့ စစ်တပ်က မြို့ပေါ်မှာလုံခြုံရေးတင်းကြပ်နေပြီး ကျေးရွာတွေကို စစ်ကြောင်းထိုးမီးရှို့နေတယ်လို့ အဲဒီဒေသတွင်းက တော်လှန်ရေးအင်အားစုတွေက ပြောပါတယ်။
စစ်တပ်က ပုဂံ၊ညောင်ဦးမြို့ပေါ်မှာ လှည့်ကင်းနဲ့ ကင်းပုန်းဝပ်တာတွေ ပြုလုပ်နေပြီး ကျေးရွာတွေကိုလည်း စစ်ကြောင်းထိုး မီးရှို့နေတယ်လို့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပကဖ)ရဲ့ ပြောရေးဆိုခွင့်ရှိသူက ပြောပါတယ်။
” လောလောဆယ် မအလ ခရီးစဥ်ရှိတော့ လုံခြုံရေးကို အဓိကထားပြီး ကင်းပတ်တာရော ကင်းပုန်းဝပ်တာရော လုပ်နေတယ်”လို့ ညောင်ဦးမြို့နယ် ပကဖရဲ့ ပြောရေးဆိုခွင့်ရှိသူက ပြောပါတယ်။
Public Service Announcement
စစ်ခေါင်းဆောင်မင်းအောင်လှိုင်ဟာ လာမယ့်ရက်ပိုင်းအတွင်း လာရောက်မယ်လို့ သတင်းထွက်နေတယ်လို့လည်း ၎င်းက ဆက်ပြောပါတယ်။
ပုဂံ၊ညောင်မြို့မှာ စစ်တပ်က ကုန်းကြောင်းအပြင် ရေကြောင်းကပါ လုံခြုံရေးတွေချပြီး တင်းကြပ်နေတယ်လို့ ညောင်ဦးခရိုင် ပကဖက ပြောပါတယ်။
အဲဒီလို တင်းကြပ်နေချိန်မှာဘဲ ဇူလိုင် ၁၃ရက် ညနေပိုင်းမှာ ညောင်ဦးမြို့က KBZဘဏ်ရဲ့ အနောက်ဘက်လမ်းကြားက ဆန်းရွှေဝါဆီဆိုင်ရဲ့နေအိမ်ကို လူတစ်စုက လာရောက်ပြီး ဓားပြတိုက်ပြန်ပေးဆွဲမှုဖြစ်ပွားခဲ့ပါတယ်။
သေနတ်ကိုင်ဆောင်ထားတဲ့ လူတစ်စုဟာ နေအိမ်မှာ ဆီလုပ်ငန်းရှင် ဦးဆန်းဦးရှိမနေ၍ ဇနီးဖြစ်သူ ဒေါ်ခင်မာကြည်ကို ပြန်ပေးဆွဲခေါ်ဆောင်ကာ ကျပ်သိန်း ၅၀၀နဲ့ ကားတစ်စီး ယူဆောင်သွားခဲ့လို့ ညောင်ဦးမြို့ခံအချို့က ပြောပါတယ်။
စစ်တပ်ဟာ ပုဂံမြို့တောင်ဘက်က ကျေးရွာတွေကို စစ်ကြောင်းထိုးပြီး ကျေးရွာ ၈ရွာကို မီးရှို့ဖျက်ဆီးခဲ့တယ်လို့လည်း ညောင်ဦးခရိုင် ပကဖက ပြောပါတယ်။
ချောင်းရှည့်ရွာက နေအိမ် ၁၁လုံး၊ အနောက်အုံရွာက နေအိမ် ၅လုံး၊ဇီစမြင်ရွာက နေအိမ် ၂၁လုံး၊ ပွဲတန်းရွာက နေအိမ် ၁၂လုံး၊ ကျောက်ပြင်ကန်ရွာက နေအိမ် ၃၀၊ မီးလောင်ဖျား(တ)ရွာက နေအိမ် ၈၅လုံးနဲ့ မီးလောင်ဖျား(မ)ရွာက နေအိမ် ၄၅လုံး စုစုပေါင်း နေအိမ် ၂၀၀ကျော် မီးလောင်ဆုံးရှုံးခဲ့ရတယ်လို့ ညောင်ဦးခရိုင် ပကဖက ပြောပါတယ်။
အဲဒီ စစ်ကြောင်းဟာ ပြီးခဲ့တဲ့ နှစ်ရက်လောက်က စစ်ကြောင်းပြန်ဝင်သွားတယ်လို့လည်း ဆိုပါတယ်။
ဒါ့အပြင် စစ်တပ်ဟာ ညောင်ဦးမြို့အရှေ့ဘက်က ငါ့သရောက်ဒေသကို စစ်ကြောင်းသုံးကြောင်းနဲ့ မနေ့က(ဇူလိုင် ၁၄ရက်)ကစပြီး စစ်ကြောင်းပြန်ထွက်လာနေတယ်လို့လည်း ညောင်ဦးခရိုင် ပကဖက ပြောပါတယ်။
” သုံးကြောင်းက အင်အားတော့ မများဘူးပေါ့။ သုံးကြောင်းပေါင်းမှ အင်အား ရာကျော်လောက်ပဲရှိပါတယ်”လို့ ညောင်ဦးခရိုင် ပကဖက ပြောပါတယ်။
ဒါ့အပြင် စစ်တပ်ဟာ ကျောက်ပန်းတောင်းမြို့နယ် ပုပ္ပါးတောင်မကြီးဘက်က ကျေးရွာတွေကိုလည်း နေ့စဉ်စစ်ကြောင်းထိုးထွက်လာနေတယ်လို့ သိရပါတယ်။
ညောင်ဦးမြို့နယ်မှာ ဇူလိုင်၁ရက်ကစပြီး တိုက်ပွဲပြင်းထန်ခဲ့ပြီးနောက် စစ်ကောင်စီတပ်တွေက အဲဒီရက်ကတည်းစကပြီး စစ်ကြောင်းအများအပြားနဲ့ ကျေးရွာတွေကို စစ်ကြောင်းထိုးနေတာဖြစ်ပါတယ်။
