ဇူလိုင်-၁၅၊၂၀၂၅။ရဲခေါင်/People’s Spring
မိုးဗြဲ-လွိုင်ကော်လမ်းပိုင်းတွင်တိုက်ပွဲများပြင်းထန်နေဆဲ ဖြစ်ကြောင်း တိုက်ပွဲဝင်နေသောရဲဘော်များနှင့် တော်လှန်ရေးအဖွဲ့တာဝန်ရှိသူများကပြောသည်။
ထို့အပြင်လွိုင်ကော်-မိုးဗြဲ-ဖယ်ခုံ-ပင်လောင်း လမ်းမကြီးကို ထိန်းချုပ်ကာ ပြန်လည်ဖွင့်လှစ်နိုင်ပြီဆိုသော စစ်ကောင်စီ၏ ဇူလိုင် ၁၁ က ကြေညာချက်သည်သတင်းအမှားဟု၎င်းတို့ကပြောသည်။
“မိုးဗြဲ-လွိုင်ကော်လမ်းပိုင်းကို သူတို့(စစ်ကောင်စီ) တောင်သုံးလို့မရသေးပါဘူး။တိုက်ပွဲတွေဆက်ဖြစ်နေတုန်းပဲ”ဟု ကရင်နီအမျိုးသားများကာကွယ်ရေး တပ်ဖွဲ့ဝင်တစ်ဦးက ပြောသည်။
Public Service Announcement
မိုးဗြဲ-လွိုင်ကော်သည် ကားလမ်းပိုင်းအရ ၁၅ မိုင် ဝန်းကျင် အကွာအဝေးရှိပြီး ကောခူ၊ဆောင်ကန်း၊ထီရိ၊ကုန်းသာ၊ကယန်းသာယာ၊ကယန်းကြခူ နှင့် မြေနီကုန်း ရွာတို့သည့် လမ်းပိုင်းအနီးရှိသည်။
“အခြေအနေအရမ်းတင်းမာနေတဲ့အနေအထားပဲ။တိုက်ပွဲကလည်းဆက်ဖြစ်နေတုန်းဆိုတော့ ဘယ်နေရာတွေမှာ ဖြစ်တယ်ဆိုတာကို ပြောမရသေးဘူး”ဟု ကရင်နီရဲဘော်တစ်ဦးက မိုးဗြဲ-လွိုင်ကော် လမ်းပိုင်းအခြေအနေကို ရှင်းပြသည်။
စစ်ကောင်စီသည် မိုးဗြဲ-လွိုင်ကော်လမ်းမကြီးကို လိုင်းကားများ မဖြစ်မနေဖြတ်ပြီးအသုံးပြုရန် ခြိမ်းခြောက်ခိုင်းစေမှုအချို့ရှိနေကြောင်းလည်း ဒေသခံအချို့ကပြောသည်။
“စကစ ပြည်နယ်ဝန်ကြီးချုပ်ကနေ ညွှန်ကြားတာ။ဒီလ မကုန်ခင် လိုင်းကားတွေ စ ဆွဲရမယ်လို့ကြားတယ်”ဟု လွိုင်ကော်မြို့ခံတစ်ဦးက ပြောသည်။
ကရင်နီဒီမိုကရက်တစ်တပ်ဦး KDF ၏ ပြောရေးဆိုခွင့်ရှိသူ ကိုကျော်ထက်က “လမ်းပိုင်း(မိုးဗြဲ-လွိုင်ကော်)ကို သူတို့(စစ်ကောင်စီ)တောင်လုံးဝမထိန်းချုပ်နိုင်သေးဘူး”ဟု ပြောသည်။
စစ်ရေးအချက်အလက်များအရ မိုးဗြဲ-လွိုင်ကော် လမ်းပိုင်းကိုအပြည့်အဝထိန်းချုပ်လိုပါက ကရင်နီပြည်နယ်၏ တော်လှန်ရေးတပ်များအနက် တိုက်ခိုက်ရေးရဲဘော် အင်အား အများဆုံးတပ်ဖြစ်သည့် KNDF ၏ ဗျူဟာနှစ်ခု ကို စစ်ကောင်စီသည် ရင်ဆိုင်ရဦးမည်ဖြစ်သည်။
“လွိုင်ကော်အထိတိုးလျှိုပေါက်ဖောက်ဖို့ဆိုရင် စကစ အနေနဲ့ အဲဒီအပိုင်းမှာ KNDF ရဲ့ ဗျူဟာ ၇ နဲ့ ဗျူဟာ ၂ ရှိမယ်။ထိတွေ့ မှုလည်း ရှိနေတယ် သိရတယ်”ဟု ကရင်နီ စစ်ဘက်သတင်းရင်းမြစ်က ပြောသည်။
ရှမ်းပြည်တောင်ပိုင်းမှ ကရင်နီပြည်နယ်သို့ဝင် ပေါက်ဖြစ်ရာ မိုးဗြဲမြို့ကို စစ်ကောင်စီက ခြောက်လ ကျော်ကြာ ထိုးစစ်ဆင်ပြီးနောက် မြို့ပေါ်ရပ်ကွက်များနှင့် မိုးဗြဲလမ်းမကိုယခုလဆန်းပိုင်းက ပြန်လည်ထိန်းချုပ်ခဲ့သည်။
လူဦးရေ နှစ်သောင်းကျော်နေထိုင် ခဲ့သည့် မိုးဗြဲ မြို့သည် စစ်အုပ်စုအခြေစိုက်ရာ နေပြည်တော်ကို နာရီပိုင်းနှင့် ရောက်နိုင်သည့် ပင် လောင်း-ဖယ်ခုံ -(မိုးဗြဲ)-လွိုင်ကော် လမ်းပိုင်းပေါ်၌ ရှိသည်။
မိုးဗြဲမြို့စစ်ကောင်စီလက်ထဲရောက်ရှိခဲ့ပြီးနောက် ရှမ်းပြည်တောင်ပိုင်းမှ စစ်အင်အားအလွယ်တကူ ဖြည့်နိုင်ခွင့် နှင့် ကရင်နီပြည်နယ်၌ တော်လှန်ရေးအင် အားစုများ ပိတ်ဆို့ထားသည့် ဒီးမော့ဆို၊ဖရူဆို နှင့် ဘောလခဲမြို့ ရှိ စစ်ကောင်စီ တပ်များ ပြန်ပွင့်နိုင်သည့် အခြေအနေ ရင်ဆိုင်ရနိုင်ကြောင်း စစ်ရေးသုံးသပ်သူအချို့က သုံးသပ်ထားသည်။
