ဇူလိုင်-၂၇၊၂၀၂၅။ရဲခေါင်/People’s Spring
ကရင်နီပြည်နယ်၊လွိုင်ကော်မြို့နယ်တွင် ယနေ့နံနက်ပိုင်း၌တိုက်ပွဲဖြစ်နေကြောင်းဒေသခံနှင့်စစ်ရေးသတင်းရင်းမြစ်အချို့ကလူထုနွေဦးသို့ပြောသည်။
လွိုင်ကော်မြို့နယ်ရှိ နိုးကိုးစံပြကျေးရွာဘက်မှ စစ်ကြောင်းနှစ်ခုဖြင့် ထိုးလာသည့် စစ်ကောင်စီတပ်ကို ကရင်နီပူးပေါင်းတပ်ကခုခံတိုက်ခိုက်နေခြင်းဖြစ်ကြောင်း စုံစမ်းသိရသည်။
“ဘုရားနီဘက်က တိုးလာတယ်။ဒေါဆော်လီဘက်ကတိုးလာတယ်။တိုက်ပွဲဖြစ်နေတယ်”ဟုစစ်ကောင်စီတပ်စစ်ကြောင်းထိုးလာမှု အခြေအနေကို လွိုင်ကော်မြို့ခံတစ်ဦးက ရှင်းပြသည်။
Public Service Announcement
ဇူလိုင် ၂၇ ရက်နံနက်ပိုင်းတွင် စစ်ကောင်စီတပ်နှင့် ကရင်နီပူးပေါင်းတပ်တို့ ထိတွေ့တိုက်ပွဲအတွင်း လက်နက်ကြီးပစ်ခတ်သံများ ကြားရသည်ဟု ဆိုသည်။
“အသေအပျောက်များတဲ့ စကစဗမာစစ်တပ် က ၅၄တပ်(ခလရ-၅၄)ပါ။ လက်နက်ကြီးပစ်ကူပေးနေရတယ်”ဟု ကရင်နီစစ်ဘက်သတင်းရင်းမြစ်က ပြောသည်။
စစ်ကောင်စီတပ်စစ်ကြောင်းထိုးလာသောကြောင့် ဘီးလူးချောင်းအနောက်ဘက် ဒီးမော့ဆိုမြို့နယ် နန်းမယ်ခုံမြို့အပါအဝင် ကျေးရွာခုနစ်ရွာရှိ ဒေသခံပြည်သူထောင်နှင့်ချီ စစ်ဘေးရှောင်နေရသည်။
“ရည်မှန်းချက်ကတော့ မှန်းခြေ ဖရူဆိုတို့ ဘောလခဲတို့ဘက်ကို ကုန်းကြောင်းထိုးလျှောက် ချင်တာ။ ပြီးရင်သူတို့တွေက ရွေးကောက်ပွဲအတွက် လွိုင်ကော်ကိုသေချာကာထားဖို့အတွက် လည်းပါလိမ့်မယ်”ဟုကရင်နီပြည်ပြည်သူ့လွတ်မြောက်ရေးတပ်မတော်၏ တာဝန်ရှိသူက ပြောသည်။
ဇူလိုင် ၂၂ ရက်ကစ၍ စစ်ကောင်စီတပ်သည် လွိုင်ကော်မြို့နယ်မှ ဒီးမော့ဆိုမြို့ဘက်သို့ ဦးတည်၍ စစ်ကြောင်း ထိုးလာခြင်းဖြစ်ကြောင်း ကရင်နီပြည်ကြားကာလအုပ်ချုပ်ရေးကောင်စီ(IEC)၏ တွဲဖက်အတွင်းရေးမှူး ဦးဗညားက အသိပေးသည်။
လုံခြုံရေးအရ ရွှေ့ပြောင်းရမည့် ကျေးရွာများရှိ ပြည်သူများကို IEC၏ အရေးပေါ်ကယ်ဆယ်ရေး အဖွဲ့၊ လူကယ်ပြန်ဌာန ၊ပရဟိတအဖွဲ့များနှင့်အရပ်ဘက်အဖွဲဲ့စည်းများကဝိုင်းဝန်းရွှေ့ပြောင်းပေးနေသည်ဟု ဆိုသည်။
လမ်းပန်းအခြေအနေ၊လူဦးရေများပြားမှုနှင့်မိုးရာသီဖြစ်သည့်အတွက် ပြောင်းရွှေ့ရာတွင် အခက်အခဲရှိကာ အကူအညီများလိုအပ်နေ ကြောင်း စစ်ရှောင်အရေးဆောင်ရွက်နေသူများက မေတ္တာရပ်ခံထားသည်။
