ဇူလိုင်-၂၉၊ ၂၀၂၅။ ထားမြတ်/People’s Spring
စစ်သင်္ဘောအုပ်စုအား ကချင်လွတ်လပ်ရေးတပ်မတော်(KIA)နှင့်တော်လှန်ရေး ပူးပေါင်းတပ်က ရွှေ့ကူ မြို့အထက်ပိုင်းနေရာများတွင် စောင့်ကြိုတိုက်ခိုက်လျက်ရှိရာ ယနေ့(ဇူလိုင်၂၉ရက်)တွင် သင်္ဘောတစ်စီးထိခိုက်အောင် တိုက်ခိုက်နိုင်သည့် ရုပ်သံထွက်ပေါ်လာသည်။
KIA ပူးပေါင်းတပ်များသည် စစ်သင်္ဘောအုပ်စုကို ဇူလိုင် ၂၇ရက်နှင့် ယနေ့ (ဇူလိုင် ၂၉ရက်)တွင် တိုက်ခိုက်ခဲ့ရာ ယနေ့တွင် သင်္ဘောတစ်စီးထိခိုက်ခဲ့ဟု ကချင်စစ်ရေးသတင်းရင်းမြစ်က ပြောသည်။
ယနေ့ ညနေပိုင်းတွင် စစ်ရေးသတင်းရင်းမြစ်အချို့က ပြသသည့် သင်္ဘောတိုက်ခိုက်မှု ရုပ်သံမှတ်တမ်းတွင် ပစ္စည်းများ မိုးကာအုပ်တင်လာသည့်တွဲအား တွန်းလာသော သင်္ဘောကို ပစ်ခတ်တိုက်ခိုက်ခဲ့ရာ သင်္ဘောထိမှန်ခဲ့သည်ကို တွေ့ရသည်။
Public Service Announcement
ယင်းတိုက်ခိုက်မှု ဖြစ်စဉ်သည် ယနေ့ (ဇူလိုင် ၂၉ရက်)တွင် ရွှေကူမှ ဗန်းမော်မြို့ဘက်သို့ တက်သွားသည့် စစ်သင်္ဘောများကို တိုက်ခိုက်ခြင်းဖြစ်ကြောင်း ကချင်သတင်းရင်းမြစ်က ပြောသည်။
ယနေ့တွင် စစ်သင်္ဘော ၈စီးခန့် အထက်သို့ ဆန်တက်ရာ သင်္ဘော ၅စီးသည် ဧရာ၀တီမြစ်ကြောင်း ကြက်တူရွေးနှုတ်သီးအောက်တွင် ကမ်းကပ်ထားသည်ဟု ၎င်းက ပြောသည်။
တိုက်ခိုက်ခံရ၍ ထိခိုက်သည့် သင်္ဘောအချို့မှာ ရွှေကူမြို့ဘက်ပြန်ဆုတ်သွားသည်ဟုလည်း ပြောသည်။
” တချို့မဆုတ်ဘူး။ ဝမ်းပေါက်သွားတဲ့ အစီးတွေ တွဲပြီးပြန်ဆုတ်တာရှိတယ်။ ကျန်တာ ကြက်တူရွေး နှုတ်သီးနား ကမ်းထိုးနားနေကြတယ်။ ဆက်တက်ရင် အန္တရာယ်ဇုံထဲ ရောက်ပြီဆိုတာ သူတို့ သိနေတာ ဖြစ်မယ်”ဟု ကချင်သတင်းရင်းမြစ်က ပြောသည်။
အခြားကချင်စစ်ရေးသတင်းရင်းမြစ်ကလည်း “သင်္ဘောတွေက ရွှေကူဘက် ပြန်ခေါက်သွားပြီ။ ကုန်းလမ်းဘက်က ထိုးစစ်ဆင်လာတဲ့ စစ်ကြောင်းတွေလည်း တော်တော်အထိနာသွားတယ်”ဟု ယနေ့ ညပိုင်း၌ ပြောသည်။
စစ်သင်္ဘောအုပ်စုနှင့် ဒေသစစ်ရေးအခြေအနေများကို KIA သတင်းပြန်ကြားရေး တာဝန်ရှိသူ အပါအဝင် သတင်းရင်းမြစ်အချို့ထံ ဆက်လက်မေးမြန်းစုံစမ်းနေဆဲဖြစ်သည်။
စစ်သင်္ဘောအုပ်စုသည် ရွှေကူမှ ဗန်းမော်မြို့သို့ ဦးတည်ပြီး အထက်သို့ ဆန်တက်ရန် ကြိုးပမ်းရာတွင် သင်္ဘော လုံခြုံရေးအတွက် မြေပြင်မှလည်း အင်အား ရာချီဖြင့်စစ်ကြောင်းထိုး ရှင်းလင်းရေး လုပ်ဆောင်ရာ KIA ပူးပေါင်းတပ်က ကြားဖြတ်တိုက်ခိုက်ခဲ့၍ ဇူလိုင် ၂၆ရက်၊ ၂၇ရက်နှင့် ၂၉ ရက်တွင် မြေပြင် တိုက်ပွဲပြင်းထန်ပြီး စစ်ကောင်စီတပ် အထိနာခဲ့ဟု ကချင်သတင်းရင်းမြစ်က ပြောကြားသည်။
https://www.facebook.com/LuduNwayOo/videos/1914820012423378
ရုပ်သံ – Padang Nsen
