သြဂုတ် – ၄ ၊ ၂၀၂၅ ၊ နိုင်ပကောင်း/People’s Spring
ကရင်ပြည်နယ်၊ထိုင်းနယ်စပ်ဝေါ်လေမြို့မှာရှိတဲ့ ဒီမိုကရေစီအကျိုးပြု ကရင့်တပ်မတော်(DKBA)တပ်ဖွဲ့ရဲ့စစ်ရေးချုပ်ဗိုလ်မှူးချုပ်စောစိန်ဝင်း နေအိမ်ကို မနေ့ (ဩဂုတ်လ ၃ ရက်)ညနေပိုင်းမှာ စစ်ကောင်စီတပ်ကဒရုန်းနဲ့ တိုက်ခိုက်တာကြောင့် နေအိမ်ပျက်စီးသွားခဲ့ပေမယ့် လူထိခိုက်မှုမရှိဘူးလို့ ကရင်သတင်းရင်းမြစ်က ပြောပါတယ်။
မနေ့ ညနေပိုင်းအချိန်မှာ ဝေါ်လေမြို့၊ အမှတ်(၄)ရပ်ကွက်မှာရှိတဲ့ DKBA တပ်ဖွဲ့ ရဲ့စစ်ရေးချုပ်လည်းဖြစ်၊ ပြောရေးဆိုခွင့်ရှိသူတစ်ဦးလည်း ဖြစ်တဲ့ ဗိုလ်မှူးချုပ်စောစိန်ဝင်းရဲ့ နေအိမ်ကို ဝေါ်လေဗျူဟာ စစ်ကောင်စီတပ်က အသေခံ(ကာမီကာဇေ)ဒရုန်းနဲ့ ဗုံးကြဲချတိုက်ခိုက်ခဲ့တာပါ။
အဲဒီ တိုက်ခိုက်မှုကြောင့် DKBA စစ်ရေးချုပ် ဗိုလ်မှူးချုပ်စောစိန်ဝင်းရဲ့ နေအိမ်ခေါင်မိုး ထိခိုက်ပျက်စီးသွားခဲ့ပါတယ်။
Public Service Announcement
ဒါပေမယ့် နေအိမ်မှာလူသူ မရှိတဲ့အတွက် လူထိခိုက်မှုတစုံတရာမရှိဘူးလို့ ကရင်သတင်းရင်းမြစ်က ပြောပါတယ်။
ဗိုလ်မှူးချုပ်စောစိန်ဝင်းဟာ စစ်ကောင်စီနဲ့ ပတ်သက်တဲ့ ငြိမ်းချမ်းရေးတွေ့ဆုံဆွေးနွေးပွဲတွေမှာ DKBA အဖွဲ့အစည်းရဲ့ ဦးဆောင်သူအဖြစ် ကိုယ်တိုင်တက်ရောက်ခဲ့ရသူတစ်ဦးလည်းဖြစ်ပါတယ်။
ဒီမိုကရေစီအကျိုးပြုကရင်တပ်မတော်(DKBA)ဟာတစ်နိုင်ငံလုံး ပစ်ခတ်တိုက်ခိုက်မှုရပ်စဲရေးစာချုပ်( NCA )ကို ဦးသိန်းစိန်အစိုးရလက်ထက်မှာ လက်မှတ်ရေးထိုးထားတဲ့ ကရင်လက်နက်ကိုင်အဖွဲ့တစ်ဖွဲ့ဖြစ်ပြီး အာဏာ သိမ်း စစ်ကောင်စီနဲ့ လည်း နေပြည်တော်မှာ တွေ့ဆုံမှု ရှိခဲ့ပါတယ်။
ပြီးခဲ့တဲ့ မေလကုန်ပိုင်းကတော့ နယ်စပ်က သေဘောဘိုးစခန်းတိုက်ပွဲမှာ ဝေါ်လေဗျူဟာကနေ သွားရောက်စစ်ကူပေးခဲ့တဲ့ စစ်တပ်စစ်ကြောင်းဟာ DKBA ဗဟိုဌာနချုပ်ဖြစ်တဲ့ ဆုံဆည်းမြိုင်မှာ တော်လှန်ရေးပူးပေါင်းတပ်တွေရဲ့ ကြားဖြတ်တိုက်ခိုက်ခံရပြီး စစ်ကြောင်းပျက်သွားခဲ့တာပါ။
အဲဒီနောက် ဆုံဆည်းမြိုင်ကို စစ်ကောင်စီလေတပ်က ဗုံးကြဲတိုက်ခိုက်ခဲ့ပါသေးတယ်။
ဝေါ်လေမြို့အနီး ဝေါ်လေ-ထီးသဲလယ်လမ်းပေါ်မှာရှိတဲ့ စစ်ကောင်စီတပ်ရဲ့ ဗျူဟာစခန်းကို ပြီးခဲ့တဲ့ ဇူလိုင်လ အစောပိုင်းကစပြီး ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၆)ဦးဆောင်တဲ့ တော်လှန် ရေးပူးပေါင်းတပ်ဖွဲ့တွေ့ စတင်တိုက်ခိုက်ခဲ့ပါတယ်။
အဲဒီတိုက်ပွဲမှာ စစ်ကောင်စီတပ်က လက်နက်ကြီးအပြင် အသေခံ(ကာမီကာဇေ)ဒရုန်းတွေသုံးပြီး တိုက်ခိုက်တာရှိပါတယ်။
ဒေသခံတွေကတော့ ထိုင်းနိုင်ငံဘက်ခြမ်းနဲ့ အခြားနီးစပ်ရာဒေသတွေဘက်ကို တိမ်းရှောင်နေရပါတယ်။
