မိုးကုတ်နှင့်သီပေါမြို့ စစ်ကောင်စီ ဗုံးကြဲမှု ကလေးငယ်အပါအဝင် ၅ဦး သေဆုံး

ဩဂုတ်-၉၊၂၀၂၅။အိမ်သွင်/People’s Spring

တအာင်းတပ်မတော်(TNLA) ထိန်းချုပ်ဒေသများဖြစ်သော မန္တလေးတိုင်းမှ မိုးကုတ်နှင့် ရှမ်းပြည်နယ်မြောက်ပိုင်းမှ သီပေါမြို့ကို စစ်ကောင်စီက လေကြောင်းမှ ဗုံးကြဲတိုက်ခိုက်ရာ ကလေးငယ်အပါအဝင် ငါးဦးသေဆုံးခဲ့သည်။

ယနေ့ (ဩဂုတ်၉ရက်)ညနေ ၄နာရီခွဲခန့်တွင်သီပေါမြို့ ပန်းတိမ်တောင်ရပ်ကွက်၊ဒုဌဝတီမြစ်ကမ်းဘေးရှိ ဆောက်လုပ်ရေးဝန်ထမ်းအဆောက် အအုံကို ဗုံးကြဲတိုက်ခိုက်ခြင်းဖြစ်ပြီး မိုးကုတ်မြို့ကိုမူ ညနေ ၆နာရီ ၄၅မိနစ်ခန့်တွင် ဗုံးကြဲခြင်းဖြစ်သည်။

သီပေါမြို့အား ပေါင် (၂၅၀)ဗုံး သုံးလုံးလာရောက်ကြဲချတိုက်ခိုက်ခဲ့ပြီး အမျိုးသားတစ်ဦးဒဏ်ရာရကာ နေအိမ် (၇)လုံး ပျက်စီးခဲ့သည်ဟု TNLAက သတင်းထုတ်ပြန်သည်။

Public Service Announcement

မိုးကုတ်မြို့တွင်မူ မြို့အရှေ့ပိုင်းတစ်နေရာအားဗုံးကြဲခြင်းဖြစ်သည်။

မိုးကုတ်မြို့ဗုံးကြဲမှုအတွင်း အသက် ၈နှစ်နှင့် ၁၁နှစ်အရွယ် ကလေးနှစ်ဦး၊ (၇၁)နှစ်ရွယ် အမျိုးသားတစ်ဦး၊ ကိုရင်တစ်ပါး၊ (၃၂)အရွယ် အမျိုးသမီးတစ်ဦးတို့ သေဆုံးခဲ့ကြောင်း သတင်းရရှိသည်။

“လွန်တယ်ဗျာ။ သေပြန်ပြီး အရပ်သားတွေ။ စကစလုပ်တာ လွန်တယ်”ဟု မိုးကုတ်ဒေသခံတစ်ဦးက ပြောသည်။

TNLAသည် ၁၀၂၇ စစ်ဆင်ရေးနှင့်အတူ ရှမ်းပြည်နယ်မြောက်ပိုင်းရှိ ကျောက်မဲ၊ သီပေါ၊နမ့်ဆန်၊ မိုင်းလုံ၊ မိုးမိတ်၊ မန်တုံ၊နမ္မတူ၊ ကွတ်ခိုင်၊ နောင်ချို၊နမ့်ခမ်း၊မိုင်းငေါ့မြို့နှင့် မန္တလေးတိုင်းမှ မိုးကုတ်မြို့ကို သိမ်းယူထားသည်။

နောင်ချိုမြို့ကို စစ်ကောင်စီက ရက်ပေါင်းများစွာ ထိုးစစ်ဆင်ပြီးနောက် ဇူလိုင် ၁၆ရက်တွင် ပြန်လည်ထိန်းချုပ်ခဲ့သည်။ ထို့နောက် ပြီးခဲ့သည့် ဇူလိုင်နှင့် သြဂုတ် ပထမပတ်ကာလအတွင်း ကွတ်ခိုင်၊ သီပေါ၊ မိုးကုတ်၊ ကျောက်မဲ၊ မိုင်းငေါ့၊ မိုင်းလုံမြို့တို့ကို ဗုံးကြဲခဲ့သည်။

တအောင်းအမျိုးသားလွတ်မြောက်ရေးတပ်မတော်(TNLA)က ၎င်းတို့ထိန်းချုပ်ဒေသမှပြည်သူများအနေဖြင့် လေကြောင်းအန္တရာယ် သတိပြုကြရန် သတိပေးထားသည်။