သြဂုတ်-၁၂ ၊ ၂၀၂၅။တာရာ /People’s Spring
မကွေးတိုင်း၊မြိုင်မြို့ပေါ်က စစ်ကောင်စီတပ် ကင်းစခန်းတွေ တိုက်ခိုက်ခံရပြီးနောက်မှာ ချောင်းဆုံစစ်ဆေးရေးဂိတ်က စစ်ကောင်စီတပ်သားတွေ စွန့်ခွာထွက်ပြေးသွားတယ်လို့ ဒေသတွင်း စစ်ရေးသတင်းရင်းမြစ်နဲ့ မြိုင်ပကဖ တာဝန်ရှိသူတွေက ပြောပါတယ်။
မကွေးတိုင်း မြိုင်နဲ့ စစ်ကိုင်းတိုင်း ပုလဲမြို့နယ်သွားတဲ့ လမ်းပိုင်းပေါ်က ချောင်းဆုံစစ်ဆေးရေးဂိတ်ဟာ အင်အား ၂၀ထက်မနည်း စစ်တပ်က အထိုင်ချတပ်စွဲခဲ့တယ်လို့ ဆိုပါတယ်။
“ဒီဂိတ်က တော်တော်ခိုင်မာတယ်။ဘန်ကာကောင်း ကောင်းရှိသလို ကတုတ်ကျင်းတွေလည်း သေချာလုပ်ထားတာ”လို့ စစ်ကောင်စီတပ်သားတွေ စွန့်ခွာခဲ့တဲ့ ချောင်းဆုံဂိတ်နဲ့ပတ်သက်လို့ မြိုင် ပကဖ တာဝန်ရှိသူ တစ်ဦးက ရှင်းပြပါတယ်။
Public Service Announcement
ချောင်းဆုံဂိတ်ကို တော်လှန်ရေးတပ်တွေက ရှင်းလင်းမီးရှို့ဖျက်ဆီးခဲ့တယ်လို့လည်း ပြောပါတယ်။
“အခုက ချောင်းဆုံဂိတ်ကို လက်လွှတ်ရပြီ။ပခုက္ကူဂိတ်ကို၊ ကိုင်းတောမဂိတ်ကိုလည်း လက်လွှတ်ရပြီပြီး။အခု ကျန်တာ မန္တလေးကို ထွက်တဲ့လမ်းပေါ်က မန္တလေးဂိတ်ပဲကျန်တယ်”လို့ မြိုင်မြို့နယ်စစ်ရေးသတင်းရင်းမြစ်က ပြောပါတယ်။
စစ်ကောင်စီတပ်က မြိုင်မြို့ပေါ်မှာ စုရုံးတပ်တည်ထားပြီး မြို့တွင်းရှိ စီးပွားရေးဘဏ်၊ ရဲစခန်းနဲ့ စျေး တွေမှာ တပ်စွဲထားတာရှိတယ်လို့ သူက ဆက်ပြောပါတယ်။
ဒါ့အပြင် မြိုင်မြို့နယ်ရဲ့စစ်ရေးအခြေအနေတွေအရ မြို့နဲ့ တစ်မိုင်ခွဲအကွာဝန်းကျင်အထိ တော်လှန်ရေးအင်အားစုတွေက စိုးမိုးထားနိုင်နေပြီလို့လည်း သိရပါတယ်။
ဩဂုတ် ၁၀ ရက်မှာ မြိုင်မြို့ပေါ်က စစ်ကောင်စီတပ် ကင်းစခန်းနဲ့ ဩဂုတ်၉ရက်က မြိုင်မြို့အရှေ့ဘက်ခြမ်းက စစ်ကောင်စီတပ်စွဲရာ စီမံကိန်းရုံးတွေကို တော်လှန်ရေးအင်အားစုတွေ တိုက်ခိုက်သိမ်းပိုက်နိုင်ခဲ့ပါတယ်။
စခန်းသိမ်းပိုက်မှုတွေအတွင်းမှာ စစ်သုံ့ပန်း ၁၅ဦး ဖမ်းမိခဲ့ပြီး လက်နက် ၁၆ လက်ရရှိခဲ့ကြောင်း မြိုင်ပကဖနဲ့ ဒေသခံအင်အားစုတွေ ထုတ်ပြန်ချက်အရ တွေ့ရပါတယ်။
