သြဂုတ် – ၁၂ ၊၂၀၂၅ ၊ နိုင်ပကောင်း/People’s Spring
ကရင်အမျိုးသားအစည်းအရုံး(KNU)ဗဟိုဌာနချုပ်ကို စစ်ကောင်စီတပ်က ဩဂုတ် ၁၁ ရက်ညပိုင်းမှာ လေကြောင်းတိုက်ခိုက်မှုတစ်ရပ်ပြုလုပ်ခဲ့ပြီး အခုနှစ်အတွင်းမှာ KNU ဌာနချုပ်ကို လေကြောင်းနဲ့ ဒရုန်းတိုက်ခိုက်မှု စုစုပေါင်း သုံးကြိမ် ရှိလာပြီဖြစ်တယ်လို့ သိရပါတယ်။
ကရင်ပြည်နယ်၊လှိုင်းဘွဲမြို့နယ်၊ထိုင်းနယ်စပ်နားမှာရှိတဲ့ KNU ဗဟိုဌာန ချုပ် တပ်မဟာ ၇ နယ်မြေကို ဩဂုတ်လ ၁၀ ရက်နေ့ ည ၈ နာရီအချိန်ခန့်မှာ လေကြောင်းကနေတဆင့် ဗုံးကြဲတိုက်ခိုက်ခဲ့ရာမှာ လူတစ်ဦး ထိခိုက်ဒဏ်ရာရခဲ့ပြီး အဆောက်အဦးနဲ့ ဈေးဆိုင်တချို့ ထိခိုက်ပျက်စီးခဲ့ရပါတယ်။
စစ်ကောင်စီက KNU ဗဟိုဌာနချုပ်ကို လေယာဉ်သုံးပြီး ဗုံးကြဲတိုက်ခိုက်တာဟာ ပထမဦးဆုံးအကြိမ်ဖြစ်ပါတယ်။ဒါပေမယ့်အခုတိုက်ခိုက်မှုမတိုင်ခင်ကတော့ ဒရုန်းနဲ့တိုက်ခိုက်ခဲ့တာမျိုးရှိထားပါတယ်။
Public Service Announcement
အခုနှစ် ဇန်နဝါရီလ ကရင့်တော်လှန်ရေးနေ့က တစ်ကြိမ်၊ မတ်လပိုင်းက တစ်ကြိမ် စုစုပေါင်းနှစ်ကြိမ် စစ်ကောင်စီက ဒရုန်းကိုအသုံးပြုပြီး တိုက်ခိုက်မှု ပြုလုပ်ခဲ့ပေမယ့် ထိခိုက်မှုတော့မရှိပါဘူး။
ဌာနချုပ်လေကြောင်းတိုက်ခိုက်ခံရတဲ့ဖြစ်စဉ်နဲ့ ပတ်သက်လို့ ကရင်အမျိုးသားအစည်းအရုံး(KNU)ဘက်ကတော့ ဩဂုတ်လ ၁၂ ရက် မွန်းလွဲပိုင်း ၂ နာရီအထိ တစုံတရာသတင်းထုတ်ပြန်တာမျိုး မရှိသေးပါဘူး။
ကရင်စစ်ရေးသတင်းရင်းမြစ်တစ်ဦးက KNU ဗဟိုဌာနချုပ်ကို ဗုံးကြဲတိုက်ခိုက်တဲ့လုပ်ရပ်ဟာ အာရှလမ်းမကြီး ပြန်လည်ဖွင့်လှစ်ဖို့အတွက် စစ်ကောင်စီက ဖိအားပေးလုပ်ဆောင်တာဖြစ်တယ်လို့ ယူဆရကြောင်း ပြောပါတယ်။
အာဏာသိမ်းစစ်ကောင်စီဟာ ထိုင်း -မြန်မာ နယ်စပ်ကုန်သွယ်ရေး ပင်မလမ်းကြောင်းဖြစ်တဲ့ ကော့ကရိတ်-မြဝတီ အာရှလမ်းမကြီးကို ပြန်လည်စိုးမိုးထိန်းချုပ်နိုင်ဖို့အတွက် စစ်ရေးပြင်ဆင်မှုတွေ လုပ်ဆောင်လာနေတာပါ။
ဒီရက်ပိုင်းထဲမှာ ကော့ကရိတ်မြို့ကနေ တော်လှန်ရေးတပ်တွေရှိနိုင်မယ့် နေရာတွေဆီ လက်နက်ကြီးတွေနဲ့ လှမ်းပစ်တာ၊ လေယာဉ်ကင်းထောက်ပျံဝဲတာတွေ လုပ်ဆောင်နေတယ်လို့ ကရင်စစ်ရေး သတင်းရင်းမြစ်တွေက ပြောပါတယ်။
ကျုံဒိုး-ကော့ကရိတ်လမ်းပိုင်းကို ပြန်လည်သိမ်းယူနိုင်ခဲ့ပြီးတဲ့နောက် အာရှလမ်းမကြီးကိုပါ ပြန်လည်ဖွင့်လှစ်နိုင်ဖို့ ဆက်လက်လုပ်ဆောင်သွားမယ်လို့ ပြီးခဲ့တဲ့ ဇူလိုင်လကုန်ပိုင်းက စစ်ကောင်စီက ပြောဆိုထားပါတယ်။
ဒါ့အပြင် တိုက်ပွဲပြင်းထန်နေတဲ့ နယ်စပ်က ဝေါ်လေဗျူဟာမှာလည်း ဩဂုတ်လ ၁၀ ရက်နေ့က စစ်ကောင်စီတပ်က လေကြောင်းတိုက်ခိုက်မှုလုပ်ဆောင်ခဲ့ပြီး တော်လှန်ရေးပူးပေါင်းတပ်တွေကလည်း ဗျူဟာကုန်းကို ဆက်လက်ထိုးစစ်ဆင်တိုက်ခိုက်နေတယ်လို့ ကရင်သတင်းရင်းမြစ်ရဲ့ ပြောပြချက်အရ သိရပါတယ်။
