သြဂုတ်-၂၀၊ ၂၀၂၅။တာရာ /People’s Spring
ကရင်နီပြည်နယ်၊ဒီးမော့ဆိုမြို့ကို ပြန်လည်ထိန်း ချုပ်နိုင်ပြီလို့ စစ်ကောင်စီကထုတ်ပြန်ပါတယ်။
သြဂုတ် ၄ ရက်စပြီး ဒီးမော့ဆိုမြို့ရဲ့မြောက်ဘက်ခြမ်းရွှေယောက်ရပ်ကွက်နဲ့ အရှေ့တောင်ဘက်ခြမ်းက ပါဒေါဒူ ကျေးရွာဘက်ကနေ ထိုးဖောက်ခဲ့တယ်လို့ သြဂုတ် ၂၀ ရက်နေ့ထုတ်စစ်ကောင်စီရဲ့သတင်းစာတွေမှာဖော်ပြထားပါတယ်။
အဲဒီနောက်မြို့ပေါ်မှာရှိတဲ့ ရဲစခန်း၊မီးသတ်၊ထွေအုပ်ရုံးနဲ့မြို့နယ်ခန်းမတွေ အပါအဝင် မြို့တစ်ခုလုံးကို သြဂုတ် ၁၉ ရက်နေ့မှာ ပြန်လည်ထိန်းချုပ်နိုင်ခဲ့တာလို့ ဖော်ပြထားပါတယ်။
Public Service Announcement
၁၆ ရက်တာအတွင်း တိုက်ပွဲ ၂၃ ကြိမ်ဖြစ်ပွားပြီး အလောင်းခြောက်လောင်းနဲ့ လက်နက် ငါးလက်သိမ်းရခဲ့တယ်လို့ စစ်ကောင်စီက ဆိုပါတယ်။
တိုက်ပွဲတွေအတွင်းမှာ စစ်ကောင်စီတပ်သားအချို့ ထိခိုက်သေဆုံးမှုရှိတယ်လို့သာပါရှိပြီး စာရင်းအ တိအကျ ဖော်ပြမထားပါဘူး။
“စစ်တပ်ဝါဒဖြန့်တာကတော့ဗိုလ်ချုပ်နေဝင်းခေတ်ကတည်းကလေ။တိုက်ပွဲကတော့ဆက်ဖြစ်တာတော့ရှိနေတယ်။အကုန်ပြောလို့မဖြစ်သေးဘူး”လို့ ကရင်နီတပ်မတော် KA စစ်ရေးချုပ် ဗိုလ်မှူးကြီးဘုန်းနိုင်က စစ်ကောင်စီရဲ့ ထုတ်ပြန်ချက်နဲ့ပတ်သက်ပြီး မှတ်ချက်ပြုပါတယ်။
ဒီးမော့ဆိုမြို့ပေါ်ကို စစ်ကောင်စီက အင်အား ၃၀၀ ကျော်နဲ့ လေယာဥ်၊လက်နက်ကြီး၊ဒရုန်း ၊တင့်ကား တွေနဲ့ ထိုးစစ်ဆင်ခဲ့တာလို့ ဒီးမော့ဆိုမြို့နယ်က ကာကွယ်ရေးရဲဘော်တစ်ဦးကအသိပေးပါတယ်။
“မူးယစ်ဆေးတွေသုံးထားသလိုပဲအသေခံပြီးတက်လာတဲ့သူတွေမှအများကြီး။ကိုယ့်ဘက်ကလည်း အကျရှိပါတယ်။ဒါပေမယ့် သူတို့က တကယ့် လူလှိုင်းလုံးလို သုံးထားတာ။လောလောဆယ်အခြေ အနေအရ မြို့ပေါ်ကိုတော့ လက်လွှတ်ထားရ တာမှန်ပါတယ်”လို့ သူကပြောပါတယ်။
ဒီးမော့ဆိုမြို့နယ်ဟာ ကရင်နီပြည်ရဲ့ စီးပွားရေးအချက်အချာမြို့ဖြစ်ပြီး လွိုင်ကော်-ဒီးမော့ဆိုလမ်းမကြီးနဲ့ ဒီးမော့ဆို-နန်းမယ်ခုံ-မိုးဗြဲလမ်းမကြီး နှစ်ခုနဲ့ရှမ်းတောင်ဘက်ကိုချိတ်ဆက်ထားပါတယ်။
ဒီးမော့ဆို-နန်းမယ်ခုံ-မိုးဗြဲလမ်းဟာလွိုင်ကော်မြို့အတွက် ကာကင်းပုံစံရှိပြီးနှစ်ကုန်မှာလုပ်မယ့် ရွေးကောက်ပွဲအတွက် လုံခြုံစိတ်ချမယ့်အနေ အထားဖြစ်အောင် စစ်ကောင်စီကပြန်ထိန်းချုပ်ဖို့ ကြိုတင်ပြင်ဆင်လိုတဲ့ သဘောလည်းသက်ရောက်တယ်လို့ ကရင်နီစစ်ဘက်သတင်းရင်းမြစ်တဦးကသုံးသပ်ပါတယ်။
“ဒီးမော့ဆိုကိုပေးလိုက်ရရင်ဖရူဆိုလည်းမသေချာတော့သလို၊ နန်းမယ်ခုံမြို့ဆိုတာကလည်း ရန်သူက ပစောက်ပုံသဏ္ဍာန်ဝိုင်းထားပြီးသားဖြစ်နေတယ်။ဖရူဆိုမှာ ရှိတဲ့တပ်တွေမှာလည်း လေထီးနဲ့ခဲယမ်းရိက္ခါတွေ ချပေးထားပြီဖြစ်တဲ့အတွက် ဒီးမော့ဆိုကို အနောက်ဖက်ကနေဖင်နိုက်ပြီးပြန်သိမ်းဖို့ ဟန်ရေးပြင်နေပုံရ။ သူတို့သုံးနေကျ နည်းဗျူဟာက အရှေ့-အနောက်ညှပ်ပြီး တိုက်ယူမယ့် အကွက်ဟောင်းတွေပါပဲဒါကြောင့် ဒီးမော့ဆိုမြို့နယ်ဟာ အဖက်ဖက်ကနေ ခြိမ်းခြောက်ခံနေရပါပြီ။တော်လှန်ရေးအဖွဲ့တွေဟာလည်း အကောင်းဆုံးနဲ့ ညီညီညွတ်ညွတ် ခုခံရမှာဖြစ်သလို ပြည်သူအပေါင်းတို့ကလည်း အတတ်နိုင်ဆုံးကူညီရမှာဖြစ်တယ်။ဗုံးသီး၊ဒရုန်းသီး၊ အမြောက်ဆံ၊ ကျည်ဆံတွေကြားကနေ ခုခံကာကွယ်ပေးနေတဲ့ ကျနော်တို့ရဲ့ ပြည်သူ့ရဲဘော်တွေအတွက်လည်း ဆုတောင်းပေးရမှာဖြစ်တယ်”လို့ သူက ပြောပါတယ်။
ဒီးမော့ဆိုမြို့နယ်မှာစစ်ကောင်စီရဲ့မြိုစောင့်တပ် ရင်းနှစ်ခုဖြစ်တဲ့ (ခလရ ၁၀၂ ၊ ခမရ ၄၂၇) ကလွဲလို့ မြို့နယ် ဧရိယာအများစုကို ၂၀၂၃ နိုဝင်ဘာလကုန်ပိုင်းမှာ ကရင်နီတပ်ပေါင်းစုကထိန်းချုပ်ခဲ့တာဖြစ်ပါတယ်။
ပြီးခဲ့တဲ့နှစ်လယ်ပိုင်းလောက်ကစလို့ ကရင်နီတပ် ပေါင်းစုနဲ့ကာကွယ်ရေးတပ်တွေ ထိန်းချုပ်ထားခဲ့တဲ့ ၊စိုးမိုးထားတဲ့ ဒေသတွေထဲက လွိုင်ကော်မြို့၊မိုးဗြဲ မြို့တွေကို စစ်ကောင်စီက တန်ပြန်ထိုးစစ်ဆင်ပြီးတော့ပြန်လည်ထိန်းချုပ်လာနိုင်ခဲ့တာဖြစ်ပါတယ်။
ကရင်နီပြည်နယ်ထဲမှာ မယ်စဲ့၊ရှားတောမြို့တွေကို ကရင်နီပူးပေါင်းတပ်တွေက အလုံးစုံထိန်းချုပ်ထားပြီး ၊ဖားဆောင်းမြို့နယ်မှာ စစ်ကောင်စီရဲ့နောက်ဆုံးကျန်နေတဲ့ အမှတ်(၁၃၅)ခြေလျင်တပ်ရင်း (ခလရ-၁၃၅) တပ်စခန်းကိုလည်း အပြီးသတ်သိမ်းပိုက်နိုင်ဖို့ ထိုးစစ်ဆင်တိုက်ခိုက်နေပါတယ်။
