သြဂုတ်-၂၉၊ ၂၀၂၅။ လူအေး/People’s Spring
စစ်ကိုင်းတိုင်း၊ ပုလဲ-ဂန့်ဂေါလမ်းပိုင်းမှ ပုလဲမြို့နယ် နှောကန်ကျေးရွာအနီး စစ်ကြောင်းထိုးနေသည့် စစ်ကောင်စီတပ်သည် ယမန်နေ့ ဩဂုတ်လ ၂၈ရက်က မိုင်းမိကာ ထိခိုက်သေဆုံးမှုရှိခဲ့သည်။
အင်အား ၃၀၀ ခန့်ဖြင့် စစ်ကြောင်းထိုးနေသော စစ်ကောင်စီနှင့် ပျူစောထီးပူးပေါင်းစစ်ကြောင်းသည် ကာကွယ်ရေးတပ်များ ထောင်ထားသည့် မိုင်းထိခြင်းဟု မြေပြင်စစ်ရေးသတင်းရင်းမြစ်က ပြောသည်။
“မင်းတိုင်ပင်ရွာကို မီးရှို့ပြီး ဆက်ထွက်နေတဲ့ စစ်ကြောင်း မိုင်းထိတာ။ သုံးယောက်သေပြီး ဒဏ်ရာရတာတွေလည်း ရှိတယ်။ အခုက လမ်းပိုင်းတစ်ခုလုံး ဒီကောင်တွေ အင်အား ၃၀၀ လောက်ရှိနေတယ်”ဟု အဆိုပါ သတင်းရင်းမြစ်ကပြောသည်။
Public Service Announcement
နှောကန်ကျေးရွာသည် မင်းတိုင်ပင်ရွာနှင့် ဆက်စပ်တည်ရှိသည်။ အဆိုပါ စစ်ကြောင်းနှင့် PDF၊ ABSDF ပူးပေါင်းတပ်များသည် မင်းတိုင်ပင်ရွာအနီး ငှက်ပျောတောရွာတွင် ဩဂုတ် ၁၉ရက်က တိုက်ပွဲအပြင်းအထန်ဖြစ်ခဲ့သည်။
စစ်ကောင်စီတပ်ဖွဲ့ဝင် ၇ဦး သေဆုံးခဲ့သော အဆိုပါတိုက်ပွဲကို စစ်ကောာင်စီက လေကြောင်းမှ ဗုံးကြဲပြီး ဩဂုတ် ၂၀ရက်တွင် မင်းတိုင်ပင်ရွာကို မီးရှို့ခဲ့သည်။
လက်ရှိတွင် ပုလဲမြို့နယ်အတွင်း ထိပ်တိုက်ရင်ဆိုင်တိုက်ပွဲရှိမနေဘဲ စစ်ကောင်စီစစ်ကြောင်း အချို့ ရှိနေသည်။
သို့သော် စစ်ကောင်စီက မုံရွာမြို့အခြေစိုက်၊ အနောက်မြောက်တိုင်းစစ်ဌာနချုပ်(နမခ)မှ စစ်မှုထမ်းသင်တန်းဆင်းများအား လေကြောင်းမှ ထပ်မံပို့ဆောင်ခဲ့ကြောင်း ဒေသတွင်းသတင်းရင်းမြစ်အချို့က ပြောသည်။ စစ်ကောင်စီစစ်ကြောင်းများကြောင့် ချောင်းနား၊ မဲဇရပ်၊ ဦးနှောက်၊ ညောင်းရင်းကုန်း၊ တလိုင်းကန်ရွာအပါအဝင် ပုလဲမြို့နယ်အနောက်ပိုင်းရှိ ရွာဆယ်ရွာထက်မနည်းမှ ဒေသခံများတိမ်းရှောင်နေကြရကြောင်း သတင်းရရှိသည်။
ပုလဲမြို့နယ် အင်မထီး၊ ဇီးဖြူကုန်းရွာတို့၌လည်း စစ်ကောင်စီက တပ်စွဲထားပြီး ယင်းနေရာများမှ လက်နက်ကြီးများ ပစ်ခတ်နေသည်။ ပုလဲမြို့နယ်သည် ယင်းမာပင်ခရိုင်၌ ပါဝင်ပြီး ဒေသတွင်းရှိ ဘုတလင်၊ ကနီ၊ ဆားလင်းကြီးမြို့နယ်တို့တွင်လည်း စစ်ရေးတင်းမာနေသည်။
