စက်တင်ဘာ-၁၊၂၀၂၅။ကျော်ဇော/People’s Spring
ပဲခူးတိုင်း၊ ရေတာရှည်မြို့နယ်၊ ပဒဲကျေးရွာအနီး စစ်ကြောင်းထိုးလာတဲ့ စစ်ကောင်စီတပ်ကို မဟာမိတ်တွေနဲ့အတူ ကြားဖြတ်တိုက်ခိုက်ခဲ့တယ်လို့ ဒေသအခြေစိုက်တော်လှန်ရေးတပ်ဖွဲ့တစ်ခုဖြစ်တဲ့ ဝရဇိန်တပ်ဖွဲ့က ထုတ်ပြန်ပါတယ်။
ယမန်နေ့ သြဂုတ် ၃၁ ရက်မွန်းတည့် ၁၂နာရီလောက်က အင်အား ၁၅၀ခန့်ပါတဲ့ စစ်ကောင်စီတပ်စစ်ကြောင်းဟာ ပဒဲကျေးရွာအနီးစစ်ကြောင်းထိုးလာချိန် ဝရဇီန်တပ်ဖွဲ့နဲ့ မဟာမိတ်တွေဖြစ်တဲ့ ဖိုက်တာစားခဲ၊ ပုဝါနီစစ်ကြောင်း၊ သမန်း ကျား စတဲ့တပ်ဖွဲ့တွေက ၁နာရီကြာ ခုခံတိုက်ခိုက်ခဲ့တယ် လို့ ဖော်ပြပါတယ်။
တိုက်ခိုက်မှုအတွင်း စစ်ကောင်စီတပ်စစ်ကြောင်းက ထိခိုက်သေဆုံးမှုရှိနိုင်ပြီး ထိခိုက်သေဆုံးမှုအတိအကျကို ဆက်လက်စုံစမ်းနေတယ်လို့ ဆိုပါတယ်။
Public Service Announcement
အလားတူ သြဂုတ် ၂၇ ရက် ညပိုင်းကလည်း အထက်ပါ အင်အား ၁၅၀ပါစစ်ကြောင်းဟာ ပဒဲကျေးရွာဘက်ကို စစ်ကြောင်းသုံးကြောင်းခွဲပြီး စစ်ကြောင်းထိုးလာစဥ်မှာ တော်လှန်ရေးပူးပေါင်းတပ်တွေက ကြားဖြတ်တိုက်ခိုက်ခဲ့တယ်လို့ ဝရဇီန်တပ်ဖွဲ့က အသိပေးပါတယ်။
“၂၇ ရက်နေ့က သူတို့ညဘက်ပိုင်းလောက် စစ် ကြောင်းထိုးလာတာဗျ။ သူတို့စစ်ကြောင်းကို ကြားဖြတ်တိုက်ခိုက်ခဲ့တာ”လို့ တပ်ဖွဲ့တာဝန်ရှိသူတဦးက လူထုနွေဦးကို ပြောပါတယ်။
ပဒဲကျေးရွာဘက် နှစ်ကြိမ်ဆက်စစ်ကြောင်းထိုးလာတဲ့ စစ်ကောင်စီတပ်စစ်ကြောင်းဟာ တိုက် ခိုက်ခံရတာကြောင့် နှစ်ကြိမ်စလုံး တပ်ပြန်ဆုတ်သွားခဲ့ပြီး ဘယ်နေရာကို တပ်ပြန်ဆုတ်သွားတယ်၊ ဘယ်လိုစစ်ရေးပြင်ဆင်နေတယ်ဆိုတဲ့ နောက်ဆက်တွဲအခြေအနေတွေကိုတော့ မသိရသေးဘူးလို့ အဲဒီတာဝန်ရှိသူက ဆက်ပြောပါတယ်။
တောင်ငူခရိုင်၊ ရေတာရှည်မြို့နယ်၊ စစ်တောင်းမြစ်အရှေ့ဘက်ခြမ်းမှာရှိတဲ့ ပဒဲကျေးရွာကို စစ်ကောင်စီတပ်က လက်နက်ကြီးတွေနဲ့ ပစ်ခတ်တာ၊ ဒရုန်းအသုံးပြု ဗုံးကြဲတိုက်ခိုက်တာတွေကြောင့် နေအိမ်တွေထိခိုက်ပျက်စီးမှုရှိခဲ့သလို ပြည်သူထိခိုက်တာတွေလည်း ရှိခဲ့ဖူးပါတယ်။
