စက်တင်ဘာ-၄၊၂၀၂၅။ဇေအောင်/People’s Spring
မကွေးတိုင်း၊ ရေစကြိုမြို့နယ်မှာ ခလရ (၂၅၈)
တပ်က လက်နက်ကြီးနဲ့ အကြောင်းမဲ့ ပစ်ခတ်တိုက်ခိုက်လို့ ပြည်သူတဦးသေဆုံးခဲ့ကြောင်း သတင်းရရှိပါတယ်။
စက်တင်ဘာ ၂ ရက် နေ့လယ် ၂ နာရီခန့်က ရေစကြိုမြို့မှာ တိုက်ပွဲဖြစ်ပွားခြင်းမရှိဘဲအမှတ်(၂၅၈)ခြေလျင်တပ်ရင်းထဲကနေ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာပါ။ပစ်ခတ်မှုကြောင့် လက်နက်ကြီးတစ်လုံးဟာ သာစည်နှောပင်ရွာထဲက နေအိမ်တလုံးပေါ် ကျရောက်ပေါက်ကွဲပြီး အသက် ၄၀ နှစ်အရွယ် ဒေါ်အမာကြည်ဆိုသူ ပွဲချင်းပြီး သေဆုံးခဲ့ကြောင်း ရေစကြိုသတင်းအချက်အလက်ကော်မတီရဲ့ တာဝန်ရှိသူက ပြောပါတယ်။
Public Service Announcement
“သေဆုံးသူက သူနဲ့သမီးလေးနဲ့ သားအမိနှစ်ယောက်ထဲရှိတာ သမီးလေးကျန်ခဲ့တယ်လို့သိရတယ်”လို့ အထက်ပါတာဝန်ရှိသူက ပြောပါတယ်။ဒါ့အပြင်ထိခိုက်ဒဏ်ရာ ရသူတွေလည်းရှိပြီး ဆေးကုသမှုခံယူနေတယ်လို့ သိရပါတယ်။
သြဂုတ် ၂၄ ရက်ကလည်း ရေစကြိုမြို့ပေါ်က စစ်အုပ်စုကလက်နက်ကြီး၃ လုံးပစ်ခတ်ခဲ့လို့ စစ်ကိုင်းတိုင်း၊ မြောင်မြို့နယ်က အောင်ချမ်းသာရွာကို ကျရောက်ပေါက်ကွဲပြီး ပြည်သူတစ်ဦးသေဆုံးပြီး ၅ ဦး ဒဏ်ရာရရှိခဲ့ကြောင်း သတင်းရရှိပါတယ်။
စစ်ကောင်စီဟာရေစကြိုမြို့နယ်ကိုလက်နက်ကြီးအပြင်လေကြောင်းတိုက်ခိုက်မှုတွေပါမကြာခဏ ပြုလုပ်နေပါတယ်။ သြဂုတ် ၃၁ ရက်ကလည်း ရေစကြိုမြို့နယ်၊ ရေလယ်ကျွန်းဒေသရှိ ငတရော်ရွာကို လေကြောင်းတိုက်ခိုက်ခဲ့လို့ အမျိုးသမီး ၅ ဦးသေဆုံးခဲ့ပြီး ၆ ဦးထက်မနည်း ထိခိုက်ဒဏ်ရာ ရရှိခဲ့ပါသေးတယ်။
