စက်တင်ဘာ-၁၁၊ ၂၀၂၅။ ကျော်ဇော/People’s Spring
တနင်္သာရီတိုင်း၊ ကျွန်းစုမြို့နယ်မှာ စစ်ကောင်စီတပ်သင်္ဘောတစ်စီးနဲ့ ပျူစောထီးတွေလိုက်ပါလာတဲ့ စက်လှေတစ်စီးကို ကြားဖြတ်တိုက်ခိုက်ခဲ့ပြီး စစ်ကောင်စီဘက်မှ ထိခိုက်သေဆုံးမှုရှိတယ်လို့ ကျွန်းစုမြို့နယ် ပကဖ မှ တာဝန်ရှိသူတစ်ဦးက ပြောပါတယ်။
စက်တင်ဘာ ၉ ရက်နေ့ နေ့လယ် ၁၂ နာရီ ၂၀ ခန့်က ကျွန်းစုမြို့နယ်အတွင်း စစ်ကောင်စီပြုလုပ်မယ့် ရွေးကောက်ပွဲနှင့်ပတ်သက်ပြီး ဆောင်ရွက်နေခြင်းရှိ၊မရှိ နယ်မြေရှင်းလင်းရေးလုပ်နေစဥ် 116 စစ်သင်္ဘောတစ်စီးနဲ့ ပျူစောထီးစက်လှေတစ်စီးကို မိုင်းတွေးရွာအနီး တိုက်ခိုက်ခဲ့တာလို့ အဲဒီတာဝန်ရှိသူက ပြောပါတယ်။
“စစ်သင်္ဘောက ရှော်တောမော်ဘက်က လာတာဗျ။ ပျူစောထီးတွေလိုက်ပါလာတဲ့ ခရီးသည်တင်စက်လှေက မိုင်းတွေးကပဲ”လို့ ကျွန်းစုမြို့နယ် ပကဖ တာဝန်ရှိသူက စစ်ကောင်စီတပ်အခြေအနေကို ပြောပါတယ်။
Public Service Announcement
တိုက်ခိုက်ချိန် မိနစ် ၂၀ ခန့်ကြာမြင့်ပြီး 116 စစ်သင်္ဘောနဲ့ ပျူစောထီးများ စီးလာတဲ့ ပါစင်ဂျာလှေတွေဟာ တော်လှန်ရေးရဲဘော်တွေရဲ့ ဝိုင်းဝန်းတိုက်ခိုက်မှုကိုခံခဲ့ရပြီး ဝရုန်းသုန်းကား ထွက်ပြေးဆုတ်ခွာသွားကြတယ်လို့ ကျွန်းစု ပကဖ မှ အသိပေးပါတယ်။
“၂ ဦးထိခိုက်မှုရှိတယ်။ ၁ ဦး ရေထဲကျသေတယ်လို့ ကနဦးသိရပါတယ်။ အပြည့်အစုံကို ဆက် လက်စုံစမ်းဆဲပါ”လို့ ပကဖ တာဝန်ရှိသူက နောက်ဆက်တွဲအခြေအနေကို ပြောပါတယ်။
အထက်ပါတိုက်ခိုက်မှုမှ စစ်ကောင်စီနှင့် ပျူစောထီးအဖွဲ့တွေရဲ့ ထိခိုက်သေဆုံးမှုအခြေအနေအပြည့်အစုံကို ဆက်လက်အတည်ပြုစုံစမ်းနေဆဲဖြစ်ပြီး တော်လှန်ရေးရဲဘော်များ အထိအခိုက်မရှိ အောင်မြင်စွာ တိုက်ခိုက်နိုင်ခဲ့တယ်လို့ အသိပေးထားပါတယ်။
