စက်တင်ဘာ-၁၉၊ ၂၀၂၅။ လူအေး/People’s Spring
ကချင်ပြည်နယ်၊ ဖားကန့်မြို့ မရှီကထောင်ရပ်ကွက်အတွင်းကို ယနေ့ နံနက် ၉နာရီခွဲခန့်တွင် စစ်ကောင်စီက ဒရုန်းဖြင့် ဗုံးကြဲ၍ ဒေသခံနှစ်ဦး သေဆုံးခဲ့သည်။
“ဒရုန်းပျံလာပြီး အကြာကြီးဝဲတယ်။ တချို့က ပေါ့တယ်။ မကြဲဘူးထင်ပြီးနေကြတယ်။ စစ်တပ်က ကြဲတယ်ဗျ။ တခြားကို မရှောင်နိုင်သူလည်း ရှိတာပေါ့ဗျာ။ အခု သေဆုံးတာက ယာယီတဲလေးထဲမှာ နေတဲ့ သားအမိလို့ သိရတယ်ဗျ” ဟု မရှီကထောင်ဒေသခံတစ်ဦးကပြောသည်။
စစ်ကောင်စီ၏ ဗုံးကြဲမှုကြောင့် အမျိုးသားတစ်ဦး၊ အမျိုးသမီးတစ်ဦးသေဆုံးခဲ့သည်ဟု ၎င်းကပြောသည်။
Public Service Announcement
စက်တင်ဘာ ၁၇ရက်ကလည်း ဖားကန့် ဆိပ်မူကျေးရွာကို စစ်ကောင်စီက လက်နက်ကြီး ပစ်ခတ်ရာ အသက် ၉နှစ်အရွယ်ကလေးတစ်ဦး သေဆုံးကာ လေးဦးဒဏ်ရာရခဲ့သည်။ ယမန်နေ့ စက်တင်ဘာ ၁၈ရက်ကလည်း ဆိုင်းတောင်ရွာရှိ ကျောက်စိမ်းတူးဖော်ရေးလုပ်ကွက်ဝင်းထဲသို့ စစ်ကောင်စီက လေကြောင်းမှဗုံးကြဲခဲ့သည်။
အင်အား ၁,၀၀၀ကျော်ပါဝင်သည့် စစ်ကောင်စီစစ်ကြောင်းသည် ပြီးခဲ့သည့် ဇွန်လဆန်းနှင့် ဩဂုတ်လဆန်းတွင် ဖားကန့်သို့ အသုတ်လိုက်ဝင်ရောက်လာပြီး KIA၊KPDF ပူးပေါင်းတပ်များနှင့် တိုက်ပွဲဖြစ်ပွားနေသည်။
စစ်ကောင်စီ စစ်ကြောင်းများသည် ဖားကန့်ဗျူဟာ၊ လုံးခင်းမိုင်းချက်စက်ရုံတို့အပြင် မော်ဝမ်းလေး၊ မော်ဝမ်းကြီး၊ မော်မောင်းလျှံ၊ အမှိုက်ပုံ၊ တောင်ပြို၊ ရှရော်ခ၊ မှော်တောင်း၊ ဆန်းကြွယ်နှင့် ယူမာကျေးရွာတို့၌ရှိနေသည်။
ယနေ့ နံနက်ပိုင်းတွင် လုံးခင်းယမ်းချက်စက်ရုံမှ စစ်ကောင်စီစစ်ကြောင်းတစ်ခုထပ်ထွက်လာ၍ မြေပြင်စစ်ရေးအခြေအနေကို ဒေသခံများက သတိပေးနေကြသည်။
လက်ရှိစစ်ရေးအခြေအနေအရ စစ်ကောင်စီလက်နက်ကြီးအန္တရာယ်နှင့် မြေပြင်စစ်ကြောင်းအန္တရာယ်ကိုအထူးသတိပြုရန် KIA ပြန်ကြားရေးတာဝန်ခံ ဗိုလ်မှူးကြီးနော်ဘူက သတိပေးထားသည်။
