စက်တင်ဘာ−၂၆၊၂၀၂၅။ဇော်ရမ်း/People’s Spring
ရခိုင်ပြည်နယ်၊ ကျောက်တော်မြို့၊သရက်တပင်ရွာနဲ့ မြောက်ဦးမြို့နယ်က ဒိုင်းကျီရပ်ကွက်ကို စစ်ကောင်စီတပ် ဗုံးကြဲမှုကြောင့် ထိခိုက်သေဆုံးသူတွေအတွက် အရပ်ဘက်အဖွဲ့တွေနဲ့ အလှူရှင်တွေစုစည်းပြီး ကျပ်သိန်း ၆၀၀ခန့် လှူဒါန်းခဲ့ကြပါတယ်။
သရက်တပင်ကျေးရွာက စာသင်ကျောင်းနှစ်ကျောင်းကို စစ်ကောင်စီက စက်တင်ဘာ ၁၂ရက်မှာ လေကြောင်းကနေ ဗုံးကြဲတာမှာ ပြည်သူ၂၀ဦးသေဆုံးခဲ့ပြီး ၂၀ဦးထက်မနည်း ဒဏ်ရာရခဲ့ပါတယ်။
ဒိုင်းကျီရပ်ကွက်က အလှူအိမ်တအိမ်ကိုတော့ ဩဂုတ် ၂၅ရက်မှာ ဗုံးကြဲခဲ့လို့ ကလေးငယ်နဲ့အမျိုးသမီးတချို့အပါအဝင် ၁၅ဦး သေဆုံးခဲ့ပါတယ်။
Public Service Announcement
အဲဒီတိုက်ခိုက်မှုကြောင့် ထိခိုက်သေဆုံးသူတွေရဲ့ မိသားစုဝင်တွေကို အရပ်ဘက်အဖွဲ့တွေနဲ့ အလှူရှင်တွေစုစည်းပြီး ကျပ်သိန်း ၅၉၀ ထောက်ပံ့ခဲ့တယ်လို့ ရခိုင်တိုင်းရင်းသားရေးဆောင်ရွက်တဲ့ စာရေးဆရာဝေဟင်အောင်က အသိပေးထားပါတယ်။
စည်းလုံးမှုအင်အားရခိုင်လူငယ်များအသင်း၊ Arakan လူငယ်ပရဟိအသင်းနဲ့ ပြည်တွင်းပြည်ပအလှူရှင်တွေစုစည်းပြီးလှူတာလို့ ဆိုပါတယ်။
” ထိခိုက်တဲ့သူတွေရဲ့ ဘဝအခြေအနေက ပြန်ထူထောင်ဖို့ အရမ်းခက်ပါတယ်။ စိတ်ဒဏ်ရာအကြီးအကျယ်ရကြတယ်။ ဒီလိုပဲ ဝိုင်းဝန်းပေးကြရမှာဖြစ်တယ်”လို့ မြောက်ဦးမြို့က စစ်ဘေးရှောင်တဦးကပြောပါတယ်။
လက်ရှိမှာ ရခိုင်ပြည်နယ်အတွင်း စစ်တွေ၊ ကျောက်ဖြူမြို့နယ်တွေမှာ တိုက်ပွဲတွေဆက်ဖြစ်နေပြီး အာရက္ခတပ်တော်(AA)ထိန်းချုပ်ထားတဲ့ ကျန်မြို့နယ်တွေကိုလည်း စစ်ကောင်စီက လေကြောင်းတိုက်ခိုက်မှုတွေ ပိုလုပ်လာပါတယ်။
စစ်ကောင်စီက ကြည်း၊ ရေ၊ လေတပ်တွေသုံးပြီး ပြည်သူနေအိမ်တွေ၊ အဆောက်အဦ တွေကို
ပစ်မှတ်ထားတိုက်ခိုက်နေဆဲဖြစ်လို့ စစ်ဘေးရှောင်တွေနဲ့ ဒေသခံတွေအတွက် စားဝတ်နေရေးနဲ့ ကျန်းမာရေးဆိုင်ရာအကူအညီတွေ လိုအပ်နေတယ်လို့ လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO)က ထုတ်ပြန်ထားပါတယ်။
ရခိုင်ပြည်နယ်မှာ ၁၀၂၇စစ်ဆင်ရေးစတင်တဲ့ ၂၀၂၃နိုဝင်ဘာကနေ ၂၀၂၅ ဩဂုတ်အထိ စစ်ကောင်စီ တိုက်ခိုက်မှုကြောင့် အသက် ၁၈နှစ်အောက် ကလေးစုစုပေါင်း ၁၈၄ ဦး သေဆုံးပြီး ၄၇၄ ဦး ဒဏ်ရာရရှိခဲ့တယ်လို့ HDCOက ထုတ်ပြန်ထားပါတယ်။ အဲဒီအထဲမှာ လေကြောင်း တိုက်ခိုက်မှု တွေကြောင့် သေဆုံးသူ ၁၀၂ ဦး၊ဒဏ်ရာရသူ၂၁၃ဦး ပါဝင်ပါတယ်။
ကျောင်းသားတွေနဲ့ ကလေးငယ်တွေကို အစုလိုက်၊ အပြုံလိုက် သေဆုံးစေတဲ့ လေကြောင်းတိုက်ခိုက်မှုတွေဟာ စစ်ကောင်စီရဲ့ အလွန်ပြင်းထန်သည့် စစ်ရာဇဝတ်မှုဖြစ်ပြီး အပြည်ပြည်ဆိုင်ရာ အဖွဲ့အစည်းတွေအနေနဲ့ အမြန်ဆုံး တားဆီးဖို့၊ အရပ်သားပြည်သူတွေကို ကာကွယ်ပေးဖို့ HDCOက တိုက်တွန်းထားပါတယ်။
