စက်တင်ဘာ – ၂၆ ၊၂၀၂၅ ၊ဆိုင်းမင်း/People’s Spring
မြင်းခြံမြို့နယ်ထဲက ညောင်ပင်ရွာကို စစ်တပ်က အင်အား၂၀၀ကျော်နဲ့ စစ်ကြောင်းထိုးလာရာ ဒေသခံတွေထွက်ပြေးတိမ်းရှောင်နေရတယ်လို့ သိရပါတယ်။
ညောင်ပင်ရွာရဲ့အနောက်ခြမ်းကို စက်တင်ဘာ ၂၅ရက်ကစတင်ကာ စစ်ကြောင်းရောက်ရှိလာပြီး တော်လှန်တပ်တွေနဲ့ စစ်ရေးတင်းမာမှုတွေရှိနေတာဖြစ်ပါတယ်။
“တိုက်ပွဲတော့မဖြစ်သေးဘူး၊နှစ်ဖက်ဆိုင်ထားတဲ့အနေအထားမှာရှိတယ်” လို့ မြင်းခြံမြို့နယ်ထဲက တော်လှန်ရေးတပ်ဖွဲ့ဝင်တစ်ဦးကပြောပါတယ်။
Public Service Announcement
စစ်တပ်ဘက်က ပစ်ခတ်လိုက်တဲ့ လက်နက်ကြီးကြောင့် ညောင်ပင်ရွာထဲက နေအိမ်နှစ်လုံးမီးလောင်ပျက်စီးခဲ့တယ်လို့ ဆိုပါတယ်။
ညောင်ပင်ရွာက မြင်းခြံမြို့ပေါ်နဲ့ လေးမိုင်ခန့်သာဝေးပြီး အိမ်ခြေ ၄၀၀ခန့်ရှိတဲ့ ကျေးရွာကပြည်သူတွေဟာ လွတ်ရာကိုတိမ်းရှောင်နေရပါတယ်။
စက်တင်ဘာလကုန်ခါနီးအထိ မြင်းခြံမြို့ရဲ့အရှေ့ဘက်နဲ့ အရှေ့မြောက်ဘက်ခြမ်းရှိ ရွာစဉ် ၂၀ကျော်က ပြည်သူ ၇,၀၀၀ကျော်ထွက်ပြေးတိမ်းရှောင်နေရပါတယ်။
ကန့်ဆင့်(တောင်၊မြောက်)၊ဗလုံ၊ တမုန်းကိုင်း၊ပျော်ဘွယ်၊စံပြ၊သဲတော၊ခင်မကန်၊မြောက်ကုန်း၊ဓူဝံ၊တူရွင်းဘို့၊ကျောက်ဖြူကန်၊လက်ဝဲ၊မြင်းနီ၊မာန်လည်၊တောင်သဲတော၊ကန္နားစတဲ့ကျေးရွာတွေက ပြည်သူတွေထွက်ပြေးတိမ်းရှောင်နေရတာဖြစ်ပါတယ်။
စစ်ရှောင်တွေက တောထဲနေရာတွေကို တိမ်းရှောင်နေရသလို မိုးရာသီဖြစ်တဲ့အတွက် အမိုးအကာအလုံအလောက်မရှိတဲ့အတွက် မိုးမိပြီး ဖျားနာတာတွေဖြစ်ပွားနေသလို စားနပ်ရိက္ခာပြတ်လပ်တာတွေပါ ကြုံတွေ့နေရတယ်လို့ သိရပါတယ်။
