စက်တင်ဘာ- ၂၇၊၂၀၂၅။မေရီ/People’s Spring
မန္တလေးမြို့က ထင်ရှားတဲ့ စာရေးဆရာ သင့်နော် ဒီကနေ့ စက်တင်ဘာ ၂၇ ရက် နေ့လယ်ပိုင်းမှာ ကွယ်လွန်သွားခဲ့ပါတယ်။
အသက် ၇၈ နှစ်အရွယ် ဆရာသင့်နော်(ခ)ဦးသန်းဌေးဟာ နေမကောင်းဖြစ်ရာကနေ ကျောက်ကပ်ရောဂါအပါအဝင် အခြားလူကြီးရောဂါတွေကြောင့် ဒီကနေ့ နေ့လယ်ပိုင်းမှာ ကွယ်လွန်ခဲ့တာဖြစ်ကြောင်း မန္တလေး စာပေအသိုင်းအဝိုင်းကနေ သိရပါတယ်။
“နေမကောင်းလို့ စစ်လိုက်တော့ ကျောက်ကပ်ကလည်းမကောင်းတော့ဘူး။တခြားရောဂါတွေကော၊ အစာလည်းမဝင်တော့တာကနေ ဆုံးသွားတာပါ။”လို့ နီးစပ်သူတဦးက ပြောပါတယ်။
Public Service Announcement
ဆရာသင့်နော်ဟာ ၁၉၈၈ အရေးအခင်းကာလကလည်း ခေတ္တဖမ်းဆီးခံရဖူးပါတယ်။ ဆရာဟာ ဥတ္တရလွင်ပြင် စာအုပ်ထုတ်ဝေရေးလုပ်ငန်းနဲ့စာအုပ်ဆိုင်ကိုလည်း လုပ်ကိုင်ခဲ့ပါတယ်။
ဆရာသင့်နော်ဟာ မန္တလေးမြို့သမိုင်းကြောင်းနဲ့ စာပေရေးရာမှာ ကျွမ်းကျင်နှံ့စပ်တဲ့ ပညာရှင်တဦးဖြစ်ကြောင်းစာပေအသိုင်းအဝိုင်းကပြောပါတယ်။
ဆရာသင့်နော် ရေးသားထုတ်ဝေခဲ့တဲ့စာအုပ်တွေအနက် “အတိတ်၊ လူ၊ ပုံရိပ်နှင့် စာအုပ်များ”စာအုပ်ဖြင့် ထွန်းဖောင်ဒေးရှင်းစာပေဆု ရရှိခဲ့ပါတယ်။
ဆရာသင့်နော်နာရေးကို လာမယ့် စက်တင်ဘာ ၂၉ ရက် မနက် ၁၀ နာရီမှာ အေးရိပ်ငြိမ်သုဿန်ကို ပို့ဆောင်သွားမယ်လို့ သတင်းရရှိပါတယ်။
