စက်တင်ဘာ-၃၀၊၂၀၂၅။ကဖီး/People’s Spring
ရှမ်းပြည်နယ်မြောက်ပိုင်း၊ ကျောက်မဲမြို့မှာ တိုက်ပွဲတွေဟာ မြို့နဲ့ပိုနီးလာပြီး ပြင်းထန်နေသလို မြို့ပေါ်က ဌာနဆိုင်ရာအဆောက်အအုံတချို့မီးလောင်နေတယ်လို့ သိရပါတယ်။
ဒီနေ့ နေခင်းပိုင်းကစပြီး ကျောက်မဲမြို့ပေါ်က ဌာနဆိုင်ရာအဆောက်အအုံတချို့ နဲ့ ပြည်ခိုင်ဖြိုးပါတီရုံးမီးလောင်ခဲ့တယ်လို့ဒေသခံအချို့ကပြောပါတယ်။
စစ်တပ်ဝါဒဖြန့် လူမှုကွန်ရက်အကောင့်နဲ့ ချန်နယ်တွေက TNLA တပ်ဖွဲ့ဝင်တွေက မီးရှို့ပြီး ဆုတ်ခွာသွားတာလို့ ဖော်ပြနေကြပေမယ့် အမှန်တကယ်က TNLA တပ်စွဲနိုင်တဲ့ အဲဒီရုံးနေရာတွေကို စစ်တပ်က ဒရုန်းနဲ့ ဗုံးကြဲတာလို့ မြို့ခံတချို့ကပြောပါတယ်။
Public Service Announcement
ကျောက်မဲမြို့ပေါ်ရှိ အဆောက်အအုံအချို့ စက်တင်ဘာ ၃၀ ရက်ကမီးလောင်ကျွမ်းနေစဥ်။ဓါတ်ပုံ-ဒေသခံ ကျောက်မဲမြို့ပေါ်ရှိ အဆောက်အအုံအချို့ စက်တင်ဘာ ၃၀ ရက်ကမီးလောင်ကျွမ်းနေစဥ်။ဓါတ်ပုံ-ဒေသခံ ကျောက်မဲမြို့ပေါ်ရှိ အဆောက်အအုံအချို့ စက်တင်ဘာ ၃၀ ရက်ကမီးလောင်ကျွမ်းနေစဥ်။ဓါတ်ပုံ-ဒေသခံ ကျောက်မဲမြို့ပေါ်ရှိ အဆောက်အအုံအချို့ စက်တင်ဘာ ၃၀ ရက်ကမီးလောင်ကျွမ်းနေစဥ်။ဓါတ်ပုံ-ဒေသခံ
ကျောက်မဲမြို့ပေါ်က မီးသတ်ရုံးနဲ့ ကြံ့ခိုင်ရေးရုံးမီးလောင်ခဲ့ပြီး ညနေပိုင်းမှာတော့ မိုးတွေရွာလို့ မီးငြိမ်းနေပြီလို့ ဒေသခံတချို့က ပြောပါတယ်။
ဒီနေ့ ညနေပိုင်း ကျောက်မဲမှာ တိုက်ပွဲပြင်းထန်နေချိန် ပြင်ဦးလွင်မြို့ပေါ်ကနေ Y12တွေ ဖြတ်ပျံတာအနည်းဆုံး ၃စီးလောက်ရှိတယ်လို့ ဒေသခံတချို့ကပြောပါတယ်။
အဲဲဒီ စစ်ကောင်စီလေယာဉ်တွေဟာ ညနေ ၃နာရီလောက်က စပျံနေပြီး ကျောက်မဲကို ဗုံးသွားကြဲတာဖြစ်မယ်လို့ ပြင်ဦးလွင်မြို့ခံတစ်ဦးက ပြောပါတယ်။
ကျောက်မဲမြို့ပေါ်မှာ ပြည်သူတွေ စစ်ရှောင်သွားကြတဲ့အတွက် မရှိကြတော့ဘဲ တိုက်ပွဲတွေက မြို့နဲ့ နီးလာတယ်လို့ နောင်ချိုမြို့ခံတစ်ဦးက ပြောပါတယ်။
တချို့တွေလည်း ပြေးစရာမရှိဖြစ်နေပြီး နောင်ချိုဘက်လည်း လာမရ၊ လားရှိုးဘက်လည်း သွားဖို့ရာ ခက်နေတယ်လို့ နောင်ချိုမြို့ခံက ဆက်ပြောပါတယ်။
ဒါ့အပြင် တိုက်ပွဲတွေ ပြင်းထန်နေချိန်မှာ လူမှုကူညီရေးလုပ်နေတဲ့ အမျိုးသားတစ်ဦးအပါအဝင် ဒေသခံနှစ်ဦး မိုင်းနင်းမိကာ သေဆုံးသွားခဲ့ပါတယ်။
ကျောက်မဲမြို့ အေးချမ်းသာသုသာန်အနီးမှာ စက်တင်ဘာ ၂၉ရက် မနေ့က မိုင်းနှစ်လုံးပေါက်ကွဲပြီး အမျိုးသားနှစ်ဦး သေဆုံးခဲ့တာပါ။ တစ်ဦးက လူမှုရေးအဖွဲ့တွေကို ကူညီနေတဲ့ အမျိုးသားဖြစ်ပြီး နောက်တစ်ဦးကတော့ နွားကျောင်းနေသူဖြစ်တယ်လို့ သိရပါတယ်။
ကျောက်မဲမြို့အနီးမှာ တအာင်းတပ်မတော်(TNLA)နဲ့ စစ်ကောင်စီတပ်တွေ တိုက်ပွဲပြင်းထန်နေပြီး မြေမြုပ်မိုင်းတွေကို နှစ်ဖက်စလုံးက ထောင်ထားကြတယ်လို့ မြို့ခံတချို့က ပြောပါတယ်။
ကျောက်မဲမြို့ကို TNLA က ၁၀၂၇ စစ်ဆင်ရေးနဲ့အတူ ၂၀၂၄ သြဂုတ်မှာ သိမ်းယူခဲ့တာပါ။
ပြီးခဲ့တဲ့ဇူလိုင်မှာ စစ်ကောင်စီတပ်က နောင်ချိုမြို့ကို ပြန်လည်သိမ်းယူပြီးတဲ့နောက် သြဂုတ် ၁၉ ရက်ကစပြီး ကျောက်မဲမြို့နယ် နောင်ပိန်တိုက်နယ်ကို စစ်တပ်စစ်ကြောင်းဝင်ရောက်လာပါတယ်။
TNLA၊PDF ပူးပေါင်းတပ်တွေနဲ့ စစ်ကောင်စီတိုက်ပွဲ ဖြစ်ခဲ့ပြီး စစ်ကောင်စီစစ်ကြောင်းတွေက ကျောက်မဲမြို့အနီးရောက်လာသလို တိုက်ပွဲတွေ ဆက်လက်ပြင်းထန်နေပါတယ်။
ကျောက်မဲမြို့တိုက်ပွဲနဲ့ပတ်သက်ပြီး TNLAကို People’s Spring က ဆက်သွယ်မေးမြန်းနေဆဲပါ။
