မဲမသမာမှုစွပ်စွဲချက်နဲ့ အာဏာသိမ်းတဲ့စစ်ကောင်စီရဲ့ မဲစာရင်းမှားနေ

အောက်တိုဘာ – ၇ ၊၂၀၂၅

မဲမသမာမှုစွပ်စွဲချက် နဲ့ အကြောင်းပြ အာဏာသိမ်းတဲ့ စစ်ကောင်စီ ကကျင်းပမယ့် ရွေးကောက်ပွဲမှာ အသုံးပြုမယ့် မဲစာရင်းဟာ စစ်ရုံးချုပ်အခြေစိုက်ရာ နေပြည်တော်က မဲစာရင်းမှာတင်အမှားအယွင်းများနေပါတယ်။

စစ်ကောင်စီရဲ့ မဲစာရင်းမှားယွင်းနေတာကို စစ်တပ်ကျောထောက်နောက်ခံပါတီဖြစ်တဲ့ ကြံခိုင်ရေးပါတီရဲ့ နေပြည်တော် နယ်မြေ ဥက္ကဋ္ဌ ဦးလှဆွေက အောက်တိုဘာလ ၅ ရက် မှာ ဖွင့်ချတာပါ။

နေပြည်တော် ၊ ပုဗ္ဗသီရိမြို့နယ်၊ မင်္ဂလာဒီပ ရပ်ကွက် ရဲ့ မဲစာရင်းဆိုရင် သေတဲ့သူတွေ ပါဝင်နေတာ ၊လက်ရှိနေထိုင်နေတဲ့ သူတွေ မပါဝင်ကြဘူးလို့ စစ်တပ်အရာရှိဟောင်းလည်းဖြစ် ၊ ကြံခိုင်ရေးပါတီရဲ့ အမတ်ဟောင်းလည်းဖြစ်သူ ဦးလှဆွေက ပြောပါတယ်။

Public Service Announcement

” မဲစာရင်းတွေက တော်တော်ကို မှားနေတယ်၊ တော်တော်ကိုပြန်ပြင်ရမယ်” လို့ အာဏာသိမ်းစစ်တပ်ကို အားပေးထောက်ခံသူ ဦးလှဆွေက ပြောထားပါတယ်။

မဲစာရင်းမှာ လူ ၅၀၀ ရှိရင် ၃၀၀ လောက်က မှားယွင်းနေတယ်လို့ ဦးလှဆွေက လူမှုကွန်ရက်မှာ ရုပ်သံနဲ့ ဆိုထားပါတယ်။

စစ်တပ်ဟာ အမျိုးသားဒီမိုကရေစီအဖွဲ့ချုပ်ပါတီ (NLD) ထပ်မံအနိုင်ရတဲ့ ၂၀၂၀ အထွေထွေရွေးကောက်ပွဲရဲ့ မဲစာရင်း တွေမှာ သေဆုံးသူတွေ ပါဝင်တာ ၊ အသက်မပြည့်သေးသူတွေ ၊ မှတ်ပုံတင်မရှိသူတွေ ၊အမည်ထပ်နေသူတွေ ပါဝင်နေပြီး ဒါဟာ မဲမသမာမှု တွေဖြစ်တယ်ဆိုတဲ့ စွပ်စွဲချက် နဲ့ ရွေးကောက်ခံအရပ်သားအစိုးရကိုဖြုတ်ချပြီး ၂၀၂၁ ခုနှစ် ၊ဖေဖော်ဝါရီလ ၁ ရက်မှာ အာဏာသိမ်းခဲ့တာပါ။

အဲဒီနောက် ရွေးကောက်ပွဲကော်မရှင်ကိုလည်း အာဏာသိမ်းစစ်ကောင်စီက ပြန်လည်ဖွဲ့စည်းသလို ရွေးကောက်ပွဲအတွက် မဲစာရင်း မှန်ကန်ရေးဆိုတဲ့အကြောင်းပြချက်နဲ့ ၂၀၂၄ ခုနှစ်မှာ သန်းကောင်စာရင်းကောက်ပါတယ်။

သန်းကောင်စာရင်းက ကောက်ယူရရှိတဲ့အချက်အလက်တွေကိုအခြေခံပြီး ရွေးကောက်ပွဲအတွက်မဲစာရင်းပြုစုမယ်လို့အာဏာသိမ်းစစ်ခေါင်းဆောင်က ပြောထားပါတယ်။

လက်ရှိမှာတော့လာမယ့်ဒီဇင်ဘာလ ၂၈ ရက်မှာကျင်းပမယ့် ရွေးကောက် ပွဲအတွက် မဲစာရင်းကို စက်တင်ဘာလ ၃၀ ရက်ကနေ အောက်တိုဘာလ ၁၃ ရက်အထိ ရပ်ကွက် နဲ့ ကျေးရွာ ရွေးကောက်ပွဲကော်မရှင် အဖွဲ့ခွဲ ရုံး တွေမှာ နှစ်ပတ်ကြာ ကြေညာထားပေမယ့် လူထုက အားတက်သရော သွားရောက် ကြည့်ရှု့တာမရှိပါဘူး။

စစ်ကောင်စီရဲ့ ရွေးကောက်ပွဲကော်မရှင်က မဲစာရင်းမှန်ကန်ဖို့ဆိုပြီး အိမ်ထောင်စုတစ်စု ကိုတစ်ဦး မဖြစ်မနေ လာရောက်ကြည့်ရှု့ကြဖို့ စက်တင်ဘာလ ၂၉ ရက်ကကြေညာချက်ထုတ်ပြီး ဖိအားပေးထားပါတယ်။