ချောင်းဦး ဆီမီးထွန်းပွဲ ဗုံးကြဲခံရမှု ကလေးငယ် ၄ ဦးအပါအဝင် ၅ ဦး ထပ်မံသေဆုံး၊ သေဆုံးသူ အနည်းဆုံး ၂၈ ဦးရှိလာ

အောက်တိုဘာ-၈၊၂၀၂၅။ဇေအောင်/People’s Spring

စစ်ကိုင်းတိုင်း၊ ချောင်းဦးမြို့နယ်၊ ဘုံတိုရွာ ဆီမီးထွန်းချိန် ဗုံးကြဲတိုက်ခိုက်မှုကြောင့် သေဆုံးမှုတွေ ဒီကနေ့ညပိုင်းအထိ ထပ်တိုးနေပြီး ၅ ဦး ထပ်မံ သေဆုံးခဲ့ကြောင်း ဒေသခံများက ပြောပါတယ်။

သီတင်းကျွတ်လပြည့်ညက ချောင်းဦးမြို့နယ်၊ ဘုံတိုရွာမှာ ပြည်သူတွေ ဆီမီးထွန်းချိန် စစ်ကောင်စီတပ်က ပါရာမိုတာနဲ့ ဗုံးကြဲတိုက်ခိုက်မှုကြောင့် ပြည်သူ ၂၀ ကျော် သေဆုံးခဲ့ပြီး ၄၀ ကျော် ထိခိုက်ဒဏ်ရာ ရခဲ့ပါတယ်။

​အောက်တိုဘာ ၈ ရက်နေ့မှာလည်း ညပိုင်းအထိ သေဆုံးသူတွေ ထပ်တိုးလာပြီး ကလေး ၄ ဦးအပါအဝင် ပြည်သူ ၅ ဦး ထပ်မံသေဆုံးခဲ့တာ စုစုပေါင်း သေဆုံးသူ ၂၈ ဦးအထိ ရှိလာကြောင်း ဒေသခံ​တွေက ပြောပါတယ်။

Public Service Announcement

“ဆေးရုံတွေက နေရာအနှံ့ ကုသနေကြရတာရယ်။အတည်ပြုမရကြတာက အခက်အခဲကနှစ်မြို့နယ်အကြား ဖြစ်နေတော့ဖြစ်စဉ်တွေက သနားစရာတွေပါ။ အခုညဆုံးသွားတဲ့ ကလေးကကြောင်အမ်းအမ်းရပ်နေတဲ့ အကိုကို တွန်းလှဲပေးရင်းနဲ့သူ့ကိုထိတာ။လည်​ပင်းကနေ အစထိတာ။ အာခေါင်အသက်ရှုလမ်းကြောင်းထဲ ရောက်သွားတာ။ ငါးရိုးမျက်သလိုခံစားနေရတာတဲ့။ အသက်ရှုကျကြပ်ပြီး ဆုံးသွားရတာနေမှာရယ်”လို့ ချောင်းဦးသပိတ်ဆရာတော်က မိန့်ကြားပါတယ်။

ထိခိုက်သူတွေထဲမှာ ခြေလက်အင်္ဂါဆုံးရှုံးသူတွေလည်း များစွာရှိနေပြီး ဆေးကုသမှုခံယူနေယူ​နေ​ပေမယ့်အကူအညီတွေလည်း လိုအပ်နေကြောင်း ဒေသခံတွေက ပြောပါတယ်။

သေဆုံးသူတွေထဲမှာ စစ်ကိုင်းတိုင်းသပိတ်အင်အားစုက ရဲဘော် ၂ ဦး၊ CDM ကျောင်းဆရာတဦးတို့နဲ့ ၎င်းတို့ရဲ့ မိသားစုဝင်တချို့ပါ သေဆုံးခဲ့ရပါတယ်။