နွားထိုးကြီးနဲ့ မြင်းခြံမြို့နယ်ကြားကို စစ်တပ် စစ် ကြောင်းထိုးလို့ ဒေသခံ သောင်းနဲ့ချီ စစ်ရှောင်

အောက်တိုဘာ-၁၅၊၂၀၂၅၊မေ/ People’s Spring

မန္တလေးတိုင်း၊ နွားထိုးကြီးမြို့နယ်နဲ့ မြင်းခြံမြို့နယ်ကြားကို စစ်ကောင်စီတပ်က အင်အားအများအပြားနဲ့ စစ်ကြောင်းထိုးနေလို့ ဒေသခံ သောင်းနဲ့ချီ ဘေးလွတ်ရာရှောင်တိမ်းနေရတယ်လို့ မြင်းခြံမြို့နယ်ပကဖ တာဝန်ခံက ပြောပါတယ်။

ဇူလိုင်နောက်ဆုံးပတ်ကတည်းက အဲဒီမြို့နယ် နှစ်ခုကြားကို စစ်ကောင်စီတပ်က အင်အားထောင်နဲ့ချီ စစ်ကြောင်းထိုးနေတာဖြစ်ပြီး သစ်ပင်ရှည်၊ကျောက်ပြုတ်၊ခင်မကန်၊သဲတော၊ပျော်ဘွယ်၊စံပြ၊ထနောကိုင်း၊ဖုံရွာ၊ရသာ၊ဘလုံ၊တဲရွာ၊ညောင်ပင်ရွာ၊ရွာကြီး၊ရွာသစ်၊စတဲ့ ကျေးရွာတွေအပါအဝင် ကျေးရွာပေါင်း ၂၀လောက်က ဘေးလွတ်ရာတိမ်းရှောင်နေရတာလို့ ဆိုပါတယ်။

“လှည်းရှိတဲ့သူက လှည်း၊ထော်လာဂျီရှိတဲ့သူကထော်လာဂျီ ပေါ်မိုးကာအုပ်ပြီး ရှောင်ရတာ။နောက်ပြီး စစ်ကောင်စီဘက်ကလည်း လက်နက်ကြီး အကြမ်းပတမ်းပစ်ခတ်တာမျိုးကလည်း ကျေးရွာတွေ ပေါ်ကျတာတို့၊တောထဲစစ်ရှောင်တွေပေါ်ကျတာတွေလည်း ရှိတယ်။ထိခိုက်ဒဏ်ရာရဆုံးရှုံးတာ တွေလည်းရှိတယ်”လို့ မြင်းခြံမြို့နယ်ပကဖ တာဝန်ရှိသူတဦးက ပြောပါတယ်။

Public Service Announcement

အဲဒီစစ်ကြောင်းဟာ ဩဂုတ်အတွင်းမှာ တစိုးရွာက မိသားစု၅ဦးကိုလည်း သတ်ဖြတ်ထားပြီး လက်ရှိအချိန်ထိ နွားထိုးကြီး- မြင်းခြံလမ်းပိုင်းကိုစိုးမိုးဖို့အတွက် ကြိုးစားနေတာလို့ သိရပါတယ်။

အဲဒီစစ်ကြောင်းအပြင် နွားထိုးကြီးမြို့နယ်ဘက်ကလည်း စစ်ကြောင်းတကြောင်းရှိပြီး တိုက်ပွဲတွေလည်းဆက်တိုက်ဖြစ်နေကာ စစ်တပ်က နေ့စဉ် လေကြောင်းတိုက်ခိုက်နေတာလည်း လဝက်ခန့်ရှိပြီလို့ ဒေသခံတွေက ပြောပါတယ်။