အောက်တိုဘာ-၂၄၊ ၂၀၂၅။ ထားမြတ်/People’s Spring
ရှမ်းပြည်နယ်မြောက်ပိုင်း ကျောက်မဲမြို့နယ် ကော်ပေါင်ကျေးရွာကို အာဏာသိမ်းစစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ ဘုန်းကြီးတပါး ပျံလွန်တော်မူသွားကြောင်း တအာင်းတပ်မတော်(TNLA)က ထုတ်ပြန်ပါတယ်။
အောက်တိုဘာ ၂၄ရက် ညနေ ၄နာရီလောက်မှာ စစ်ကောင်စီက တိုက်လေယာဉ်နဲ့ ဗုံးလာကြဲတာလို့ ဖော်ပြထားပြီး လူထိခိုက်သေဆုံးမှု ရှိခဲ့သလို အသေးစိတ်အချက်အလက်တွေ ထပ်မံ ဖော်ပြသွားမယ်လို့ အသိပေးပါတယ်။
စစ်ကောင်စီတပ်ဟာ TNLA ထိန်းချုပ်ထားတဲ့ ကျောက်မဲနဲ့ သီပေါမြို့တွေကို ပြန်လည်ရယူထားနိုင်ပေမယ့် မြို့နယ်အတွင်း ကျေးရွာတွေကို လေကြောင်း ဗုံးကြဲတာတွေ ဆက်လက်လုပ်ဆောင်နေတာဖြစ်ပါတယ်။
Public Service Announcement
အောက်တိုဘာ ၁၈ရက်ကလည်း ကျောက်မဲမြို့ (၁၁)မိုင်ရွာကို စစ်ကောင်စီ ဗုံးကြဲလို့ သံဃာ ၂ပါး ထိခိုက်ခဲ့ပြီး နောက်ပိုင်းမှာ ၂ပါးစလုံး ပျံလွန်တော်မူခဲ့ပါတယ်။
စစ်ကောင်စီဟာ TNLA ထိန်းချုပ်မြို့ရွာတွေကို လေကြောင်း စစ်ဆင်ရေးတွေ ဆက်တိုက်ပြုလုပ်နေတာဖြစ်ပြီး အခုအောက်တိုဘာ ၂၄ရက်တာအတွင်း လေကြောင်းကနေ အကြိမ်ပေါင်း ၄၀ ခန့် ဗုံးကြဲတိုက်ခိုက်ခဲ့ပါတယ်။ အဲဒီလို တိုက်ခိုက်ခဲ့လို့ ကလေးငယ်နဲ့ သံဃာ ၃ပါး အပါအဝင် ပြည်သူ ၅၀ ဦးနီးပါး သေဆုံးကာ ၆၀ ကျော် ဒဏ်ရာရရှိခဲ့ကြောင်း TNLA ရဲ့ထုတ်ပြန်ချက်တွေအရ သိရပါတယ်။
စစ်ကောင်စီတပ်ဟာ နိုင်ငံတဝန်း လေကြောင်းဗုံးကြဲတိုက်ခိုက်တာတွေ နေ့စဉ်လုပ်ဆောင်နေပြီး အထူးသဖြင့် အရပ်သား ပြည်သူနေထိုင်ရာတွေကို ပစ်မှတ်ထားတိုက်ခိုက်နေတာဖြစ်ပါတယ်။
