စလော့ဂိမ်းဆော့ရာမှ အကြွေးတင်သွားသည့်လူငယ်တဦးအဆုံးစီရင်

​အောက်တိုဘာ-၂၅၊၂၀၂၅။တာရာ/People’s Spring

ရန်ကုန်မြို့၊တာမွေမြို့နယ်မှာ စလော့ဂိမ်းဆော့ရာမှ အကြွေးတင်သွားတဲ့ လူငယ်တစ်ဦး ​အောက်တိုဘာ ၂၃ ရက်မှာ ကြိုးဆွဲချ အဆုံးစီရင်သွားတယ်လို့ ​ဒေသခံတွေကပြောပါတယ်။

အဆိုပါလူငယ်ဟာ အသက် (၂၂) နှစ်အရွယ် မေတ္တာညွန့် ရပ်ကွက်က အဆောင်တစ်ခုမှာ နေထိုင်နေသူဖြစ်ပါတယ်။ထိုလူငယ်မှာ စလော့ဂိမ်းဆော့ပြီးရှုံးရာမှအကြွေးရာနှင့်ချီပြီးရှိလာပြီး​နောက်သူနေထိုင်ရာအဆောင်မှာပဲ ကြာသာပ​တေး​နေ့မနက် မှာကြိုးဆွဲချ အဆုံးစီရင်သွားတာလို့ ​ဒေသခံအချို့က​ပြောပါတယ်။

အဆောင်နေသူတစ်ဦးက အိမ်သာသွားဖို့ထွက်လာရင်း အခန်းအပြင်လျှောက်လမ်းမှာသူ့ရဲ့ရုပ်အ​လောင်းကိုစမြင်တွေ့ခဲ့တာဖြစ်ပါတယ်။

Public Service Announcement

“သူ့အခန်းဖော်တွေပြောတာကတော့ ကောင်လေးကစလော့ဂိမ်းတွေဆော့တယ်ပြောတယ်။ ရှုံးတော့ ဟိုလူ့ဆီကချေးလိုက် ဒီလူ့ဆီကချေးလိုက်နဲ့ အကြွေးတွေကများသွားတယ်။ပြီးတော့‌လည်း အတိုးတွေနဲ့ချေးတာ။ အကြွေးတွေကရာကျော်တယ်ပြောတယ်။ ဂိမ်းပဲအာရုံရနေတော့အလုပ်မှာလည်းအဆင်မပြေဘူးလို့ကြားတယ်။ အဲဒီဂိမ်းဆော့လို့ ချမ်းသာသွားတဲ့သူမရှိဘူး အကုန်ဘဝပျက်သွားတဲ့သူတွေချည်းပဲ။ ဘဝပျက်တာမှတော်တော်ကိုပျက်ကြတာ” လို့ တာမွေမြို့နယ်တွင် နေထိုင်သူတဦးက ပြောပါတယ်။

အာဏာသိမ်းစစ်တပ်က လတ်တ​လော ​ဒေသတွင်းကျားဖြန့် နဲ့ ပတ်သက်တဲ့သတင်း​​တွေ ​​အ​ပေါ် ပိုအာရုံစိုက်လာချိန် မှာ အွန်လိုင်းဂိမ်းဆော့တယ့်သူတွေကို ထိရောက်စွာအရေးယူမယ်လို့ ကြေညာချက်ထုတ်ပြန်ပြီး ရန်ကုန် နဲ့ မန္တလေးမြို့တွေမှာ အွန်လိုင်းဘောလုံးလောင်းကစား လုပ်ကိုင်နေသူ ၂၇ ဦးကို ဖမ်းဆီးအရေးယူခဲ့တယ်လို့ အောက်တိုဘာလ ၂၃ ရက်‌ နေ့က သတင်းထုတ်ပြန်ထားပါတယ်။

စလော့ဂိမ်းဟာ အွန်လိုင်​ငွေလိမ်လုပ်ငန်း(ကျားဖြန်)​တွေကလုပ်ကိုင်နေတာဖြစ်ပြီး ပြည်တွင်းမှာ ကစားသူများပါတယ်။စစ်တပ်က KK Park ကကျားဖြန့်လုပ်ငန်း​တွေကိုဟန်ပြနှိမ်နင်းမှု​တွေလုပ်​နေ​ပေမယ့် စတားလင့်အင်တာနက်မရ​တော့တဲ့ ကျားဖြန့်လုပ်ငန်း​တွေက မိုင်တဲလ်အင်တာနက်သုံးပြီး လိမ်​​နေကြပြီလို့ စုံစမ်းသိရပါတယ် ။မိုင်တဲလ်က မြန်မာစစ်တပ် နဲ့ ဗီယက်နမ်စစ်တပ်ပူး​ပေါင်းလုပ်ကိုင်​နေတဲ့ ​အော်မ​ရေတာဖြစ်ပြီး အာဏာသိမ်း​ခေါင်း​ဆောင်မင်း​အောင်လှိုင် မိသားစုအစုရှယ်ယာအများစုပိုင်ဆိုင်တဲ့ မိုဘိုင်းလ်​အော်ပ​ရေတာဖြစ်ပါတယ်။

“ကျားဖြန့်တွေ viberကနေ ဂိမ်းလင့်တွေပို့ပြီး ပြန်လိမ်နေပြန်ပြီ။ကျွန်တော်ကို ဒီနေ့ ဂိမ်း SMS viberကနေ တစ်နေ့ထဲ ၃ယောက်လောက်ရှိပြီ ပို့နေတာ”လို့ စ​လော့ဂိမ်းအပါအဝင် အွန်လိုင်းဂိမ်း​တွေကစားကို SMS လက်ခံရရှိသူတဦးက People’s Spring ကို​ပြောပါတယ် ။

ဘိုက်ဘာက​နေ့ ဂိမ်းလင့်ပို့တာမှာတချို့ဖုန်း​တွေက ဖိလစ်ပိုင် ဖုန်းနံမှတ်​တွေအသုံးပြုထားတာ​တွေ့ရတယ်လို့သူကဆက်​ပြောပါတယ်။

စစ်တပ်အာဏာသိမ်းပြီးနောက်ပိုင်း စီးပွား​ရေးကြပ်တည်းမှုတွေကြောင့် ကုန်​ဈေးနှုန်းကြီးတာ၊ အလုပ်အကိုင်ရှားပါးတာအကြောင်းပြချက်မရှိစစ်​ကောင်စီကဖမ်းဆီးဖိနှပ်တာ၊ စစ်သားသစ်အဓမ္မစစ်​ဆောင်းတာစတဲ့ ပြသာနာ​တွေပိုကြီးလာပြီး ပိုက်ဆံကိုအလွယ်နည်းနဲ့ရှာဖွေရာမှ အလိမ်ခံရတာ ၊အ​ကြွေးတင်တာ​တွေ​ကြောင့် ဘဝပျက်သူပိုပိုများလာတယ်လို့ ပြည်သူ​တွေက​ပြောပါတယ်။

ပြီးခဲ့တဲ့ ဇွန်လဆန်းက ထုတ်ပြန်ခဲ့တဲ့ ကုလသမဂ္ဂ ဖွံ့ဖြိုးမှု အစီအစဉ်(UNDP) စစ်တမ်းအရ ရန်ကုန်မြို့ရဲ့လူဦးရေ ၁၀ ဦးမှာ ၄ဦးကျော်က ဆင်းရဲနွမ်းပါးနေတယ်လို့ ဖော်ပြပါတယ်။

UNDP ကထုတ်ပြန်ခဲ့တဲ့ ရန်ကုန်မြို့ပြဆင်းရဲမှု စစ်တမ်းတွေအရ လွန်ခဲ့တဲ့ ၈ နှစ်(၂၀၁၇)က ရန်ကုန်မြို့လူဦးရေ ၁၀ ရာခိုင်နှုန်းက ဆင်းရဲနေသူတွေ ဖြစ်ပြီး စစ်အာဏာသိမ်းပြီး သုံးနှစ်အကြာ ၂၀၂၃ ခုနှစ် အရောက်မှာ​တော့ ဆင်းရဲနွမ်းပါးမှုဟာ ၄၃ ရာခိုင်နှုန်းအထိ တိုးလာတယ်လို့ ​ဖော်ပြထားပါတယ်။ ဒါ​ကြောင့်ဆင်းရဲနွမ်းပါမှုနှုန်းက ၈ နှစ် အတွင်းမှာ သုံးဆ​ကျော်​တောင်တိုးလာတာဖြစ်ပါတယ်။

ရန်ကုန်မြို့ရဲ့ စုစုပေါင်းမြို့ပြလူဦးရေ ခန့်မှန်းခြေ ၆ ဒသမ၂ သန်းရှိတာမှာ၂ ဒသမ ၇ သန်းခန့်က ဆင်းရဲတွင်းနက်နေရပြီးတော့ အရင်ကတည်းက ဆင်းရဲသူတွေကလည်း ပိုဆိုးရွားတဲ့ အဆင်မပြေမှုတွေ ရှိလာတယ်လို့ UNDPက ဖော်ပြပါတယ်။

ဒါအပြင်စစ်တပ်အာဏာသိမ်းပြီး​နောက်ပိုင်း အခုအခါ မြန်မာနိုင်ငံမှာ လူ ၃ ဦးလျှင် ၁ ဦးနှုန်းနဲ့ စုစုပေါင်း လူဦးရေ ၁၆ ဒဿမ ၇ သန်းဟာ ဝမ်းရေးမဖူလုံမှုကို ရင်ဆိုင်နေရပြီး ပြီးခဲ့တဲ့ ၂၀၂၄ ခုနှစ်မှာရှိခဲ့တဲ့ ဝမ်းရေးမဖူလုံသူ လူဦးရေ ၁၃ ဒဿမ ၃ သန်းကနေ သိသိသာသာ တိုးမြင့်လာနေတာလို့ WFPက ဖော်ပြပါတယ်။

“အဲဒီထဲကမှ လူဦးရေ ၂ ဒဿမ ၈ သန်းဟာ ထမင်းတစ်နပ်အတွက် နေ့စဉ်ရုန်းကန်နေရတဲ့ အရေးပေါ်အခြေအနေကို ရင်ဆိုင်နေရပါတယ်” လို့ WFP က ထောက်ပြပါတယ်။ကျန် ၁၄ သန်းခန့် (၁၃.၉ သန်း)ကလည်းဆာ​လောင်မှုကိုရင်ဆိုင်​နေရတာပါ။

မြန်မာနိုင်ငံရဲ့ အခြေခံစားနပ်ရိက္ခာရဲ့ ပျမ်းမျှကုန်စျေးနှုန်းဟာ အာဏာမသိမ်းမီ ၂၀၂၁ ခုနှစ်အစောပိုင်းကာလနဲ့ ယှဥ်မယ်ဆိုရင် အခုအခါ လေးဆအထိ တိုးမြင့်လာခဲ့ပြီလို့ WFP ကဖော်ပြပါတယ်။