နိုဝင်ဘာ ၅၊ ၂၀၂၅။ မေရီ၊ရဲခေါင်/People’s Spring
မန္တလေးတိုင်း၊ မြင်းခြံမြို့နယ် ခမရ(၁၅)တပ်ရင်းအနီး လယ်သစ်ကျေးရွာကစစ်ကောင်စီရဲ့စစ်ဆေးရေးဂိတ်ကို တော်လှန်ရေးတပ်ဖွဲ့တွေ ဝင်ရောက်တိုက်ခိုက်ရာ ထိခိုက်သေဆုံးမှုရှိကြောင်း Zeroပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောပါတယ်။
နိုဝင်ဘာ ၄ရက် နေ့လယ် ၂ နာရီခန့်က မြင်းခြံမြို့နယ် လယ်သစ်ကျေးရွာရှိ စစ်ကောင်စီတပ်၊ ရဲနဲ့ ပျူစောထီးတွေ ပူးပေါင်းထားတဲ့ဂိတ်ကို ဝင်ရောက်တိုက်ခိုက်ခဲ့တာဖြစ်ပြီး တိုက်ပွဲချိန် မိနစ် ၂၀ ကျော်ကြာခဲ့ကြောင်း Zeroပြောက်ကျား တပ်ဖွဲ့ခေါင်းဆောင် ကိုသက်ကြီးက ပြောပါတယ်။
“မြင်းခြံ-တံတားဦး-မန္တလေးလမ်းပေါ်မှာ ရှိတဲ့ရွာ။ မြင်းခြံကနေထွက်တာနဲ့ ပထမဆုံးရွာ။ မြင်းခြံ ခမရ(၁၅)နဲ့ နှစ်မိုင်ပဲဝေးတယ်။ အင်အားကတော့ လေးငါးဆယ်လောက်ရှိမယ်လို့ ခန့်မှန်းတယ်။”လို့ ကိုသက်ကြီးက ပြောပါတယ်။
Public Service Announcement
တိုက်ခိုက်မှုအတွင်း ဂိတ်ဘန်ကာအတွင်းပြေးဝင်ပုန်းတဲ့ စစ်ကောင်စီတပ်သားတွေကို ရဲဘော်တစ်ဦးက RPG နဲ့ ဘန်ကာကို တိကျစွာပစ်နိုင်ခဲ့လို့ သေဆုံးထိခိုက်တာတွေများခဲ့တယ်လို့ အသိပေးပါတယ်။
လက်နက်ဝင်ကောက်မယ့်အချိန် ခမရ (၁၅)က စစ်ကူကား ၃စီးနဲ့ စစ်ကူလာလို့ ပြန်ဆုတ်ခဲ့ပြီး ဆုတ်ခွာချိန် စစ်ကောင်စီသတင်းပေး ၂ ဦးကိုဖမ်းဆီးပြီး သက်ဆိုင်ရာအပ်နှံခဲ့တယ်လို့ Zero ပြောက်ကျားတပ်ဖွဲ့က အသိပေးပါတယ်။
နယ်မြေခံတွေပြောပြချက်အရ စစ်အုပ်စုဝင် ၈ ဦးသေဆုံးကာ ၁၀ ဦး ဒဏ်ရာရပြီး လယ်သစ်ရွာ စစ်ကောင်စီခန့်အုပ်ချုပ်ရေးမှူး ငမင်း(ခ)ကိုမင်းလည်း သေဆုံးကြောင်း၊ သူ့ရဲ့နာရေးကို ဒီမနက် ပြုလုပ်ခဲ့ကြောင်း Zeroပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောပါတယ်။
အဲဒီစစ်ဆင်ရေးကို မြင်းခြံခရိုင်၊တပ်ရင်း(၇)၊zeroပြောက်ကျားတပ်ဖွဲ့နဲ့ ရွှေကံသားစစ်ကြောင်း (မြင်းခြံမြို့နယ်၊ပကဖ) တို့ပူးပေါင်းပြီး စစ်သူကြီး (ဒေါင်းစစ်သည် – zero – column – 5 – )က စစ်ကြောင်းမှူးအဖြစ်ဆောင်ရွက်ကာ ရန်ကုန်အကြီးကောင်စစ်ကြောင်း(၁) – ရွှေကံသားစစ်ကြောင်း(၂)တို့နဲ့ စီးနင်းတိုက်ခိုက်ခဲ့ခြင်းဖြစ်ကြောင်း သိရပါတယ်။
မနေ့ကမနက်ပိုင်းကလည်း Zero ပြောက်ကျားတပ်ဖွဲ့ ၊ တပ်ရင်း(၁) မြင်းခြံခရိုင်နှင့်မြင်းခြံခရိုင် ပကဖ တို့ပူးပေါင်းစစ်ကြောင်းဟာ မြင်းခြံတောင်ဘက်ရှိ အထိုင်စခန်းတခုကိုလည်း စီးနင်းတိုက်ခိုက်ခဲ့ကြောင်း၊ လုံခြုံရေးအခြေအနေအရ အသေးစိတ်ပြောကြားနိုင်ခြင်း မရှိသေးကြောင်း ထုတ်ပြန်ထားပါတယ်။
တိုက်ခိုက်ခံရတဲ့ လယ်သစ်ကျေးရွာ စစ်ကောင်စီဂိတ်ဟာ ခရီးသွားတွေကို မကြာခဏ စစ်ဆေးငွေညှစ်တဲ့နေရာမှာ နာမည်ကြီးကြောင်း ဒေသခံတွေက ပြောပါတယ်။
ပြီးခဲ့တဲ့လ အောက်တိုဘာ ၂၁ ရက်က နွားထိုးကြီး – မြင်းခြံ လမ်းပိုင်းပေါ်မှာ စစ်ကောင်စီယာဥ်တန်းကို Zero ပြောက်ကျားတပ်က တိုက်ခိုက်မှုမှာ စစ်ကောင်စီတပ်သားအချို့သေဆုံးပြီး လက်နက်သုံးလက် ရရှိခဲ့ပါသေးတယ်။
