ဆားလင်းကြီးမှာ စစ်တပ်စစ်ကြောင်းထိုးလို့ ကျေးရွာ ၁၅ရွာက ပြည်သူနှစ်သောင်းကျော် တိမ်းရှောင်ရ

နိုဝင်ဘာ-၆၊ ၂၀၂၅။ဇေအောင်/People’s Spring

စစ်ကိုင်းတိုင်း၊ ဆားလင်းကြီးမြို့နယ်မှာ ဝမ်ပေါင်-ယမ်စီကုမ္ပဏီဝင်းက စစ်ကောင်စီတပ် စစ်ကြောင်းထွက်လာလို့ ကျေးရွာပေါင်း ၁၅ရွာက ဒေသခံပြည်သူ နှစ်သောင်းကျော် တိမ်းရှောင်နေရပြီး အကူအညီတွေ လိုအပ်နေပါတယ်။

ပြီးခဲ့တဲ့ အောက်တိုဘာ ၁၈ ရက်ကစပြီး ဆားလင်းကြီးမြို့နယ်အတွင်းက ကျေးရွာတွေကို ဝမ်ပေါင်-ယမ်စီ ကုမ္ပဏီတွင်းက စစ်ကောင်စီတပ်က စစ်ကြောင်းထိုးဝင်ရောက်နေလို့ ဒီကနေ့အထိ ကျေးရွာ စုစုပေါင်း ၁၅ ရွာမှ ပြည်သူနှစ်သောင်းကျော် တိမ်းရှောင်နေရကြောင်း ဆားလင်းကြီးမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။

ရက်ရှည်တိမ်းရှောင်နေရပြီး လူဦးရေများလွန်းတာကြောင့် အကူအညီတွေလိုအပ်နေတယ်လို့လည်း ဒေသတွင်း စစ်ရှောင်ကူညီနေသူတွေက ပြောပါတယ်။

Public Service Announcement

“ တချို့နေရာတွေမှာ ရေရှားတော့ ရေလိုအပ်တာတွေရှိတယ်ဗျ။ တချို့နေရာကြတော့ စားသောက်ကုန်ဝယ်ရခက်တာတွေရှိတယ်။ ကျန်းမာရေးစောင့်ရှောက်မှုတွေလည်းလိုအပ်မယ်။” လို့ ချင်းတွင်းမြစ်ကမ်းဘေး ကျေးရွာများသပိတ်ကော်မတီရဲ့တာဝန်ရှိသူတဦးက ပြောပါတယ်။

မနေ့က နိုဝင်ဘာ ၅ ရက်အထိလည်း စစ်ရေးတင်းမာမှုတွေရှိနေတယ်လို့ ဒေသခံတွေက ပြောပါတယ်။

“ လက်ရှိကတော့ ဆားလင်းကြီးကို တပ်ချိန်းဖို့ရယ်၊ သတင်းပေါက်တဲ့စခန်းလေးတွေ ဖြိုခွင်းဖို့ပါပဲ။ ဒါပေမဲ့ သူတို့ရှေ့မတိုးနိုင်ပါဘူး။ စစ်ကြောင်းလေးငါးကြောင်းလုပ်တာတောင် လုပ်မရဘူး။” လို့ ဒေသတွင်း ကာကွယ်ရေးအဖွဲ့တဖွဲ့ရဲ့ ခေါင်းဆောင်တဦးက ပြောပါတယ်။

အခြေအနေအရ စစ်ရေးတင်းမာနေပေမဲ့ ဝမ်ပေါင်-ယမ်စီ ကုမ္ပဏီအနီးက ကျေးရွာတွေကတော့ နေရပ်ကို ပြန်ဝင်နေကြောင်း၊ စစ်ကောင်စီတပ်ရဲ့ဖမ်းဆီးသတ်ဖြတ်တာ၊ လူသားဒိုင်းအဖြစ် အသုံးချခံရတာ၊ တိုက်ပွဲကြားပိတ်မိတာတွေ ဖြစ်ပွားနိုင်လို့ နေရပ်ပြန်ဝင်လိုတဲ့ပြည်သူတွေအနေနဲ့ သက်ဆိုင်ရာ ရပ်ကျေးပကဖနဲ့ ပအဖတာဝန်ခံတွေရဲ့ ခွင့်ပြုချက်ရမှသာ ဝင်ရောက်နေထိုင်ဖို့ ဆားလင်းကြီးမြို့နယ် ပြည်သူ့ကာကွယ်ရေးတပ်ဖွဲ့က သတိပေးပါတယ်။

ဝမ်ပေါင်-ယမ်စီ ကုမ္ပဏီတွင်းက စစ်ကောင်စီတပ်ဟာ အာဏာသိမ်းကာလတလျှောက် တရုတ်စီမံကိန်းတွေ လည်ပတ်နိုင်ဖို့အတွက် ဘေးဝန်းကျင်ကျေးရွာတွေကို စစ်ကြောင်းထိုးမီးရှို့တာ၊ ဒေသခံတွေကိုဖမ်းဆီးသတ်ဖြတ်တာတွေ ပြုလုပ်လေ့ရှိပါတယ်။