နိုဝင်ဘာ-၁၀၊၂၀၂၅။ဇော်ဝင်း/People’s Spring
ကရင်နီပြည်နယ်၊ လွိုင်ကော်မြို့နယ်အရှေ့ခြမ်းမှာ စစ်ကောင်စီတပ် စစ်ကြောင်းထိုးလာတာကြောင့် တိုက်ပွဲဖြစ်ပွားနေတယ်လို့ ကရင်နီစစ်ရေးသတင်းရင်းမြစ်အချို့က ပြောပါတယ်။
ဒီကနေ့(နိုဝင်ဘာ ၁၀ရက်) မနက်ပိုင်းကစပြီး လွိုင်ကော်မြို့နယ် ၊ကွန်နားကျေးရွာအနီးမှာ တိုက်ပွဲဖြစ်ပြီး စစ်ကောင်စီက လေကြောင်းက ဗုံးကြဲခဲ့တယ်လို့ ဆိုပါတယ်။
“ အထိနာလို့ လေယာဥ်နဲ့ကြဲတာ။ ရဲဘော်တချို့ ထိခိုက်တာရှိတယ်” လို့ ကရင်နီစစ်ရေးသတင်းရင်းမြစ်က ပြောပါတယ်။
Public Service Announcement
လက်ရှိစစ်ကောင်စီတပ်စစ်ကြောင်းထိုးလာတာကြောင့် ဒေသခံပြည်သူ ၁၀၀၀ထက်မနည်း စစ်ရှောင်နေရပြီး အကူအညီလိုအပ်နေတယ်လို့လည်း သိရပါတယ်။
စစ်ကောင်စီပြန်ထိန်းချုပ်နိုင်ပြီဆိုတဲ့ မိုးဗြဲမြို့မှာလည်း တိုက်ပွဲတွေ ပြန်ဖြစ်နေတယ်လို့ ရှမ်းတောင်အခြေစိုက်ရဲဘော်တစ်ဦးက ပြောပါတယ်။
“ စက်တော်ရာကုန်းဘက်မှာ ဖြစ်တာ။နှစ်ဖက်အထိအခိုက်ရှိတယ်။ဒါပေမယ့် PNO တွေရော၊ စစ်သားတွေ သေတာ ၃၀ကျော်လောက်ရှိတယ်” လို့ ၎င်းက ပြောပါတယ်။
ကရင်နီပြည်နယ်နဲ့ ပြည်နယ်တလျှောက်စစ်ရေးအခြေအနေအရ လွိုင်ကော်၊ဒီးမော့ဆို၊ဖရူဆို၊ဘောလခဲ နဲ့ ရှမ်း -ကရင်နီနယ်စပ် ဖယ်ခုံမြို့နယ်တွေမှာ စစ်ကောင်စီက စစ်မျက်နှာငါးခု ဖွင့်ပြီးထိုးစစ်ဆင်နေတာဖြစ်ပါတယ်။
ကရင်နီပြည်နယ်ကို စစ်ကောင်စီ ထိုးစစ်ဆင်ရာမှာ စစ်မှုထမ်းတပ်သားတွေနဲ့ ပအိုဝ်းပြည်သူ့စစ် PNO တွေ အဓိထားအသုံးပြုထားတယ်လို့ တော်လှန်ရေးတပ်ဖွဲ့တွေက ထုတ်ပြန်ထားပါတယ်။
