ရေဦး၊ခင်ဦး နဲ့ ကန့်ဘလူနယ်စ​ပ်ကရွာပေါင်း ၂၀ ကျော်တိမ်းရှောင်နေရပြီးအကူအညီတွေလိုအပ်နေ

နိုဝင်ဘာ-၁၇၊၂၀၂၅။ဇေအောင်/People’s Spring

စစ်ကိုင်းတိုင်း၊ရေဦး၊ ခင်ဦးနဲ့ ကန့်ဘလူမြို့နယ်စပ်မှာတိုက်ပွဲတွေကြောင့်ကျေးရွာပေါင်း၂၀ ကျော် တိမ်းရှောင်နေရပြီး စစ်ရှောင်ပြည်သူတွေဟာ အကူအညီတွေလိုအပ်နေပါတယ်။

နိုဝင်ဘာဒုတိယပတ်အတွင်းဖြစ်ပွားနေတဲ့ရေဦး၊ ခင်ဦးနဲ့ ကန့်ဘလူနယ်အစပ်ကတိုက်ပွဲတွေကြောင့် ရေဦးနဲ့ခင်ဦးနယ်က ကျောက်တိုင်၊ကျီစု၊ ကန့်ဘလူနယ်က ဝက်တိုး၊အိုင်ပေါင်းချောင်၊ယင်းတိုက်၊ ခင်ဦးနယ်က ငါးရုံကြီး၊ရှားတော၊မုံလှ၊သာဝတ္ထိ၊မြင်းကျ၊သရက်ကုန်း၊ကျွန်းတောကြီး၊ကျွန်းတောလေး(ဥယျာဉ်)၊ မကျီးအုပ်၊ယာတော်၊မြင်းဒေါင်း၊သရက်ပင်စု၊အင်တိုင်းလေးတောင်/မြောက်၊သက်သာပန်းတောင်း(ကားဆိပ်)ရွာတွေက ဒေသခံတွေဟာ ထွက်ပြေးတိမ်းရှောင်နေရကြောင်းခင်ဦးမြို့နယ် သတင်းမှန်ပြန်ကြားရေးအဖွဲ့ကပြောပါတယ်။

နိုဝင်ဘာ ၁၆ ရက်ကလည်း အင်အား ၃၀ဝ ခန့်ပါ စစ်တပ်စစ်ကြောင်းဟာကျောက်တိုင်ရွာကိုဝင်ရောက်မီးရှို့ဖျက်ဆီးခဲ့ကြောင်းခင်ဦးမြို့နယ် သတင်းမှန်ပြန်ကြားရေးအဖွဲ့ကပြောပါတယ်။

Public Service Announcement

“ ရက်ရှည်လာတာနဲ့အမျှ စစ်ရှောင်တွေအတွက် နေစရာ စားစရာ အခက်အခဲတွေ များလာတဲ့အပြင် ဆောင်းရာသီအကူးမှာ ကျန်းမာရေးမကောင်းမှုများ အများစုဖြစ်လာကြောင်း သိရပါတယ်။နေစရာ ဖြစ်သလို တိမ်းရှောင်နေကြရတဲ့အတွက်ကြောင့် ကိုယ်ဝန်ဆောင်မိခင်သည်များ၊ကလေးသူငယ်များနှင့် သက်ကြီးရွယ်အိုများအဓိက နာမကျန်းဖျားနာမှုတွေရှိနေပြီဖြစ်ပါတယ်။” လို့ အထက်ပါအဖွဲ့က ပြောပါတယ်။

နိုဝင်ဘာ ၁၂ ရက်က ကန့်ဘလူမြို့နယ်မှ ခင်ဦးဘက်သို့စစ်ကြောင်းထိုးလာတဲ့အင်အား ၁၀၀ ကျော်ပါ တပ်မ ၃၃ လက်​အောက်ခံစစ်​ကြောင်းကို တော်လှန်ရေးအဖွဲ့တွေက တိုက်ခိုက်ခဲ့ရာ စစ်ကြောင်းပျက်ပြီး စစ်ကြောင်းမှူးအပါ စစ်သား ၅၀ ဦး သေဆုံးကာ စစ်သုံ့ပန်း ၁၅ ဦးနဲ့ လက်နက်ခဲယမ်းတွေကို ရရှိခဲ့ပါတယ်။