နိုဝင်ဘာ-၂၀၊ ၂၀၂၅။ ပုရစ်/People’s Spring
ကချင်ပြည်နယ်၊ ဖားကန့်မြို့နယ်ကို စစ်ကောင်စီက လက်နက်ကြီး၊ လေကြောင်းတိုက်ခိုက်မှုတွေ နေ့စဉ်နီးပါးလုပ်ဆောင်နေသလို ဆဒုံးမြို့နယ်ကိုလည်း လေကြောင်းကနေ ထပ်မံတိုက်ခိုက်လာကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနကဖော်ပြပါတယ်။
နိုဝင်ဘာ ၁၈ရက်နေ့လည်က ဖားကန့်ဒေသ မရှီကထောင်ဂျန်ကတ်မှော်ကို စစ်ကောင်စီတပ်က ဒရုန်းနဲ့တိုက်ခိုက်သွားလို့ ပြည်သူ ၂ဦး ဒဏ်ရာရှိခဲ့တယ်လို့ အသိပေးပါတယ်။
စစ်ကောင်စီတပ်ရဲ့ ဒရုန်းဗုံးကြဲတဲ့နေရာဟာ ဒေသခံပြည်သူတွေ တနိုင်တပိုင်ကျောက်စိမ်းတူးဖော်ရာ နေရာကို တိုက်ခိုက်လာခြင်းဖြစ်တယ်လို့ KIAက ဖော်ပြပါတယ်။
Public Service Announcement
ဖားကန့်တပ်မကုန်း စစ်ကောင်စီတပ်ဟာ ပြည်သူတွေရှိရာနေရာတွေကိုပစ်မှတ်ထားပြီး လက်နက်ကြီး၊ ဒရုန်းတိုက်ခိုက်နေသလိုလေကြောင်း တိုက်ခိုက်မှုတွေလည်း ပြုလုပ်နေလို့ ဒေသခံတွေ ထိခိုက်သေဆုံးမှုတွေ နေ့စဉ်မြင့်တက်လာနေကြောင်း KIAက အသိပေးပါတယ်။
ဒါ့အပြင် KIAသိမ်းထားတဲ့ ဆဒုံးမြို့ဘက်ကို စစ်ကောင်စီက နိုဝင်ဘာ ၁၆ရက်မနက်မှာ လေယာဉ်နဲ့ ဗုံးကြဲတယ်လို့ ဖော်ပြပါတ်ယ။ လေကြောင်းတိုက်ခိုက်မှုကြောင့် ထိခိုက်ဒဏ်ရာရသူနဲ့ နေအိမ်ပျက်စီးမှုတွေရှိကြောင်းလည်း အသိပေးပါတယ်။
စစ်ကောင်စီဟာ စက်တင်ဘာ ၂၉ရက်မှာလည်း ဆဒုံးဒေသကို လေယာဉ်ဗုံးကြဲလို့ ပြည်သူ ၁၁ဦးသေဆုံးခဲ့ကာ ဒဏ်ရာရသူတွေရှိခဲ့ပါတယ်။
KIAနဲ့စစ်ကောင်စီဟာ ဗန်းမော်၊ ဖားကန့်၊ ဝိုင်းမော်၊ ဆော့လော် လန်ဆယ်ဒေသ၊ ခေါင်လန်ဖူးဒေသတွေမှာ တိုက်ပွဲတွေဖြစ်ပွားခဲ့ပြီး စစ်ကောင်စီကလည်း အရပ်သား ပြည်သူနေထိုင်ရာတွေကို ပစ်မှတ်ထား လေကြောင်း တိုက်ခိုက်တာတွေ မကြာခဏ ပြုလုပ်လျက်ရှိပါတယ်။
