နိုဝင်ဘာ-၂၅၊၂၀၂၅။အိမ်သွင်/People’s Spring
ကချင်ပြည်နယ်၊ ဖားကန့်ဒေသမှာ ယခုရက်ပိုင်း တိုက်ပွဲဖြစ်ပွားတာမရှိပေမယ့် စစ်ကောင်စီက လေကြောင်း၊ဒရုန်းအပြင် လက်နက်ကြီးတွေနဲ့ နေ့ရောညပါပစ်ခတ်နေလို့ ဒေသခံတွေ စိုးရိမ်နေကြပါတယ်။
ဖားကန့်မှာ နိုဝင်ဘာ ၁ဝရက်က တိုက်ပွဲအပြင်းအထန်ဖြစ်ပွားပြီးနောက်ပိုင်း ထိပ်တိုက်ရင်ဆိုင်တိုက်ပွဲမဖြစ်တော့ပေမယ့် စစ်ကောင်စီက လေကြောင်း၊ဒရုန်းနဲ့လက်နက်ကြီးတွေ ပစ်ခတ်နေတာလို့ ဒေသခံတွေက ပြောပါတယ်။
မနေ့က ညက ဖားကန့ဒေသ ယူမာကျေးရွာဘက်ကို Y12လေယာဉ်ပျံသန်းသလို ဒရုန်းနဲ့လည်း ဗုံးကြဲခဲ့လို့ ဒေသခံတွေရဲ့ နေအိမ်တချို့ပျက်စီးခဲ့ပါတယ်။ ဒီနေ့ (နိုဝင်ဘာ၂၅ရက်) မနက်ပိုင်းမှာတော့ ကုဋေမှော်နဲ့ မားဆားရွာကြားကို လက်နက်ကြီးနဲ့ပစ်ခတ်ပြီး ခဲမလောင်ကုန်းဘက်ကိုလည်း ဒရုန်းနဲ့ ဗုံးကြဲခဲ့တယ်လို့ သိရပါတယ်။
Public Service Announcement
နိုဝင်ဘာ ၂၀ရက်ညပိုင်းကလည်း ဖားကန့်တပ်မကုန်းနဲ့ မရှီကထောင်ကုန်းကနေ ဆိပ်မူရပ်ကွက်(၁)နဲ့ရပ်ကွက်(၃)ဘက်ကို လက်နက်ကြီးနဲ့ပစ်ခတ်လို့၂နှစ်အရွယ် ကလေး၁ဦးသေဆုံးပြီး ၄ဦး ဒဏ်ရာရခဲ့ပါတယ်။
ဖားကန့်ဒေသမှာ နိုဝင်ဘာ ၁၀ရက်ကနေ ဒီနေ့နိုဝင်ဘာ၂၅ရက်အတွင်း စစ်ကောင်စီက လေကြောင်း၊ဒရုန်း၊လက်နက်ကြီးတွေနဲ့ ပစ်ခတ်လို့ အရပ်သားသေဆုံးသူ ၆ဦးနဲ့ ဒဏ်ရာရသူ ၁၀ဦးရှိခဲ့တဲ့လို့ ဒေသခံတွေက ပြောပါတယ်။
စစ်ကောင်စီက လေကြောင်း၊ဒရုန်း၊လက်နက်ကြီးတွေနဲ့ ပစ်ခတ်နေတဲ့အပြင် အင်အား ၁၀၀ကျော်ပါတဲ့ စစ်ကြောင်းတစ်ခုဟာ ဒီနေ့နေ့လည်ပိုင်းမှာ ကုဋေမှော်ကျေးရွာကို ရောက်ရှိနေတယ်လို့သိရပါတယ်။
လက်ရှိ ဖားကန့်ဒေသတွင်းအခြေအနေတွေနဲ့ ပတ်သက်လို့ ကချင်အမျိုးသားလွတ်မြောက်ရေးတပ်မတော်(KIA)က သီးခြားသတင်းထုတ်ပြန်မထားပေမယ့် စစ်ကောင်စီတပ်စစ်ကြောင်းတွေနဲ့တွေ့ရင် ကြိုတင်ရှောင်တိမ်းဖို့၊ လမ်းပေါ်ထွက်ပြီးကြည့်တာမျိုးတွေမလုပ်ဖို့နဲ့ လေကြောင်းနဲ့လက်နက်ကြီးအန္တရာယ်ကိုလည်းသတိပြုဖို့ သတိပေးထားပါတယ်။
ရွေးကောက်ပွဲကျင်းပဖို့ကြိုးပမ်းနေတဲ့ စစ်ကောင်စီက အရပ်သားပြည်သူတွေကို ဗုံးကြဲတိုက်ခိုက်ပြီး စစ်ရာဇဝတ်မှုကျူးလွန်နေတယ်လို့ ကချင်လူ့အခွင့်အရေးစောင့်ကြည့်ရေးအဖွဲ့ Kachin Human Rights Watch-KHRWက ထုတ်ပြန်ထားပါတယ်။
