ဒီဇင်ဘာ-၁၇၊၂၀၂၅၊ရှိန်း/ People’s Spring
မန္တလေးတိုင်းက သပိတ်ကျင်းမြို့နယ်နဲ့ စစ်ကိုင်းတိုင်းက ခင်ဦးမြို့နယ်အစပ်က ဧရာဝတီမြစ်ဘေးကို စစ်တပ်က လေကြောင်းတိုက်ခိုက်မှုပြုလုပ်ခဲ့တာကြောင့် စစ်ဘေးရှောင်ပြည်သူတွေ ဒါဇင်နဲ့ချီ သေဆုံးတယ်လို့ ကနဦးသတင်းအရ သိရပါတယ်။
သပိတ်ကျင်းမြို့နယ်ထဲကနေ မြစ်ကမ်းကူးကာ စစ်ရှောင်ဖို့ထွက်ခွာနေတဲ့ ပြည်သူတွေကိုမနက် ၉နာရီကစတင်ကာ တံတားဦးလေတပ်က ဂျက်ဖိုက်တာ ၆စီးနဲ့ အကြိမ်၃၀ကျော် လေကြောင်းတိုက်ခိုက်နေတယ်လို့ သိရပါတယ်။
“ သေဆုံး တော်တော်ကိုများတယ်လို့ သိရတယ်။စစ်ရှောင်ထွက် ပြေးနေကြတဲ့ပြည်သူ တွေအများကြီးကို ဆက်တိုက်လိုက်ကြဲနေတာ” လို့ ဒေသခံတဦးက ပြောပါတယ်။
Public Service Announcement
အင်တာနက်နဲ့ဖုန်းလိုင်းအခက်အခဲကြောင့် သေဆုံးမှု အတိအကျကို ဒီနေ့ ညနေပိုင်းအထိ မသိသေးပါဘူး။
မနေ့ကလည်း ခင်ဦးမြို့နယ်နဲ့ ရွှေဘိုမြို့နယ်ကခရီးသည်ယာဉ်တန်းကို လေကြောင်းတိုက်ခိုက်မှု ပြုလုပ်ခဲ့တာမို့ သံဃာတစ်ပါးနဲ့ ပြည်သူ ၃ဦး သေဆုံးခဲ့ပါသေးတယ်။
စစ်ကောင်စီဟာ ကိုယ်တိုင်စီစဉ်ထားတဲ့ ရွေးကောက်ပွဲလုပ်ဖို့ ရက်ပိုင်းအလိုမှာ စစ်ဘေးရှောင်တွေရှိနေတဲ့ ဒေသတွေကို လေယာဉ်နဲ့ ဗုံးကြဲတိုက်ခိုက်တာ အရှိန်မြှင့်လုပ်နေပါတယ်။
