ဒီဇင်ဘာ – ၂၃ ၊၂၀၂၅ ၊ ဆိုင်းမင်း/People’s Spring
ပဲခူးတိုင်း၊ဒိုက်ဦးထောင်မှာထောင်တွင်းဆေးဝါးမလုံလောက်တာကြောင့် ကျန်းမာရေးမကောင်းတဲ့အကျဉ်းသားတွေအတွက်ပြင်ပကနေ ပေးပို့လာတဲ့ ဆေးဝါးတွေကို ထောင်အာဏာပိုင်တွေက ကန့်သတ်ပိတ်ပင်တာလုပ် ဆောင်နေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ပါတယ်။
နှလုံး ၊ ကျောက်ကပ် ၊ ကင်ဆာ နဲ့ သွေးတိုး တို့လို့ ရောဂါဝေဒနာ ခံစားနေရတဲ့ အကျဉ်းသားတွေဆီ မိသားစုက ပေးပို့တဲ့ဆေးဝါးတွေကို စိစစ်တယ်ဆိုတဲ့ အကြောင်းပြချက်နဲ့ကန့်သတ်သိမ်းဆည်းတာတွေပြုလုပ်နေတာပါ။
“အခုကပိုပြီးဆိုးဝါးလာတယ်၊ ထောင်ကိုပို့တဲ့ဆေးဝါးတွေကို ကန့်သတ်တာ၊ပိတ်ပင်တာ၊အချိန်ဆွဲတာ၊ဆေးဝါးတွေကို အကျဉ်းသားတွေလက်ထဲအပြည့်အဝမထည့်ပေးတာ ၊အကျဉ်းတွေရဲ့ ထောင်တွင်းအသက်ရှင်ရပ်တည်ရေးကိုအနှောက်အယှက်ပြုတဲ့လုပ်ရပ်လို့မြင်ပါတယ်”လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က ကိုသိုက်ထွန်းဦးကပြောပါတယ်။
Public Service Announcement
အခုလိုကန့်သတ်ပိတ်ပင်မှုဟာဒိုက်ဦးထောင်မှာ ထောင်ပိုင်အပြောင်းအလဲပြုလုပ်တဲ့ ပြီးခဲ့တဲ့ နိုဝင်ဘာလ နဲ့ ဒီဇင်ဘာလတွေအတွင်း စတင်ခဲ့တာပါ။
ထောင်မှာဆေးဝါးမလုံလောက်တဲ့အတွက်ထောင်ခွင့်ပြုချက်နဲ့ မိသားစုက ပေးပို့တင်သွင်းထားတဲ့ဆေးဝါးတွေကိုလည်း ထောင်ပစ္စည်းမဟုတ်ဘူးဆိုတဲ့အကြောင်းပြချက်နဲ့ သိမ်းဆည်းခံရနေတယ်လို့သိရပါတယ်။
လုံလောက်တဲ့ ဆေးဝါးကုသခွင့်ရဖို့ တောင်းဆိုတဲ့အခါမှာ တော့ တင်ပြသူတွေကို ရိုက်နှက်တာတွေ ရှိနေတယ်လို့ PPNM ထံက သိရပါတယ်။
စစ်တပ်အာဏာသိမ်းထားတဲ့ ငါးနှစ်တာကာလအတွင်း အကျဉ်းထောင်တွေမှာ လုံလောက်တဲ့ဆေးဝါးကုသခွင့်မရလို့ ဆုံးပါးခဲ့တဲ့ နိုင်ငံရေးအကျဉ်းသား ၁၄၀နီးပါးရှိခဲ့တယ်လို့ မြန်မာ့အကျဉ်းထောင် သက်သေ (MPW) က လည်း အခုလ ဒီဇင်ဘာ၁၄ရက်မှာ ထုတ်ပြန်ထားပါတယ်။
