ဒီဇင်ဘာ-၃၀၊၂၀၂၅။အိမ်သွင်/People’s Spring
အောင်လံမြို့အခြေစိုက် အမှတ်(၁၅) ကာကွယ်ရေးပစ္စည်းစက်ရုံ (ကပစ-၁၅)မှ စစ်တပ်က လက်နက်ကြီးနဲ့ ပစ်လို့ မိသားစုဝင် ၄ဦး သေဆုံးခဲ့ပါတယ်။
အောင်လံမြို့နယ်၊ဆက်ဆူဝရွာကိုဒီဇင်ဘာလ ၂၉ရက် ညမှာ ကပစ(၁၅)ကနေ လက်နက်ကြီး ၅ လုံးပစ်ခတ်ခဲ့တာလို့ ဒေသခံတစ်ဦးကပြောပါတယ်။
“ အိမ်တည့်တည့်ထိတာ။သေဆုံးသူလေးဦးက မိသားစုဝင်တွေဖြစ်တယ်။ ရွာခံတွေလည်း မနေရဲလို့ ပြေးနေကြရတယ်” လို့ ဒေသခံသတင်းရင်းမြစ်ကဆိုပါတယ်။
Public Service Announcement
အမှတ်(၁၅)ကာကွယ်ရေးပစ္စည်းစက်ရုံ – ကပစ(၁၅)ဟာ မကွေးတိုင်း၊ အောင်လံမြို့နယ်၊ ရွာမထုံးရွာအနီးမှာ ရှိတာပါ။
ဒီဇင်ဘာလ ၂၈ ရက်နေ့က အောင်လံမြို့နယ်မှာ စစ်တပ် ရွေးကောက်ပွဲလုပ်နေစဉ်ဆက်ဆူဝရွာကစစ်တပ်ဂိတ်ကိုတော်လှန်ရေးတပ်ဖွဲ့တွေက တိုက်ခိုက်ခဲ့ပါတယ်။ တိုက်ခိုက်ခံရပြီးတဲ့နောက်ပိုင်း စစ်တပ်က ဆက်ဆူဝကျေးရွာနဲ့အနီးဝန်းကျင်ကျေးရွာတွေကို စစ်ကြောင်းထိုးနေပြီး ကပစ(၁၅)ကနေပါ လက်နက်ကြီးပစ်ခတ်နေတယ်လို့ တော်လှန်ရေးရဲဘော်တစ်ဦးကပြောပါတယ်။
ပြီးခဲ့တဲ့ ရက်အနည်းငယ်ကလည်း အောင်လံမြို့နယ် တံခွန်တိုင်ကျေးရွာနဲ့ လှေဒုန်းကျေးရွာကြားမှာ တိုက်ပွဲဖြစ်ခဲ့ပြီး အရပ်သား ၈ ယောက်ကို စစ်တပ်က ဖမ်းဆီးခဲ့ပါတယ်။အဲ့ဒီထဲက သက်ကြီးရွယ်အို ၆ဦးကို ပြန်လွှတ်ပေးခဲ့ပေမယ့် လူငယ်တစ်ဦးကိုစစ်တပ်ကသတ်ဖြတ်ပြီးတစ်ဦးကို ဆက်လက်ဖမ်းဆီးထားပါတယ်။
မကွေးတိုင်းထဲက စလင်းမြို့နယ်နဲ့ ပွင့်ဖြူမြို့နယ် အပါအဝင် မြို့နယ် ၆ခုက စစ်တပ်ခန်းတွေကို ပြည်သူ့ကာကွယ်ရေးတပ်တွေက မကွေးတိုင်းစစ်ဌာနရဲ့ ဦးစီးကွပ်ကဲမှုနဲ့ ထိုးစစ်ဆင်တိုက်ခိုက်နေပါတယ်။ လက်ရှိ စစ်ဆင်ရေးအတွင်း လေယာဉ်ဗုံး တွေထုတ်လုပ်နေတဲ့ ဆိပ်ဖြူမြို့နယ်က ကပစ (၂၁)၊ ကပစ (၂၂) နဲ့ လက်နက်ကြီး ကျည်ဆံ တွေထုတ်လုပ်တဲ့ ပေါက်မြို့နယ်က ကပစ (၂၄) တို့ကို သွယ်တန်းထားတဲ့ လျှပ်စစ်ဓါတ်အားလိုင်းတွေကိုလည်း မိုင်းခွဲတိုက်ခိုက်ခဲ့ပါတယ်။
မကွေးတိုင်းထဲကယောဒေသဂန့်ဂေါခရိုင်မှာလည်း Yawland Opreationစစ်ဆင်ရေးအဖြစ် စစ်တပ်တပ်စွဲထားတဲ့ပျူစောထီးကျေးရွာတွေနဲ့ စစ်စခန်း တွေကိုဒီဇင်ဘာလ ၂၇ ရက် မနက် ၅ နာရီကစပြည်သူကာကွယ်ရေးတပ်ဖွဲ့တွေက တိုက်ခိုက်နေပါတယ်။
