ဇန်နဝါရီ – ၁၉ ၊၂၀၂၆ ၊ ဆိုင်းမင်း/People’s Spring
စစ်ကောင်စီရဲ့အလယ်ပိုင်းတိုင်းစစ်ဌာနချုပ်အခြေစိုက်ရာ မန္တလေးမြို့က မြို့နယ်အချို့မှာ စစ်ကောင်စီရဲ့အောက်ခြေ ရပ်ကျေး အုပ်ချုပ်ရေးမှုး တွေက ပျုစောထီးတွေနဲ့ ပေါင်းပြီး ငွေညှစ်တာတွေ ပြုလုပ်နေတယ်လို့ မြို့ခံတွေဆီကသိရပါတယ်။
အထူးသဖြင့် ပြည်ကြီးတံခွန် နဲ့ ပုသိမ်ကြီးမြို့နယ်တွေ မှာ ငွေညှစ်တာတွေ အများဆုံးကြုံနေရတာပါ ။
စစ်မှုထမ်းအတွက် ဖမ်းဆီးငွေညှစ်တာ ၊ ဧည့်စာရင်းတိုင်ရာမှာ ငွေညှစ်တာအပြင်လမ်းသွားလမ်းလာတွေကိုစစ်ဆေးပြီးငွေညှစ်တာမျိုးတွေ လုပ် ဆောင်တာလို့သိရပါတယ်။
Public Service Announcement
ပြည်ကြီးတံခွန်မှာဆိုရင် ပျုစောထီးခေါင်းဆောင် စံရှားဆိုသူ ဦးဆောင်တဲ့အဖွဲ့က အရပ်သားတွေကို ဖမ်းဆီးငွေညှစ်တာတွေကို အုပ်ချုပ်ရေးပိုင်းနဲ့ ပူးပေါင်းလုပ်ဆောင်နေတယ်လို့မြို့ခံတစ်ဦးက ပြောပါတယ်။
“နေရာတကာမှာ သေနတ်ကြီးတကားကား၊ လမ်းမှာမထင်ရင်မထင်သလို ကားရပ်ပြီးဆင်းစစ်သေးတာ၊အုပ်ကြီးတွေနောက်လည်း ဒီကောင်တွေအမြဲပါတယ်”လို့ ပြည်ကြီးတံခွန်မြို့နယ်မှာ နေထိုင်သူတစ်ဦးကဆိုပါတယ်။
ပြည်ကြီးတံခွန် မှာ ရပ်ကွက် ထောက်ခံစာသွားလုပ်ရင်လည်း အချိန်ပေးရသလို ထောက်ခံစာတစ်စောင်ကို ကျပ်ငါးသောင်းထက်နည်းပေးရတာ ကြုံခဲ့သူတွေရှိခဲ့ပါတယ်။
ဧည့်စာရင်းတိုင်မယ်ဆိုရင်လည်း ကျပ်သုံးသိန်းထိပေးရတာရှိနေတယ်လို့မြို့ခံတွေဆီကစုံစမ်းသိရ ပါတယ်။
ပြည်ကြီးတံခွန်မြို့နယ်ထဲက ၅၆လမ်းနဲ့၁၂၀လမ်းရှိ သင်ပန်းကုန်းရပ်ကွက်ရုံး၊စက်မှု(၁)နဲ့ စက်မှု(၂)ရပ်ကွက်ရုံးတွေမှာပျူစောထီးတွေအထိုင်ချထားပြီး လမ်းသွားလမ်းလာမှန်သမျှ စစ်ဆေးဖမ်းဆီးတာတွေ ပြုလုပ်နေတာဖြစ်ပါတယ်။
“သင်ပန်းကုန်းရပ်ကွက်ရုံးရှေ့ ညနေဆိုမဖြတ်ရဲဘူး၊ ဖမ်းပြီးရိုက်တယ် ငွေညှစ်တယ်”လို့ ကိုယ့်တွေ့ကြုံခဲ့တဲ့ သင်ပန်းကုန်းရပ်ကွက်နေထိုင်သူတစ်ဦးကပြောပါတယ်။
ပုသိမ်ကြီး၊ပြည်ကြီးတံခွန်နဲ့ ချမ်းမြသာစည်မြို့နယ်အစပ်၊ ၄၄လမ်းနဲ့၁၂၀လမ်းကရဲနဲ့ပျူစောထီးဂိတ် ဆိုရင်လည်း လမ်းသွားလမ်းလာလူငယ်တွေကို ပစ်မှတ်ထားဖမ်းဆီးပြီး ခြိမ်းခြောက်ငွေညှစ်ရာမှာ နာမည်ကြီးနေပါတယ်။
ဒါအပြင် ပုသိမ်ကြီးမြို့နယ်အတွင်းက ရွာရှည်၊ သလဲကုန်းကျေးရွာတွေဘက်မှာလည်း ရပ်ကျေး အုပ်ချုပ်ရေးမှုးတွေ နဲ့ ပျူစောထီး နှုတ်ခမ်းမွှေးတို့အဖွဲ့ကလည်း ရွာသူ၊ရွာသားတွေကို ငွေတောင်းတာတွေပြုလုပ်နေတယ်လို့ ဒေသခံအချို့ကအသိပေးပါတယ်။
ရွာသူ ၊ရွာသားတွေကို ညအချိန်မတော်အပြင်ထွက်တာ ၊ မဲရင်းအမှတ်စဉ် မကြည့်ထားတာ ၊ PDF နဲ့အဆက်အသွယ်ရှိတယ်ဆိုတဲ့ အကြောင်းပြချက်မျိုးစုံနဲ့ အာဏာပြနေတယ်လို့ သိရပါတယ်။
မန္တလေးမြို့ပေါ်လည်းပျုစောထီးတွေဟာလိုင်စင်မဲ့ကားတွေကိုပေါ်ပေါ် ထင်ထင်စီးနင်းနေပြီး အဲဒီကားတွေနဲ့ ကင်းပတ်တာတွေကို လုပ်ဆောင်ပါတယ်။
စစ်ကောင်စီရဲ့ထိန်းချုပ်မှုအောက်မှာရှိတဲ့ မန္တလေးမြို့မှာ ပျုစောထီးတွေကိုအသုတ်လိုက်စစ်သင်တန်းပေးပြီး လက်နက်တပ်ပေးကာ မြို့လုံခြုံရေးအတွက် ကင်းချတာ ၊ ယခင်က မန္တလေး PDF နဲ့ တိုက်ပွဲတွေဖြစ်ခဲ့ရာ မတ္တရာ ၊ စဉ့်ကူးနယ်ဘက်က တိုက်ပွဲတွေမှာထည့်သုံးတာတွေ ရှိခဲ့ပါတယ်။
