ဇန်နဝါရီ-၂၀၊၂၀၂၆။ဇော်ဝင်း/People’s Spring
စစ်ကိုင်းတိုင်း၊ ဗန်းမောက်မြို့ ရပ်ကွက် ၂ခုကို စစ်တပ်ပြန်ရပြီး တိုက်ပွဲဆက်ဖြစ်နေတယ်လို့ သတင်းရရှိပါတယ်။
တော်လှန်ရေးတပ်တွေရဲ့ ဗန်းမောက်မြို့သိမ်းအပြီး ၄လနီးပါအကြာမှာ ရှမ်းနီပြည်သူ့စစ်(SNA)နဲ့ စစ်တပ်ရဲ့တန်ပြန်ထိုးစစ်ကို အပြင်းအထန် ခုခံနေတယ်လို့ မြေပြင်ရဲဘော်အချို့က ပြောပါတယ်။
ဗန်းမောက်မြို့ရဲ့ လွှစင်ကုန်း၊မြနန္ဒာ၊မြို့မနဲ့ အောင်သာကုန်းရပ်ကွက် လေးခုထဲက မြို့အနောက်ဘက်ခြမ်းမှာရှိတဲ့ လွှစင်ကုန်းနဲ့ မြနန္ဒာရပ်ကွက်တွေကို စစ်တပ်ပြန်ရသွားတာလို့ ရဲဘော်တွေက ပြောပါတယ်။
Public Service Announcement
“ အခုကတော့ မြို့ထဲမှာဘဲရှိတုန်း ကျွန်တော်တို့လည်း။တိုက်ပွဲကတော့ နေ့တိုင်းပဲ” လို့ ဗန်းမောက်မြို့နယ်ကာကွယ်ရေးရဲဘော်တစ်ဦးက လူထုနွေဦးကို ပြောပါတယ်။
ဒါ့အပြင် တိုက်ပွဲအတွင်း ရဲဘော်အချို့ဖမ်းဆီးသတ်ဖြတ်ခံရတဲ့ သတင်းတွေနဲ့ပတ်သက်ပြီး အတည်မပြုနိုင်သေးဘူးလို့ သူက ဆိုပါတယ်။
ဇန်နဝါရီ ၁၈ရက်က မြနန္ဒာရပ်ကွက်ကို စစ်တပ်ပြန်ရပြီး PDF ရဲဘော်တစ်ဦး ရုပ်အလောင်းနဲ့ လက်နက်ခဲယမ်းတချို့ရရှိတယ်လို့ ရှမ်းနီပြည်သူ့စစ် SNAက ဝါဒဖြန့်ထားပါတယ်။
ဗန်းမောက်မြို့ကိုရဖို့ စစ်တပ်က မြို့ အနောက်ဘက်ခြမ်းကနေ အကြိမ်ကြိမ်ထိုးစစ်ဆင်ခဲ့ပြီး SNAနဲ့ စစ်ကိုင်းအခြေ စိုက် တပ်မ(၃၃)လက်အောက်ခံတပ်ရင်းတွေ အပါအဝင် တပ်မ(၇၇)လက်အောက် ခံတပ်ရင်းအချို့လည်းရှိတယ်လို့လည်း စစ်ရေးသတင်းရင်းမြစ်တွေက ပြောထားပါတယ်။
ဗန်းမောက်မြို့ကို အမှတ်(၁)စစ်ဒေသကွပ်ကဲမှုနဲ့ ပြီးခဲ့တဲ့ ၂၀၂၅ စက်တင်ဘာ ၂၀ရက်မှာ သိမ်းပိုက်ခဲ့တာဖြစ်ပါတယ်။
ဗန်းမောက်မြို့နယ်ဟာ အမျိုးသားညီညွတ်ရေးအစိုးရလက်အောက် တပ်ရင်း၊တပ်ဖွဲ့တွေ သိမ်းပိုက်ထိန်းချုပ်ထားတဲ့ အင်းတော်၊ မော်လူး နဲ့ ပင်လည်ဘူးမြို့အနီးမှာရှိပါတယ်။ ကားလမ်းအတိုင်းဆိုပါက အင်းတော်နဲ့ မိုင်(၃၀)၊ မော်လူးနဲ့ မိုင်(၅၀)နဲ့ ပင်လည်ဘူးမြိုနဲ့ (၆၁) မိုင်ဝန်းကျင် ကွာဝေးပါတယ်။
