ဇန်နဝါရီ -၂၁၊၂၀၂၆။မိုမို/People’s Spring
မန္တလေးတိုင်း၊တောင်သာမြို့နယ် ရွေးကောက်ပွဲလုံခြုံရေးအတွက် စစ်ကြောင်းထိုးလာတဲ့ စစ်တပ်နဲ့ တိုက်ပွဲဖြစ်တယ်လို့ တောင်သာမြို့နယ် ပြည်သူ့ကာကွယ်ရေးအဖွဲ့(ပကဖ)က ထုတ်ပြန်ပါတယ်။
အင်အား ၂၀၀ဝန်းကျင်ပါတဲ့ စစ်တပ် စစ်ကြောင်းက ကျောက်ပန်းတောင်းမြို့နယ်ကနေ တောင်သာ မြို့နယ်ကို ဇန်နဝါရီ ၁၆ ရက်က ဝင်ရောက်လာတယ်လို့ ဆိုပါတယ်။
ရွာသာလေး၊ သမက္ကူဆည်ဘောင်၊ ဂက်စ်ပိုက်လမ်း၊ ကြည်နူး၊ ကျောက်ပေါက်ရိုး၊အေးရွာ၊ ဝဲလောင်၊ကျောက္ကာရွာ၊ထနောင်းကုန်းရွာ၊ ပုဒါတ်စကုန်းရွာနဲ့ ကန်သာယာကျေးရွာတွေကနေ တဆင့် ဆင်တဲဝချောင်းကို ဖြတ်ပြီး တောင်သာမြို့ကိုဝင်ရောက်ဖို့ အင်အားပြင်ဆင်ခဲ့တယ်လို့ အသိပေးပါတယ်။
Public Service Announcement
အဲဒီစစ်ကြောင်းသွားရာ လမ်းကြောင်းကို တော်လှန်ရေးအင်အားစုတွေက ပြောက်ကျားတိုက်ခိုက်ခဲ့တဲ့အပြင် ဒရုန်းတွေနဲ့လည်း တိုက်ခိုက်ခဲ့တယ်လို့ တောင်သာ ပကဖက ထုတ်ပြန်ပါတယ်။
တိုက်ခိုက်မှုနဲ့ပတ်သက်လို့ စစ်တပ်ရဲ့ အထိအခိုက်အကျအဆုံးမသိရဘဲ ကန်သာယာနဲ့ နတ်စောင့်ကျေးရွာဆီ ဦးတည်ပြီး အဲဒီကနေတောင်သာမြို့ကို ရောက်သွားတယ်လို့ ထုတ်ပြန်ချက်မှာ ဖော်ပြပါတယ်။
“ကိုယ့်ဘက်က လန/ခယ(လက်နက်၊ခဲယမ်း) မလုံလောက်မှုကြောင့် ရည်မှန်းထားတဲ့ထိ မဖြစ် မြောက်ခဲ့ဘူး။ရန်သူဘက်ကတော့ ထိခိုက်မှုတွေရှိတယ် မျက်မြင်ပါပဲ”လို့ တောင်သာမြို့နယ်ကာကွယ်ရေးတပ်ဖွဲ့ဝင်တစ်ဦးက ပြောပါတယ်။
စစ်တပ်စစ်ကြောင်းဟာ ဇန်နဝါရီ ၂၅ ရက်မှာ တောင်သာမြို့ပေါ်မှာလုပ်မယ့် ရွေးကောက်ပွဲကို လုံခြုံရေးယူမယ်လို့လည်း သိရပါတယ်။
၂၀၂၅ ဒီဇင်ဘာ ၂၈ ရက်ကစပြီး အာဏာသိမ်းစစ်တပ်က ရွေးကောက်ပွဲကို မြို့နယ်အလိုက် အပိုင်းသုံးပိုင်းခွဲ ပြုလုပ်ခဲ့ပြီး တော်လှန်ရေး အင်အားစုတွေက အတုအယောင်ရွေးကောက်ပွဲလို့ ကြေညာပြီး စစ်တပ်ရွေးကောက်ပွဲ လုပ်တဲ့ ဒေသတွေနဲ့ မြို့တွေကို တိုက်ခိုက်သိမ်းပိုက်တာရှိပါတယ်။
(တောင်သာမြို့နယ် ပြည်သူ့ကာကွယ်ရေးအဖွဲ့(ပကဖ)က ရဲဘော်တွေကို တွေ့ရစဉ်။ ဓာတ်ပုံ – တောင်သာ ပကဖ)
