ဖေဖော်ဝါရီ- ၂၊၂၀၂၆။မိုမို/People’s Spring
မကွေးတိုင်း၊ သရက်မြို့နယ်က အမှတ်(၁၂) ကာကွယ်ရေးပစ္စည်းစက်ရုံ(ကပစ-၁၂)ကို တိုက်ခိုက်ခဲ့တယ်လို့ သရက်ခရိုင် အမှတ်(၄) တပ်ရင်း တာဝန်ရှိသူက ပြောပါတယ်။
အကြီးစားလက်နက်တွေဖြစ်တဲ့ ၁၂၀ မမ၊ ၆၀မမနဲ့ ၄၀ မမ ဗုံးသီးတွေ ထုတ်တဲ့ ကပစ(၁၂)ကို မနေ့က (ဖေဖော်ဝါရီ ၁ ရက်) မနက် ၄ နာရီခွဲက လက်လုပ်ရော့ကတ်တွေနဲ့ တိုက်ခိုက်ခဲ့တာလို့ ဆိုပါတယ်။
“ဒေသတွင်းမှာ ဒီစက်ရုံကပဲ စစ်ရေးလုံခြုံရေးတွေ အဓိကလုပ်နေတာ။ စကမ(စစ်ကော်မရှင်)ရဲ့ အရေးပါတဲ့ ကပစ စက်ရုံလည်းဖြစ်တယ်”လို့ အထက်ပါတာဝန်ရှိသူက တိုက်ခိုက်ခဲ့မှုကို ရှင်းပြပါတယ်။
Public Service Announcement
စက်ရုံအတွင်းက ပစ်မှတ်အဆောက်အဦးတွေကို ပစ်ခတ်နိုင်ခဲ့ပြီး ထိခိုက်ပျက်စီးမှုတွေ ရှိနိုင်တယ်လို့ အသိပေးပါတယ်။ဒါပေမယ့် စစ်တပ်က လက်နက်ကြီး၊ ရှော့တိုက်ဒုန်းတွေနဲ့ ပြန်လည် ပစ်ခတ်ခဲ့တယ်လို့လည်း သိရပါတယ်။
လွန်ခဲ့တဲ့ တစ်လကျော်ကလည်း ကပစ(၁၂)ရဲ့ အနောက်ဘက်ခြမ်း ၁၀ မိုင်ဝန်းကျင်မှာရှိတဲ့ ဆင်ကော်ရွာတပ်စခန်းကို ကာကွယ်ရေးတပ်ဖွဲ့တွေက ပိတ်ဆို့တိုက်ခိုက်ခဲ့ဖူးပါတယ်။စစ်တပ်ရဲ့ စစ်ကူစစ်ကြောင်းတွေကြောင့် ပြန်လည်ဆုတ်ခွာခဲ့ရပါတယ်။
သရက်မြို့နယ်အပါအဝင် မကွေးတိုင်းမှာ ကပစ စက်ရုံ ၁၅ ခုထိရှိပြီး ပြီးခဲ့တဲ့လပိုင်းတွေက ပေါက် နဲ့ ဆိပ်ဖြူမြို့နယ်က ကပစ စက်ရုံတွေရဲ့ ဓာတ်အားလိုင်းစနစ်တွေကို ကာကွယ်ရေးတပ်တွေက ဖြတ်တောက်တိုက်ခိုက်ခဲ့တာရှိပါတယ်။
ရုပ်သံ – သရက်ခရိုင်တပ်ရင်း(၄)
