ဖေဖော်ဝါရီ-၈၊၂၀၂၆။အိမ်သွင်/People’s Spring
အာရက္ခတပ်တော်(AA)ထိန်းချုပ်ထားတဲ့သံတွဲမြို့ကို စစ်ကောင်စီက ဂျက်ဖိုက်တာနဲ့ဗုံးကြဲသွားတာကြောင့်နေအိမ် ၉လုံးပျက်စီးပြီး ဒေသခံ၂ဦးဒဏ်ရာရရှိခဲ့ပါတယ်။
ဒီနေ့ ဖေဖော်ဝါရီ ၈ရက် နေ့လည် ၁နာရီခွဲခန့်မှာ ဗုံးကြဲသွားတာလို့ ရခိုင်ဒေသခံသတင်းရင်းမြစ်ကပြောပါတယ်။
“အိမ်တွေတော်တော်ကိုပျက်စီးသွားတာ။သံတွဲကိုပစ်မှတ်ထားပြီး လက် နက်ကြီးခဏခဏပစ်တာ။ ဒီနေ့က ဖိုက်တာဝဲပြီးပစ်တာ။ မြို့ခံတွေမနေရဲအောင် လုပ်တာနေမယ်”လို့ ၎င်းက ပြောပါတယ်။
Public Service Announcement
ဒဏ်ရာရတဲ့သူ နှစ်ဦးအနက် တစ်ဦးက ဦးခေါင်းထိခိုက်မှုပြင်းထန်တယ်လို့ သိရပါတယ်။
အောက်တိုဘာ၂၉ရက်ညကလည်းသံတွဲမြို့နယ်၊ငပလီမြို့ကို စစ်ကောင်စီက လေကြောင်းကနေ ဗုံးကြဲလို့ ကလေးငယ် ၃ဦးအပါအဝင် ၉ဦးသေဆုံးပြီး ၂၃ဦး ဒဏ်ရာရခဲ့ပါတယ်။
၂၀၂၅ ဒီဇင်ဘာ ၃၁ ရက် နှစ်သစ်ကူးညကလည်း စစ်တပ်က သံတွဲမြို့အမှတ် (၁)ရပ်ကွက်ကိုဗုံးကြဲခဲ့လို့ နှစ်ပေါင်းရာချီသက်တမ်းရှိတဲ့ ရှေး
ဟောင်းနေအိမ်တချို့ပျက်စီးဆုံးရှုံးခဲ့ပြီး ဒေသခံ ၃ဦး ဒဏ်ရာရရှိပါတယ်။
ရေတပ်စခန်းရှိတဲ့သံတွဲမြို့ကို ၁၀၂၇ စစ်ဆင်ရေးနဲ့အတူ AAက တိုက်ခိုက်သိမ်းပိုက်ခဲ့တာဖြစ်ပါတယ်။
စစ်တပ်ကသံတွဲမြို့ကို လေကြောင်းအပြင် ရေတပ်သင်္ဘောတွေပေါ်ကနေလည်း လက်နက်ကြီးတွေနဲ့ ပစ်ခတ်တိုက်ခိုက်နေလို့ လုံခြုံရေးသတိပြုကြဖို့ AA က သတိပေးချက် ထုတ်ပြန်ထားခဲ့ပါတယ်။
(၂၀၂၅ ဇွန်လ ၉ရက်က လေကြောင်းတိုက်ခိုက်ခံရမှုကြောင့် ပျက်စီးသွားတဲ့ သံတွဲမြို့ အမှတ်(၈) ရပ်ကွက်၊ ကျောက်ကြီးရွာ အထက်တန်းကျောင်းကို တွေ့ရပုံ။ ဓာတ်ပုံ – APM)
